1 Do dāwri, naybabalay aba sa Jakob. Inrobwat da iyaw tabo a myan dyira, as nangay do Beerseba. Dawriw naparawatan na so dāton na saw do Dyos a iyaw dinaydāyawaw ni simna Isaak a āmang na. 2 Do dāwri a ahep, naychirinan Dyos si Israel a si Jakob do asa parmata a kāna, “Jakob, Jakob.”

Tominbay si Jakob a kāna, “On mo Āpo. Cha ako dya.”

3 Binata no Dyos a kāna, “Yaken, ki iyaw Dyos a dinaydāyaw ni āmang mo. Mamo kaba a mangay do Egipto, ta paypārohen ko sanchiw kapotōtan mo daw a mandan payparinen ko sa rakoh a nasyon. 4 Myan ako dyimo do kangay mwaya do Egipto, ki paybidihen ko sanchiw kapotōtan mo do dya a Kanaan. Myan anchi si Jose do yanan mo anchan madiman ka.”

5 Sinpangan na, komnaro sa Jakob do Beerseba. Insakay dan makakaktehaw si āmang da, siraw pōtot da saw, as kan siraw babbaket da saw do karison saw a intoroh ni Paraon a pagloganan da. 6 Inhap daw binyay da saw kan warawara da saw a nakpeh da do Kanaan, as nakakwan ni Jakob kan tabo kapotōtan na saw do Egipto. 7 On, inyonot na saw pōtot na saw a mahahakay kan mababakes, kan siraw apoko na saw a mahahakay kan mababakes.

8 Siraw nyaw mahahakay a kapotōtan ni Israel a si Jakob a nachirayay dya do Egipto: si Ruben a matoneng a pōtot ni Jakob. 9 Siraw mahahakay a pōtot ni Ruben, ki sa Hanok, Pallo, Hesron, kan Karmi. 10 Siraw mahahakay a pōtot ni Simeon, ki sa Jemwel, Jamin, Ohad, Jakin, Sohar, as kan si Saulo a anak no mabakesaw a taga Kanaan. 11 Siraw mahahakay a pōtot ni Lebi, ki sa Gerson, Kohat, kan Merari. 12 Siraw mahahakay a pōtot ni Joda, ki sa Er, Onan, Sela, Pares, kan Sera. Ki sa Er kan Onan, ki nadiman sa do Kanaan. As siraw mahahakay a pōtot ni Pares, ki sa Hesron kan Hamol. 13 Siraw mahahakay a pōtot ni Issakar, ki sa Tola, Powa, Yob,* 46:13 “Yob” manna “Jashob”. kan Simron. 14 Siraw mahahakay a pōtot ni Sebolon, ki sa Sered, Elon, kan Jaleel. 15 Siraw nyaw mahahakay a kamanganakan ni Lea a inyanak na di Jakob do Mesopotamya, kan myan paw anak da a mabakes a si Dina. Tabo saw pōtot kan apoko ni Jakob di Lea, ki tatdo poho kan tatdo.

16 Siraw mahahakay a pōtot ni Gad, ki sa Sipyon, Haggi, Soni, Esbon, Eri, Arodi, kan Areli. 17 Siraw mahahakay a pōtot ni Aser, ki sa Imna, Isba, Isbi, Berya, as kan Sera a kakteh da a mabakes. As siraw mahahakay a pōtot ni Berya, ki sa Heber kan Malkiel. 18 Siraw nyaw mahahakay a kamanganakan ni Silpa a iyaw adīpen a intoroh ni Laban di Lea a pōtot na, as inyanak naw nya sa di Jakob. Tabo sa, ki asa poho kan anem.

19 Siraw mahahakay a anak ni Rakel a baket ni Jakob, ki sa Jose kan Benhamin. 20 Siraw mahahakay a pōtot ni Jose, ki sa Manasses kan Epraim a inyanak ni Asenat do Egipto. Si Asenat iyaw pōtotaw ni Potipera a iyaw pādyaw do syodad a mayngaran so Heliopolis. 21 Siraw mahahakay a pōtot ni Benhamin, ki sa Bela, Beker, Asbel, Gera, Naaman, Ehi, Ros, Moppim, Hoppim, kan Ard. 22 Tabo saw mahahakay a kamanganakan ni Rakel di Jakob, ki asa poho kan apat.

23 Iyaw mahakay a pōtot ni Dan, ki si Hosim. 24 Siraw mahahakay a pōtot ni Naptali, ki sa Jaseel, Goni, Jeser, kan Sillem. 25 Siraw nyaw mahahakay a kamanganakan ni Bilha a iyaw adīpenaw a intoroh ni Laban di Rakel a pōtot na, as inyanak na di Jakob. Papito sa a tabo.

26 Anem a poho kan anem iyaw kapotōtan ni Jakob a nangay do Egipto. Nairāman abaw babbaket da no pōtot na saw ni Jakob do nya bidang. 27 Dadwaw pōtot ni Jose a naiyanak do Egipto. Dawa, papito a poho† 46:27 Iyaw bidangaya a papito a poho, malābit a nairāman si Jakob, Jose, kan siraw pōtot naw. siraw tabo a kapotōtan ni Jakob do kangay naw do Egipto.

28 Do dāwri, do nakawaraw da Jakob do Egipto, pinanma ni Jakob si Joda di Jose, tan mapatakan naw rarahan a mangay do Gosen. Do nakaibahey danaw ni Jose di Joda, naybidi as nakaikwan na sira do tana a Gosen. 29 Do dāwri, nanyeng a napasagāna si Jose so logan na, as nangay do Gosen a mangbayat si āmang na. Do nakawara naw, kinepkep na si āmang na, as nakatanyis nas nahay.

30 Binata ni Jakob di Jose a kāna, “Changori, aran madiman ako na, ta naboya ko na imo, as napatakan ko na a sibibyay ka.”

31 Sinpangan na, binata ni Jose dyirad kakakteh na saw kan tabo a kapamilyaan ni āmang na a kāna, “Yangay kwa ibahey di Paraon a nangay dana dyaken kakakteh ko saya kan tabo a kapamilyaan ni āmang ko a yapo do Kanaan. 32 Ibahey ko pa dya a inyo a mahahakay, ki magpaspastor kamo, ta inyonot nyo tabo saw arban saw a karniro, kalding, kan bāka nyo, kan tabo a warawara nyo. 33 Anchan tawagan naynyo ni Paraon, as iyahes na an āngo tarabāko nyo, 34 ibahey nyonchi dya a kon nyo, ‘Yamen a tobotoboyen mo, ki magpaspastor kami so binyay a yapo pad kadēkey namen manda sichangori a akma siras kapoonan namen saw.’ An komwan atbay nyo, palobōsan na inyo a omyan do dya a Gosen,‡ 46:34 Do Gosen a logar, ki mabawa so dēkey do sintro nad Egipto. ta chababa da no taga Egipto saw magpaspastor.”