1 Sinpangan na, binata pan ĀPO di Moyses a kāna, “Mangchid ka so matāpi a bato, kan parinen mo a dadwa a akma siras dāmwaw, kan itolas ko sa mirwaw naitolas saw do dāmwaw a matatāpi a bato a inapsapsa mo.* 34:1 Eks. 32:20 2 Magsagāna ka anchan mabekas, as somonget ka do Tokon a Sinai. Mapaboya ka dyaken daw do tōtokaw no tokon. 3 Imo lang somonget, kan aba polos mapaboya do aran dino do tokonaw. Masaw a ipalōbos mo aba a myan saw magarab a karniro mana bāka do tokaranaw no tokon.” 4 Dawa, nangchid si Moyses so matāpi a bato a pinarin na dadwa a akma siras dāmwaw, as nakasahabit na sira a insonget a masāpa do Tokon a Sinai a akmas inbilinaw dya ni ĀPO.

5 Sinpangan na, naypabodis si ĀPO a nachipongos do demdemaw, as kan naytēnek do bītaw ni Moyses, as inpakatoneng naw ngaran naw a ĀPO.† 34:5 Eks. 33:19 6 Homnabas si ĀPO do salapenaw ni Moyses, kan inbahey na a kāna, “Yaken ĀPO, Yaken ĀPO a māsisyen kan mahwahoken, maydamnay aba makasoli, maaadawen kan mapodno. 7 Nāw no adaw ko do rinibrībo a kapotōtan, as kan pakawanen ko karahet, kapachiribīldi, kan gatos dan tawotawo. Ki nonolay ko sabaw nakagatos a dya madōsa. Maynamot do gatos dan inyapwan, dosāen ko sanchiw anak da kan siraw apoko da do chatatdo kan do chapat na a kapotōtan.”

8 Nyeng a nagrōkob si Moyses do tana kan nagdāyaw. 9 As binata na a kāna, “O ĀPO, an chahwahok mo yaken, akdawen ko dyimo a machangay ka pakono dyamen a aran matwaw oho dan nya saya tawo. Pakawanen mo karahet namen kan gatos namen, as kan rawaten mo yamen a tawotawo a mismo a dyira mo.”

10 Inatbay ni ĀPO a kāna, “Ngay, machitōlag ako dyimo. Do salapen dan tabo tawotawo mo saya, mamarin akonchi so makaskasdāaw saw a ari pad naparin do aran āngo a nasyon do intīro a lōbong. As tabo tawotawo a machiyan dyimo, maboya danchiw kapakaskasdāaw a parinen ko dyimo, yaken a ĀPO. 11 Tongpalen mo ibilin ko dyimo sichangori. Paksyaten ko sanchiw Amoreo, Kananeo, Heteo, Pereseo, Hibeo, kan Jeboseo do salapen mo. 12 Annadan mo a dyi ka machitōlag dyirad pachiyanan mwaw a tana do kwanan mwaya, ta āngwan nawriw asdok dyimo. 13 Basbāli a rakraken nyo saw altar da, rarayāwen nyo saw bato da saw a masantwan, kan tonghen nyo saw posti da saw a pagdaydayāwan no dyosa a Asera.

14 “Maysasakeb kaba do matarek a dyos. Ta yaken a ĀPO a mayngaran so Maīmon, ki maīmon ako a Dyos. 15 Machitōlag kaba dyirad omyan saw a tawotawo do dawri a tana. Ta anchan akma say balangkantis a magdayāw do dyos da saw, as kapangidāton da dyira, awisen danchi imo, as kan masolisog kanchi a koman so makanaw a indāton da dyirad didyosen da saw. 16 As an pachikabahayen mo saw babbaro mo dyirad babbalāsang daw no gan-ganaet, ki akma say balangkantis a mapawnot danchi a tomadyichokod dyaken, kan magdaydāyaw sanchi dyira do didyosen da.

