4
Iyaw Baro di Ipatpateg Na a Nobya
1 “Ay, āngwa kapintas mom Ipatpateg ko!
Ay, anyan a kapintas mo!
Siraw mata mwaya a abongan no abōngot mo, ki akma saw boyit.
Iyaw kapintasaya no boboh mo, ki akmas kabaheng no arban a kalding
a madama mosok a yapo do Tokon no Gilead.
2 Siraw nyepen mwaya, ki akmas kayidak daw
no arban no mabinayi saw a karniro a kagogod na pa
a nakaraya do pariryosan daw.
Kāda nyepen, ki akmay myan kasingin na.
Aba dyiraw maychatanyi.
3 Siraw bibi mwaya, ki akmas kabaya no bolabola.
Iyaw dangoy mwaya, ki makadadaw.
Siraw pisnyi mwaya, ki akmas kabaya dan nakchid a granada* 4:3 Eks. 28:33
a abongan no abōngot mo.
4 No manarwaya a lagaw mo,
ki akmas kakarang no pagwanawanan ni Dabid
a napatnek a pangayan so armas.
Nasāryowan lagaw mo a akmay nakailōdyitan rinībo a sarāpa
dan taga-gobat saw.
5 Siraw dadwaya a soso mo, ki akmas dadwaw a orbon a ogsa.
On, akma saw orbon a singin a ogsa
a magar-ārab do kabakongan.
6 Sakbay a ipol-oy naw salawsaw do kapaysesēdang,
as kakaro dana no sari,
igodes ko mangay do tokon no mirra
kan do paytokonan no insinso.† 4:6 No tokon kan paytokonan, ki lādawan sa no soso no balāsang. Kan. 1:13
7 Ay, āngwa kapintas no tābo inaynawan mo Ipatpateg ko.
Aba polos pakapilāwan mo.”
8 “Machangay ka dyaken a yapo do Lebanon mo nobya ko.
Machirayay ka dyaken a yapo do Lebanon.
Mosok ta a yapo do tōtok no tokon a Amana,
yapo do tōtok no tokon Senir kan Hermon,
yapo dyirad abab dan lion
kan tokon saw a paybabatasan dan leopardo.‡ 4:8 No chakey na batahen do dya birsikolo, ki malidyat a matodah no baro iyaw balāsang a nobya na.
9 Natiliw mo pōso ko mo ādi ko kan nobya ko.
Natakaw mo pōso ko do asa paldyap dan mata mo,
kan asa bato no sāryo mo.
10 Ay, anyan a katami no kadaw mom ādi ko kan nobya ko!
Mangamangay paw kaīmas no adaw mo kan palek.
As no angot no bangbanglo mo, ki mababanglo kan aran āngo a kīta a bangbanglo!
11 No taham no bibi mo, ki akmay katami no tagapolot no yokan, mo nobya ko.
Gātas kan tagapolot no yokan, ki myan sa do ohbo no rida mo.§ 4:11 Gātas kan tagapolot no yokan, ki ibahey naw katami kan kabaknang a akmas tana a Kanaan (Eks. 3:8; Prob 5:3; 24:13-14). No chakey na ibahey do nya birsikolo, ki maynamot do kapangdadek no balāsang kan no kapaychirin na.
As no banglo no laylay mo, ki akmay banglo no sidro a kayo do Lebanon.
12 Akma kay minoyongan a namban mo ādi ko kan nobya ko.
Akma kay akbod a nahadan a natolbek.
13 Siraw mohamoha mo, ki akmay kamohamohan so granada
a napno so kagaganayan a asi, henna,* 4:13 Kan. 1:14 kan nardo.
14 On, mabanglo a nardo, asapran, kalamos, kanela,
kan tabo kīta a kayokayo a myan so angot a insinso
a myan mirra kan aloe,
kan tabo kīta no kagaganayan a pangpabanglo.
15 Imo akmay pakayapwan dan mangsibog do minoyongan,
akbod a moyog a mosok a yapo do Lebanon.”
Iyaw Nobya di Chadaw Na a Baro
16 Mayokay ka a ayokayam. Ka dya a itaw!
Pablotan mo minoyongan kwaya
tan iyaw banglo na, ki magwaras a maychawpit.
Mangay pakono si Chadaw ko do minoyongan na,
kan tahaman naw kagaganayan saw a protas.
*4:3 4:3 Eks. 28:33
†4:6 4:6 No tokon kan paytokonan, ki lādawan sa no soso no balāsang. Kan. 1:13
‡4:8 4:8 No chakey na batahen do dya birsikolo, ki malidyat a matodah no baro iyaw balāsang a nobya na.
§4:11 4:11 Gātas kan tagapolot no yokan, ki ibahey naw katami kan kabaknang a akmas tana a Kanaan (Eks. 3:8; Prob 5:3; 24:13-14). No chakey na ibahey do nya birsikolo, ki maynamot do kapangdadek no balāsang kan no kapaychirin na.
*4:13 4:13 Kan. 1:14