1 Sinpangan na, nangay dana machisisirin dyaken anghilaw, as kan yinokay na yaken a akmakoy nakaycheh. 2 Inyahes na dyaken a kāna, “Āngo maboya mo?”

Ki tinbay ko a kon ko, “Makaboya akwayas paydisnan paysohwan a maynana balitok. Aryayaw sabak do rabaw naya yanan lana. Do omdibonaya no nya sabak, ki myan saw papito sa paysohwan. As kāda asa, ki myan papito a kadopit na a ayaman pabīlo na a komāmang do soho saya. 3 Myan payaw dadwa kayo a olibo* 4:3 Pal. 11:4 do maybītaya no paydisnan paysohwan, asa do kawanan, as asa do kaholi.”

4 Do dāwri, inyahes ko do anghilaw a machisisirin dyaken a kon ko, “Āngo saw nyaya mo āpo?”

5 Ki binata dyaken anghilaw a kāna, “Chapatak mo sabawriw nya?”

Ki initbay ko a kon ko, “Enggaya mo āpo.”

6 (Sinpangan na, binata no anghilaw a machisisirin dyaken a ibahey ko nya minsāhi ni ĀPO di Serobabbel: “No manoroh so ballīgi mo, ki yapo aba do bīleg mana panakabalin mo an dya yapo do ispirito a yapo dyaken. 7 Siraw mangbalat a akmas karakohaya no tokon, ki mabo sanchi. Bangonen mo nanchiw Timplo. As anchan pangayen mo manawdyaw a bato, ingēngengey danchi no tawotawo, ‘No Dyos, bindisyonan na! No Dyos, bindisyonan na!’ ”

8 Do dāwri, inpakatoneng dana ni ĀPO minsāhi naw dyaken a kāna, 9 “Si Serobbabel, napangay so pondasyon no nya Timplo, kan iyanchiw mapatayoka sya. Anchan maparin nyaya, mapatakan dananchin tawotawo a yaken a ĀPO a Manakabalin do Tābo nanoboy dyimo a mangay dyira.† 4:9 Mana “mapatakan monchi a yaken a ĀPO a Manakabalin do Tābo nanoboy dyaken a mangay dyimo”. 10 Aran sino a mangiroromen so dēkey a naytarabākwan, ki masoyot sanchi anchan maboya da si Serobbabel a mangtongtong a mapatnek so Timplo.”)

Do dāwri, binata dyaken no anghilaw a kāna, “Siraw papitwaya paysohwan, siraw nawriw akmaw papito a mata ni ĀPO a manyidechideb so tanaya.”

11 Ki inyahes ko dya a kon ko, “Na, āngo chakey a batahen kayo saya no olibo do maybītaya siri no paydisnan paysohwan?” 12 Inyahes ko na pinirwa a kon ko, “Āngo chakey a batahen dadwaya sanga no olibo do katangked daya no dadwa balitok a tōbo a oyogan da no lanaya no olibo?”

13 Inyahes na a kāna, “Chapatak mo abawri an āngo saw nya?” inyahes na.

“Enggayam āpo,” initbay ko.

14 Dawa, binata na a kāna, “Siraw nyaw dadwaw a mahahakay‡ 4:14 Siraw dadwaw a mahahakay, ki sa Joswe a kapotōtan Aaron kan Serobbabel a kapotōtan Dabid. Do Adan a Tōlag, sira lang katotohosan a pādi mana āri a napadwan so lana ohwaw da a magsirsīrbi. Leb. 8.30; 1 Sam. 10:1; 16:12-13; 1 Ār. 1:39; 19:15-16 a napadwan so lana a maipaboya a pinidi no Dyos a magsīrbi dya a Āpo do intīro a tana.” Nyaw binata na.