1 Tomnangay ako na. Ki do dāwri, nakaboya ako so apat a logan a pachigobat, kan nayhohtot sa do payawan daw no dadwa tombāga a tokon. 2 Iyaw manōmaw a logan a pachigobat, ki goygoyōden dan mababaya a kabalyo. No somaronwaw, ki goygoyōden dan mababaheng a kabalyo. 3 No chatatdo daw, ki goygoyōden dan mayidak a kabalyo. As no chapat daw, ki goygoyōden dan labang a kabalyo. Sira tabo, ki mabibīleg sa. 4 Do dāwri, inyahes ko na do anghilaw a machisisirinaw dyaken a kon ko, “Āngo saw nya mo āpo ko?”

5 Ki tinbay no anghilaw yaken a kāna, “Siraw nyaw apat saw a salawsaw* 6:5 Mana “ispirito”. no kahanyihanyitan kan kayayapo da do salapen Āpo no intīro a lōbong. 6 Iyaw loganaw a pachigobat a goygoyōden dan mababahengaw a kabalyo, ki mangay do ammyānan a komwan do Babilonya. Iyaw asaw a goygoyōden dan mayidakaw a kabalyo, ki komwan do lāod. As no asaw a goygoyōden dan labangaw a kabalyo, ki komwan do abagātan.”

7 Do nakahtot daw no mabibīleg saw a kabalyo, makapanapanaya pa saba a mangay do intīro a lōbong. Ki binata no anghilaw a kāna, “Yangay nyo a wanawanan intīro a lōbong!” Do dāwri, nangay sa.

8 Katayokan nya, inngēngey no anghilaw dyaken a kāna, “Chiban mo saw kabalyowaya a kominwan do ammyānan do Babilonya, ki binawan daw soli ni ĀPO† 6:8 Mana “no ispirito ko”. do dawri a tana.”

9 Inpakatoneng ni ĀPO minsāhi naw dyaken a kāna, 10 “Rawaten mo sāgot da saya no naakaw saya a nawara yapo do Babilonya a sa Helday, Tobidyas, kan Jedayas. Nyeng mo a yangay do bahay ni Josias a pōtot ni Sepanyas. 11 Hapen mo saw sāgot da saya pirak kan balitok, kan parinen mo a korona, as kapangay mo sya do ohwaya ni Joswe a katotohosan a pādi a pōtot ni Jehosadak. 12 Ibahey mo di Joswe iyaw nya batahen ni ĀPO a Manakabalin do Tābo a kāna, ‘Cha dyaw tawowaw a mapangaranan so Sanga,‡ 6:12 Chiban nyod 3:8. No chakey na batahen, ki si Serobbabel. Ki no chakey na ibahey do masakbayan, ki iyaw Mesias a si Āpo Jesos. ta mayparakoh anchi a akmas sanga do tanaya, as kan patneken nanchiw Timplo ni ĀPO. 13 On, iyanchiw mismo a mapatnek so Timplo ni ĀPO, as kan rawaten nanchiw pammadāyaw a rombeng do āri, as itorayan na sanchiw tawotawo na a yapo do trono na. As kan myan panchiw pādi do bīt no trono naya. Do dāwri, myan tōnos kan kapya do nagbaetan da a dadwa.’§ 6:13 Masaw a aran iya, ki pādi panchi, kan magtōnos anchiw kinaāri naya kan kinapādi na. 14 Iyanchiw korona, ki pakanaknakman anchi do Timplo ni ĀPO da Helday, Tobidyas, Jedayas, kan Josyas* 6:14 Josyas do chirin Hebreo, ki “Hen”. No chakey na batahen “Hen”, ki parābor. a pōtot ni Sepanyas.

15 “Siranchiw myan saw do mateng, mangay sanchi a somidong a mapatnek so Timplo ni ĀPO. As anchan mirwa a napatnek, ki matonngan nyonchi a yaken a si Sakaryas, ki tinoboy na yaken ni ĀPO a Manakabalin do Tābo dyinyo. Maparin sanchi a tabo nyaya an sipapasnek kamo a magtongpal di ĀPO a Dyos nyo.”