1 Sinpangan na, do asa karaw, do kayegen danaw no araw, minirwa napaboya si ĀPO di Abraham. Myan a maydisna a magpariir si Abraham do pantawaw no pinatnek naw a tolda na do masngenaw do nagdindināmag saw a kayokayo a dyiran Mamre. 2 Ki do dāwri, binangon naw oho naw, ki naboya naw tatdo saw a mahahakay a maytēnek do masngenaw dya. Dawa, nakalyalisto a nachisngen dyira, as nakapagrōkob na do tana.* 18:2 Komwan dadakay dan Jodyo a tod a maytēnek a mangnanaya mandanchan mangay akin bahayaw a omawis siras bisītaw do bahay na. Dadakay da pa a pangpadāyaw da, ki alistwan da bayaten bisītaw, as kapagrōkob da do tana. Heb. 13:2 3 Binata nad asaw a kāna, “Imom āpo, an maganay dyinyo, tod kamo aba homabas dya, an dyi koynyo a rispitaren. 4 Mangay ako pa manghap so ranom a pangoyawyas nyos kokod nyo saya. Katayoka no nawri, maynahah kamo pa do sirokaya no kayowaya. 5 Magpaisagāna ako pa so pangmamabaw† 18:5 Komwan inbahey na tan dyi sa masnekan bisīta naw a mangay a koman, ta inplāno naw mamarin so akmay pasken. nyo, tan myan pangyingyit nyo do kwanan nyowaya. Rakoh soyot ko a mangrispitar dyinyo.”

Ki tominbay sa a kon da, “Ngay, naon ah. Pagostwan namen awis mwaya.”

6 Ki nakalyalisto si Abraham a somindep do toldaw do yananaw ni Sara, as nakabata na sya a kāna, “Makalisto ka manghap so asa kakostal do kagaganayanaw a arina, as kamāsa mo sya, as kapamarin mos tināpay.” 7 Katayoka na nangibahey syaw, nayyayo a nangay do yanan daw no binyay na saw. Nakapamidi nas asa mataba a orbon a bāka, as nakaitoroh na sya do asaw a adīpen na. Inalistwan adīpen naw a pinarti, as nakarotong na sya. 8 Do nakaisagāna danaw no tabo, nanghap si Abraham so omnalsemaw a gātas‡ 18:8 No omnalsem a gātas, ki inbidang da a masdep a inomen a masostansya. kan matami a gātas kan iyaw karnyaw a inparotong na, as nakaiyangay na sya dyirad mahahakayaw do sirokaw no kayo. Iya mismo nagsīrbi dyira do kakan daw.

9 Sinpangan na, inyahes da a kon da, “Dino yanan Sara a baket mo?”

Ki tominbay si Abraham a kāna, “Arid irahemayan tolda.”

10 Ki inbahey no asaw dyira a kāna, “Anchan marapit no naitoding a chimpo, maybidi akonchi dyimo. Do dāwri, ki maymanganak anchi si Sara so mahakay.”§ 18:10 Gen. 21:2; Roma 9:9

Ki myan si Sara do bītaw no aneb do dyichodan daw a mangadngedngey so nawri. 11 Malkem kan baket dana saw maychabahayaw, kan nachipanda dana marodit si Sara. 12 Dawa, namyeng irahem ni Sara do nakadngey naw so nawri, kan binata na do aktokto na a kāna, “Pī! Changori, hahawen ko pawri a maparin dyaken komwan a kapagganas do bakbaketan ako naya kan asa pa malkem danayaw rārayay kwaya.”

13 Ki inyahes ni ĀPO di Abraham a kāna, “Āngo ta namyeng si Sara kan binata na a kāna, ‘Maymanganak ako pawri do koribetbet ako naya?’ 14 Aryoriw dya maparin ĀPO? No ibahey ko dyimo, ki oyod. Anchan mapahabas no naitoding a chimpo, maybidi akonchi dyimo, as kan do dawri, masigorādo a maymanganak anchi si Sara so mahakay.”

15 Ki maynamot do kāmo ni Sara, naglibak, as nakabata na sya a kāna, “Wā! Enggaw, mo Āpo. Namyeng akwabaw.”

Ki binata no bisīta daw a kāna, “Taywaran dyi ka oyod a namyeng?”