17 “Manyīpo kaba so dyos saw a para dyimo.

18 “Silibraren mo Pistaw no Tinapay a Abos Yapo.‡ 34:18 Eks. 23:15 Akmas inbilin kwaw dyimo, koman ka so tināpay a abos yapo do irahem no papito a karaw. Parinen mo nyaya do naikeddengaw a chimpo do bohan no Abib, ta nawriw bohanaw a nakaihtot mo do Egipto. 19 Dyaken sa a tabo matotoneng a mahahakay, tawo mana binyay. 20 Iyaw matoneng a anak no asno, ki machita sobboten mo so orbon a karniro, mana an dyi mo a sobboten, pototen mo so lagaw. Sobboten mo a tabo saw matotoneng a mahahakay a pōtot mo.

“Abaw magparang dyaken a abo so dāton.

21 “Anem a karaw kapaytarabāko mo, ki do chapapito naw a karaw maynahah ka. Aran do chimpo no kapagtālon mana kapagāpas, machitaw kapaynahah mo.

22 “Silibraren mo Pistaw no Kapagāpit do manōmaw a āpit no trīgo, kan iyaw Pistaw no Manawdyi a Kapagāpit do pagtaposan no tawen.§ 34:22 Eks. 23:16

23 “Maypitdo do makatawen a machita a magparang sa tabo mahahakay mo do salapen ni ĀPO a DYOS no Israel. 24 Paksyaten ko sanchiw nasnasyon do salapen mo, kan parahawahen konchiw sakōpen mo. Abanchiw mangāgaw so tana mo anchan somonget ka so maypitdo do asa katawen a magparang do salapen ni Āpo a DYOS mo.

25 “Parayayen mwabaw raya no binyayaw a idāton mo dyaken do aran āngo a myan so yapo. As mangapya kaba so aran āngo a panda no dāton do Pistaw no Pakanaknakman so Nakahabas no Anghil a manda do kamabekas.

26 “Iyangay mo kagaganayan a manōma asi no inmoha mo do bahay ni ĀPO a Dyos mo.

“Rotongan mo abaw orbon a kalding do gatas no ānang na.”

27 Sinpangan na, binata ni ĀPO di Moyses a kāna, “Itolas mo saw nya chirin, ta sigon do nya sa chirin, intōlag ko na sa dyimo kan do Israel.” 28 Myan si Moyses di ĀPO so apat a poho a karaw kan apat a poho a kahep a dya polos a komninan kan mininom. As intolas na sa do matāpi a bato siraw chirinaw no tōlag a iyaw Asa Poho a Bilbilin.

29 Do nakawsokaw ni Moyses a yapo do Tokon a Sinai a manahabit so dadwaw a matatāpi a bato a nakaitolasan no tōlagaw, chapatak naba a somilsileng rōpa naw maynamot ta nachisarsarīta di ĀPO. 30 Do nakaboyaw ni Aaron kan sira tabo Israelita saw so somilsilengaw a rōpa ni Moyses, chinamo daw naypasngen dya. 31 Ki tinawagan sa ni Moyses. Dawa, nangay dya sa Aaron kan tabo pangpangōlo da saw no Israelita, kan nachisarīta dyira. 32 Katayokan nyaya, naypasngen sa tabo Israelita saw, kan intoroh na dyira tabo bilbilin saw a intoroh ni ĀPO dya do Tokon a Sinai. 33 Do nakatayokaw ni Moyses a naychirin dyira, inabongotanaw rōpa naw. 34 Ki kāda somdep si Moyses do toldaw do salapen ni ĀPO a machisarsarīta dya, pakarohen naw abongot naw. As kāda mohtot a mangibahey dyirad tawotawo so naibilin dya ni ĀPO, 35 naboya da a somilsileng rōpa naw. Do dāwri, abongotan narananchiw rōpa naw a manda do kasdep narananchi a mangay a machisarsarīta di ĀPO.