1 Sinpangan na, tomnangay ako na minirwa, kan nakaboya ako so somayasayap a nahon a pagbasāan! 2 Do dāwri, inyahes no anghilaw a machisisirin dyaken a kāna, “Āngo maboya mo?”

Ki tinbay ko a kon ko, “Somayasayapaya a nahon a pagbasāan a tatdo a poho a karapan so kanaro kan asa poho kan dadima karapan so kawbong.”

3 Ki binata na dyaken a kāna, “Naitolas do dyaya pagbasāan iyaw abay a komayakayab do intīro a lōbong. Sigon do naitolas do bīt naya, ki mapaksyat sanchi a tabo manakanakaw do tanaya. As do bīt naya, ki naitolas a mapaksyat sanchi a tabo mangsaksi so bayataw. 4 Batahen ni ĀPO a Manakabalin do Tābo a kāna, ‘Toboyen konchiw nya abay a mohtot, kan somdep do bahay no kāda manakanakaw, as kan do kāda bahay no tabo a mangsaksi so bayataw a insapata na do ngaran ko. Omyan anchi nyaya abay dyira kan rārayawen nanchiw bahabahay da a aran kayo kan bato saya.’ ”

5 Sinpangan na, iyaw anghilaw a machisisirin dyaken, naypantad kan binata na dyaken a kāna, “Tomangay ka, ta chiban mo ītwaya.”

6 Ki inyahes ko a kon ko, “Āngo nawri?”

Ki tominbay a kāna, “Asa pagsokātan a alat. No chakey na batahen, ki gatos no tawotawo do intīro a lōbong.”

7 Sinpangan na, nabwang tohong naw a boli, ki myan nachisdot a maydisna mabakes! 8 Ki binata no anghilaw a machisisirin dyaken a kāna, “Iyaw nyaw karahet.” Do dāwri, pinagmis na a pinabidiw mabakesaw do irahemaw no alat, as nakapagmis na so bolyaw a tohong na.

9 Sinpangan na, tomnangay ako a nanyideb, ki nakaboya ako so dadwa mababakes a somayap a komwan dyaken. Siraw panyid da saw, ki rarakoh kan mayit. Inhap daw alataw a insayap.

10 Inyahes ko do anghilaw a machisisirin dyaken a kon ko, “Namna, dino ikwanan das alataya?”

11 Ki tinbay na yaken a kāna, “Iyangay dad Babilonya* 5:11 Do Hebreo a chirin, ki “tana no Sinar”. Sinar, ki adan a ngaran no Babilonya, kan dawriw pinadas dan tawotawo saw a pamarinan so asa syodad a myan so atoy a makarapit do hanyit. Gen. 11:2-4; Zec. 5:11 a pamarinan das timplo na. An mapatayoka dana, padisnahen danchi daw alataya a pagdaydayāwan dan tawotawo.”