16 Sinpangan na, nagrobwat saw bisītaw a komaro, as tinalamad daw Sodoma. Nachirayay si Abraham dyira, tan yangay na sa patodahen do rarahanaw. 17 Ki do dāwri, binata ni ĀPO a kāna, “Itayo ko paro di Abraham plāno kwaya parinen? 18 Masigorādo a payparinen konchiw kapotōtan na a asa rakoh kan mayit a nasyon, as kan maynamot dya, bindisyonan ko sanchiw tabo a nasnasyon. 19 Pinidi ko si Abraham, tan iyanchiw mangnanawo dyirad pōtot na saw kan siraw kapotōtan na saw a manganohed dyaken kan maybibyay sa masingpet kan malinteg. Ta an komwan parinen da, tongpalen konchi a tabo inkari kwaw dya.”

20 Sinpangan na, binata ni ĀPO di Abraham a kāna, “Romnapit dana dyaken pamagatos a maikontra dyirad tawotawo do Sodoma kan Gomorra a maynamot do palālo a karahet da. 21 Dawa, yaken danaw mismo a mangay a manyideb sya an oyod karahet daya sigon do tabo pamagatosaya a romnapit dyaken tan mapatakan ko an oyod mana engga.”* 18:21 Nawri abaw chakey na batahen a dyi na chapatak ni Āpo Dyos tābo, an dya ipaboya na di Abraham a malinteg kapangokom na.

22 Do dāwri, komnaro saw dadwaw a mahahakay a nangay do Sodoma. Ki nabidin si Abraham a maytēnek pa do salapenaw ni ĀPO.† 18:22 Mana “nabidin pa si ĀPO a maytēnek do salapenaw ni Abraham”. 23 Naypasngen si Abraham di ĀPO, as nakaiyahes na sya a kāna, “Oyodori a payrapahen mo saw malinteg kan siraw marahet a dimanen? 24 Kaspangarigan, an myan dadima poho a malinteg do dawri, rārayawen mo pawriw intīrwaw a syodad da? Chāsi mo pakono tawotawo daw, tan mabyay pa saw dadimaya poho. 25 Masigorādo ko a irāman mo saba dimanen malinteg saw a tawo dyirad marahetaw. Ta an dyi mo a parinen komwan, sigorādo a mairāman sa madōsaw abwaw so gatos, ta malinteg kapangokom no Hwis do intīrwaya a tana.”

26 Ki tinbay ni ĀPO a kāna, “Sigi, an myan dadima poho a malinteg a maboya ko do Sodoma, patohoden ko pabaw karārayaw ko so intīro a syodad a maynamot dyira.”

27 Ki tinbay pa ni Abraham a kāna, “Pakawanen mo yaken, mo ĀPO, do katored kwaya machisarīta dyimo. Ta yaken, ki asa lang a tawo a yapo do ahbek, kan abaw kalintegan kwa maychirin. 28 Ki an kaspangarigan, an myan apat a poho kan dadima tawo, as sira lang malinteg, rārayawen moriw intīrwaw a syodad maynamot ta kōrang so dadima?”

Ki binata ni ĀPO a kāna, “Rārayawen kwabaw syodadaw an myan maboya ko daw a apat a poho kan dadima tawo a malinteg.”

29 Minirwa dana inyahes ni Abraham a kāna, “Ki an myan apat a poho lang malinteg, dimanen mori, mo ĀPO?”

Ki tominbay si ĀPO a kāna, “Parinen kwaba an myan apat a poho a malinteg a tawo.”

30 Ki binata danan Abraham a kāna, “Āpo, makasoli kaba ah, ta manahes ako pa dyimo. Āngwan tatdwa poho lang malinteg?”

Tinbay ni ĀPO a kāna, “On, rārayawen kwaba maynamot dyira.”

31 Ki nakatongtong ni Abraham a nangyahahes a kāna, “Pakawanen mo yaken, mo Āpo, do katored kwaya. Āngwan dadwa poho saw maboya mo a malinteg, dimanen mori, mo Āpo?”

“Na, rārayawen kwaba an myan maboya ko a dadwa poho a malinteg a tawo,” initbay ni ĀPO.

32 Binata ni Abraham a kāna, “On, mo Āpo, makasoli kaba, ta nya danaw manawdyi a yahes ko. Nan asa poho sa lang malinteg, dimanen mori?”

Ki tinbay ni ĀPO a kāna, “Alit na, aran myan asa poho lang a malinteg a tawo, ki rārayawen kwaba.” 33 Katayokaw ni ĀPO a nangichirin syaw di Abraham, nayam dana, as kan si Abraham, ki somnabat danad tolda naw.