1 Do nakapaybidyaw ni Jose a yapo do Gosen a nangay a nangbayat da āmang kan kakakteh na saw, namidi so dadima dyirad kakakteh na saw a kayrayay na a mangay do yanan ni āri. Inbahey ni Jose di Paraon a kāna, “Nawara dana saw sa āmang kan siraw kakakteh ko saw a yapo do Kanaan. Pinanawbi da saw tabo a binyay da kan warawara da. Ari dana saw do Gosen.” 2 Sinpangan na, inyam-āmmo na saw dadimaw a kakakteh na di Paraon.

3 Inyahes ni Paraon dyira a kāna, “Āngo tarabāko nyo?”

Tominbay sa a kon da, “Yamen a tobotoboyen mo āpo, ki magpaspastor kamyaw a akma siras kapoonan namen saw.” 4 Binata da pa a kon da, “Nangay kamyaw dya a omyan so dēkey a chimpo, mo āpo, ta taywara danaw kapaychapteng do Kanaan. Nalidyatan kamyaw daw kan aran siraw binyay namen saw, ta apabaw pangipastoran namen dyira. An ara mwa ipalōbos a omyan kami a tobotoboyen mo do Gosen, dawrinchiw yanan namen.”

5 Binata ni Paraon di Jose a kāna, “Sichangori, nawara danas āmang mo kan kakakteh mo saw dyimo. 6 Cha dyaw tana a Egipto, as imo danaw makatoneng a mamidi so maganay a tana dyira da. Palobōsan mo sa a omyan do Gosen. An myan dyiraw chapatak mo a maganay a mangipastor so binyay, siraw pagaywanen mo siras binyay ko saw.”

7 Sinpangan na, inhap ni Jose si Jakob a āmang na do yanan ni Paraon, tan iyam-āmmo na dya. Kinablaāwan ni Jakob Paraonaw, as nakabindisyon na sya. 8 Inyahes ni Paraon di Jakob a kāna, “Papira danaw tawen mo, mo āmang?”

9 Tominbay si Jakob a kāna, “Asa dana gasot kan tatdwa poho tawen do byay ko a mayadiyadis. Manyid nawri kan malidyat iyaw nakabyay ko do hapotayan tana. Ta no nakabibyay ko, ki akmabas kanaro no byay no kapoonan ko saw do kapayadiyadis da.” 10 Ki sakbay a nayam si Jakob, pinirwa na binindisyonan Paraonaw a nawriw kapadyos na dya. 11 Do dāwri, pinachiyan sa ni Jose sa āmang na kan siraw kakakteh na saw do Egipto. Tinorohan na sa so kagaganayan a tana do sākop a Rameses do Gosen. Pinarin Jose iyaw bilinaw ni Paraon. 12 Tinorohan na pa sa so kanen da āmang na, siraw kakakteh na saw, as kan tabo kapamilyaan saw ni āmang na sigon do kāron adedekey a myan dyira.

13 Do dāwri, naypaypataywara danaw kapaychapteng, kan apaba polos tomobo do aran dino a yanan do Egipto kan do Kanaan. Dawa, oltimo a malidyatan saw tawotawo daw. 14 Nangay sa di Jose a gomnātang so irek da. Maynamot do dāwri, chinpeh a tabo ni Jose iyaw kwarta daw a pagbāyad no tawotawo a yapo do Egipto kan Kanaan. Inyangay na kinapyaw kwartaw do palasyowaw ni Paraon. 15 Do nakapatawos danaw no kwarta no taga Egipto kan Kanaan, nangay saw taga Egiptwaw di Jose, as nachikakaāsi sa a kon da, “Torohan mo pa yamen so kanen namen. Āngo ta nonolay mo yamen a madiman do kapanyideb mo a maynamot do kabon kwarta namen.”

16 Ki tominbay si Jose dyira a kāna, “An abo danaw kwarta nyo, sira danaw binyay nyo saw yangay nyo dya, ta tādyan ko so kanen nyo.” 17 Dawa, inyangay da saw binyay da saw di Jose a akmas kabalyo, karniro, kalding, bāka, kan asno da saw, ta nawriw itādi das kanen da. As do dāwri a tawen, tinorohan na sa so kanen da a tādi no binyay da saw.

