61
Nan Maphod an Ulgud hi Aat di Abaliwan
1 Ya ha"in an hi Isaiah* Ta"on un hi Isaiah di himmapit mu ipa"elnay aat nan Alin Pento' Apo Dios an hi Jesu Kristu, at paddungnay hi Jesus di himmapit goh (Lk. 4:16-21). ya inali' di,
“Wagwadan Ha"in nan na'abbagbagtun Dios
ti pinilia' an mangiyul'ulgud hinan Maphod an Ulgud hinan nun'awotwot.
Ya hennaga' an mangal'alu' hinan nidugah di punlungdayaana,
ya ta ipa'innila' di pumbangngadan din tatagun nipiyuy hi udum an babluy
ya hay ibo'tanan nan paddungnay wah nan hehellong.† Lk. 4:18.
2 Ya ta ipa'innila' goh an nadatngan mahkay di pangipattigan Apu tu'uh homo'nah tagu‡ Lk. 4:19.
ya nan pummoltaanan amin hinan mi'buhul.
Ya umat goh an ipadenolnan amin nan minomnoman
3 an namamah nan tatagud Zion.
At adida mahkay iloglog di dapul an dumalat di punlungdayaanda,
mu undaat al'altian hi habhabung an dumalat di amlongda.
Ya umat goh an ikankantaday pundayawda
an ta"on hi un hidin hopapna ay ya mi'id di namnamadan mi'tagu.
At dida nan mipaddung hi magangan ayiw
an intanom Apo Dios hi attigan di amaphodna.
4 Ya ipaphodda mahkay nan babluydan din nun'apa"i
ya din nun'atawan.
Ya ipaphodda goh din ingnganuy din tataguh penghana.
5 Ya nan bunag di baalda ta diday mangipahtul hinan animalda,
ya diday muntamuh nan punhabalanda.
6 Ya alyonday un da'yuy papadin Apo Dios,
ya baal goh da'yu.
Ya nan malpuh nan inadangyan di udum an tatagu di hiyay itanudda ya iting'ida.
7 Ya mapogpog mahkay nan abainanda,
ya mihinada mahkay hinan nahamad an lutada.
Ya nan inadangyanda ya mumpidway ado'olna,
ya nan amlong ya minaynayun hi mi'id di pogpogna.”
8 Ya inalin Apo Dios di,
“Hay pohdo' ya nan nahamad an pangat,
ya abohla' nan mangakaw ya nan mangat hi pumbaholan.
Adi' ibahhaw an idat di lagbuyun tatagu',
ya ipa'annung'u nan intulag'un da'yu.
9 Ya nan holagyu ya nan a'ap'apuyu goh di ma'al'alih nan abablubabluy,
at an amin nan mannig ay da'yu ya iniladan da'yuy tatagu' hi winagaha'.”
10 Ya inali' an hi Isaiah di,
“Nidugah an umamlonga' hinan namaliwan ya nangibilangan Apo Dios ay ha"in hi maphod!
Ya umata' hinan lala'in nunlubung hi lubung di mungkasal
unu babain enegtomnay gina'unah nan kasalna.
11 Ya manu ay umat hina ti nan na'abbagbagtun Dios ya tigona
ta an amin nan tataguh abablubabluy ya ipabagbagtuday amaphodna.
Ta wan nan nepto' an pangatda ya umat hinan mumpangahangaw an do'ol an neho'.”