1 Sinpangan na, binata ni ĀPO di Moyses a kāna, “Komaro kamo na dya, imo kan tawotawo saya a inkaro mo a yapo do Egipto, as kan somonget kamo do tanaw a insapata ko di simna Abraham, Isaak, kan Jakob a kon ko, ‘Itoroh konchi dyirad kapotōtan nyo.’ 2 Manoboy akonchi so anghil a manmanma kan inyo, kan paksyaten na sanchiw Kananeo, Amoreo, Heteo, Pereseo, Hibeo kan Jeboseo. 3 Somonget kamo do tanaw a mataba kan maasi.* 33:3 Eks. 3:8 Ki machangay akwaba dyinyo, ta matwayaw oho nyo, ta āngwan mapatawos koynyo do rarahan.”

4 Do nakadngey daw no tawotawo saw so nya dya maganay a dāmag, pinagdongdong-aw da, kan abaw aran asa a napangay so pagpintas no inawan na.† 33:4 No dadakay da an mangdongdong-aw sa, ki maylaylay sa so makersang a mangipaboya so kapagbabāwi da. 5 Maynamot ta si ĀPO, binata na di Moyses a kāna, “Ibahey mo dyirad tawotawo no Israel, ‘Inyo a tawotawo, matwayaw oho nyo. An machangay ako dyinyo so aran dēkey lang, āngwan mapatawos koynyo. Dawa, pakarohen nyo saw pagpapintas nyo saya tan chapatak ko parinen ko dyinyo.’ ” 6 As dawa, siraw tawotawo no Israel, yapo do dāwri do Tokon a Horeb,‡ 33:6 Tokon a Horeb, ki masngen do Tokon a Sinai mana Tokon a Sinai a mismo. pinakaro da saw pagpapintas da saw.

7 Kāda pagkampwan dan tawotawo no Israel, gagāngay ni Moyses a hapen toldaw a patneken do gaganaw no pagkampwan da do midyo a mabawa, as pangaranan na so tolda a kabayabayatan.§ 33:7 Nya tolda, ki matarek kan iyaw tabirnakolo. Eks. 26:1; 27:21 Aran sino a manahes di ĀPO, mangay do toldaw a kabayabayatan do gaganaw no kampo.* 33:7 Nangrogi dya, machibawa si ĀPO dyirad tawotawo no Israel a maynamot do gatos da. 8 As kāda mangay si Moyses do toldaw, maychakatkat sa tabo tawotawo saw, kan kāda tawo maytēnek do pantawaw no tolda na a manyideb di Moyses mandad kapakasdep na do toldaw. 9 Do kasdep ni Moyses do toldaw, maypabodis tominnekaw a demdem kan tomnek do asdepanaw do tolda ranan a machisisirin si ĀPO di Moyses. 10 As do kaboya daw no tabo tawotawo so tominnekaw a demdem do asdepanaw do tolda, maytēnek dana sa tabo a magdaydāyaw. On, kāda asa do mismo a asdepan do tolda na. 11 As no kapachisisirin ni ĀPO di Moyses, ki ropanrōpa a akmas kapachisarsarītaw no tawo do sīt na. Sinpangan na, naybidi si Moyses do kampo, ki iyaw barwaw a kasidong na a si Joswe a pōtot ni Non, ki nāw na do toldaw.

12 Binata ni Moyses di ĀPO a kāna, “Ibahebahey mwaw dyaken a ‘Idaōlwan mo saw nya tawotawo,’ ki inpakatoneng mo abaya dyaken an sino toboyen mo a rārayay ko. Binata mo paw a kon mo, ‘Chapapatak koymo,† 33:12 Do Hebreo a chirin, ki “Chapapatak ko ngaran mo.” kan mahwahok ako dyimo.’ 13 Changori, an chahwahok mo yaken, ibahey mo sa dyaken plāno mo tan maam-āmmo koymo kan tongtongen ko mangahwahok dyimo. Kanakmen mo a iyaw nya nasyon, ki tawotawo mo sa.”

14 Tominbay si ĀPO a kāna, “Machangay akonchi dyimo kan torohan konchimo so kapaynaynahah.”

15 Sinpangan na, binata ni Moyses a kāna, “An dyi ka machangay dyamen, toboyen mo paba yamen a somonget a makayapo dya. 16 Maypāngo a mapatakan no tabo a mahwahok ka dyaken kan siraw tawotawo mo an dyi ka machangay dyamen? On, iyaw nya abawriw pachitarkan ko kan niran tawotawo mo saya dyirad kadwan a tawotawo do hapotayan tana?”

17 Binata ni ĀPO di Moyses a kāna, “Parinen ko iyaw nyaya a inakdaw mo, maynamot ta mahwahok ako dyimo kan chapapatak koymo.”

18 Sinpangan na, chindaw ni Moyses a kāna, “Ipaboya mo pa dyaken iyaw ranyag no dayag mo.”

19 Do dāwri, tominbay si ĀPO a kāna, “Paypahabasen konchiw tabo a kaganay ko do salapen mo, kan ipakatoneng konchi do salapen mo ngaran ko a ĀPO. Chāsi konchi iyaw no chāsi kwaw, kan ipadidiw konchiw kahwahok do chahwahok kwaw. 20 Ki maparin mwaba maboyaw rōpa ko, ta abaw makaboya dyaken a maparin naw mabyay.” 21 Binata pa ni ĀPO a kāna, “Chiban mo, ariw bato do bīt kwaya a maparin mo a paytēnekan. 22 Anchan homabas iyaw ranyag no dayag ko, pangayen koymo do ahtak naya no bato, as kaolib ko dyimo so kakamay kwaya manda do kapakahabas ko. 23 Sinpangan na, pakarohen konchiw kakamay kwaya, kan maboya monchiw bokot ko, ki maboya mwabaw rōpa ko.”