18 Do somnaronwaw a tawen, nangay dana sa di Jose, as binata da a kon da, “Āpo, chapatak mo a arabaw kwarta namen, as komwan binyay namen, ta dyira mo na a tabo. Araba polos maitoroh namen dyimo, an dyi danaw inawan namen saya kan siraw tana namen saw. 19 Āngo ta nonolay mo yamen a madiman do salapen mo. An komwan, mangbayo tana namen saya, ta apabanchiw tomobo. Sichangori, panādi namen danaw inawan namen kan tana namen saw so kanen. Mayparin kami na adīpen ni Paraon, as dyira narana saw tana namen saya. Ki torohan mo pakono yamen so irek tan mabyay kami, as kan binyi tan myan paw maimoha namen do tana namen saya.”

20 Sinpangan na, ginātang a tabo ni Jose iyaw tana saya do Egipto tan dyira dana sa ni Paraon. Katayitayisa a taga Egipto, ki pīlit darana sa inlāko iyaw tana da saw, ata, taywara danaw kapaychapteng. Dawa, nayparin a dyira tabo no āryaw siraw tanaw do Egipto. 21 As siraw tabo tawotawo, ki inadīpen sa ni Jose do intīro a Egipto.* 47:21 Mana “Pinayadis na saw tawotawo ni Jose do masngen saw a syodad a myan so agāmang tan maydaydamnay a binglayen kanen da”. 22 No moyboh a tana a dyi na ginātang ni Jose, ki tana saw no papādi saw. Machita daba ilāko, ta nāw a myan itorotoroh ni Paraon dyira a yapo do binglay na a kanen.

23 Sinpangan na, binata ni Jose dyirad tawotawo saw daw a kāna, “Sichangori, ginātang ko naynyo kontodo tana nyo saw a dyira ni Paraon. Cha dyaw binyi nyo a imoha nyo do tana nyo saw a ginātang na. 24 Ki anchan magāpit kamo, itoroh nyonchi di Paraon iyaw apagkalima naw. Iyaw mabidinaw, ki dyira nyo a binyi kan dyira nyo a kanen kan pamilya nyo.”

25 Nyaw initbay da a kon da, “Imom āpo, nangisalākan dyamen tan dyi kami a madiman. Dawa, mayparin kami a adīpen ni Paraon, kan chahwahok mo pakono yamen, mo āpo.” 26 Dawa, pinayparin ni Jose a linteg do Egipto iyaw no apagkalima no tabo a āpit, ki dyira ni Paraon. Aran sichangori, ki komwan paw mawnonotan. Siraw tana lang no papādi saw dya inhap ni Paraon.

27 Siraw Israelitaw mana siraw kapotōtanaw ni Jakob, minyan sa do Egipto do tana a mayngaran so Gosen. Nakahap sa so tana daw,† 47:27 Mana “Bomnaknang sa daw”. as taywara naypāro anak da. 28 As si Jakob, ki minyan so asa poho pa kan papito a katawen do Egipto. Iyaw kanaro no byay na, ki narapit naw asa gasot kan apat a poho, kan papito a katawen. 29 Do kasngen danaw no kadiman na, pinatawag na si Jose a pōtot na, as nakabata na sya a kāna, “An chakey mo a ipaboyaw kāsi mo dyaken, pangayen mo tanoro mwaya do payawan dayan padang‡ 47:29 Gen. 24:2 kwaya a pangilasīnan a tongpalen monchiw akdawen ko dyimo. Ikari mo a itābon mwaba yaken do dya Egipto. 30 Anchan madiman ako akmas kapoonan ko saw, ikaro monchi yaken yapo do Egiptwaya tan yangay mo yaken do yanan daw a itābon.”

Tominbay si Jose a kāna, “On mo āmang, tongpalen konchiw nawri.”

31 Ki binata ni Jakob a kāna, “An komwan, isapata mo a parinen mo.” Dawa, insapata ni Jose. Do dāwri, nagdomog si Jakob do yanan katri na, as nagdaydāyaw do Dyos.§ 47:31 Mana “nagsanggiran naw iigpetan ni Jakob sarokod naw a nagdaydāyaw do Dyos”. Heb. 11:21