3
Iyaw Nobya di Chadaw Na a Baro
1 Naychararakan do katri ko,
chinangsah ko chinadawaw no pōso ko.
Inahahay ko a mangay, ki nangay aba.
2 “Maybangon ako na, kan midibidi ako do syodad
dyirad tabo kalkalsada kan do plasplasa.
Chichwasen ko chinadawaw no pōso ko.
Kinadyaw ko, ki aba nadongso ko.
3 Basbāli a nadongso da yaken no magwanawan saw a magbantay
do kapaybidibidi daw do ahad no syodad.
Inyahes ko a kon ko, “Naboya nyori si Chadaw ko?”
4 Nakahabas ako dyira so dēkey
do nakadongso kwaw si Chadaw no pōso ko.
Kinepkep ko kan inaryan kwaba
mandad nakahap ko sya do bahay ni ānang ko,
do kwartwaw a nangiyanakan na dyaken.
5 Inyo a babbalāsang a taga Jerosalem, isapata nyo pa dyaken
dyirad bomaro a ogsa kan bomalāsang a ogsa do katamtamkan
a dyi nyo yokayen mana istorbwen adaw mandan kosto a ōras na.
No Chatatdo a Daniw
6 Sino somōngadaya a somonget a yapo do let-ang
a akmay parey a matokpoh a ahob
a nabangbanglwan so mirra kan insinso,
kan tabo a kīta a mabanglo a kolbos dan magbibyahi a maglaklāko?
7 Tori insabhay da si Solomon do paydisnan naw a pagbibyahi
a dinibon dan anem a poho a taga-gobat
a siraw kagaganayanaw no Israel.
8 Tabo sa, ki siiispāda.
Tabo sa, ki batīdo do gobat.
Kāda asa dyira myan ispāda na do siri na
a nakasagāna dyirad mangdaropaw an mahep.
9 Iyaw paydisnan a pagbibyahi a inpaparin ni Āri Solomon a para dya,
ki inpaparin na do kayo a yapo do Lebanon.
10 Siraw apat a parey† 3:10 Siraw parey, ki naosar a pangayen da pangsirong. na, ki inpaparin na do pirak.
Iyaw panarngan naw, ki inpaparin na do balitok.
Iyaw disnan naw, ki nakalopkopan so obi so kīta a tela
a siaadaw a binistyan dan babbalāsang a taga Jerosalem.
11 Inyo a babbalāsang a taga Sion,‡ 3:11 Do Hebreo a daniw, “Sion,” ki mayengay kan “Jerosalem”. mohtot kamo,
kan chiban nyo si Āri Solomon!
Magkorona so korona a inkorona dya ni ānang na
do arawaw no nakapagkasar na,
do arawaw a nakapagragsak no pōso na.