1 Sinpangan na, nangay sa tabo trībo no Israel di Dabid do Hebron, kan binata da dya a kon da, “Cha kami a katohatohang kan karayaraya mo. 2 Do nakahabas, do ka si Saulo paw no magāri dyamen, imo danaw no nangidaōlo dyirad bōyot no Israel, kan binata ni ĀPO dyimo a kāna, ‘Imonchiw magpaspastor siras tawotawo ko a Israel, kan mayparin kanchi a torayen da.’ ”

3 Dawa, tabo saw panglakayen no Israel, ki nangay sa di Āri Dabid do Hebron, kan namarin si āri so katolāgan na dyira do Hebron do salapen ni ĀPO, as kan pinidi da si Dabid a magāri do Israel.

4 Si Dabid, ki nagtawen so tatdo a poho do nakapagāri na, kan nagāri so apat a poho a katawen. 5 Yapo do Hebron, nagāri dyirad tawotawo a Joda so papito a katawen kan anem a kabohan. As yapo do Jerosalem, nagāri do tabo a Israel kan Joda so tatdo a poho kan tatdo a katawen.

6 Sinpangan na, si āri kan bonggoy na saw a mahahakay, ki nagmarcha sa a nangay do Jerosalem a mangraot siras Jeboseo a omyan do dawri. Binata dan Jeboseo saw di Dabid a kon da, “Makasdep kaba dya polos. Aran siraw bolsek kan piday, ki maparin daymo a penpenen a somdep dya!” Iniktokto da no Jeboseo a makasdep saba sa Dabid. 7 Ki aran komwan, alit na a sinākop ni Dabid kōtaw no Sion a pinangaranan da so syodad ni Dabid.

8 Do dāwri a araw a nakapangdarop da, inbahey ni Dabid dyirad bōyot na saw a kāna, “No aran sino a mangdarop siras Jeboseo saya, ki machita a somonget do kanalaw* 5:8 Nya kanal, ki tiniktikan sa a bato do irahem no tana. no ranom tan romapit do yanan dan bolsekaw kan piday a kabōsor ni Dabid.” Dawa, nawriw nangrogyan da a nakabata a kon da, “Siraw bolsek kan piday, ki makasdep saba do bahay ni ĀPO.”

9 Do nakatayoka no nakapangsākop daw so kōta, minyan si Dabid daw, kan napangaranan so syodad ni Dabid. Pinarahawa naw syodadaw a maypadibon a nangrogi do Millo† 5:9 Iyaw Millo, ki naponan a yanan a naykaykadagchin a pamarahawahan so tana. 1 Kron. 11:8 a maypaypasokel. 10 As naypaypabīleg pa si Dabid, ta myan dya si ĀPO Dyos a Manakabalin.

11 Do dāwri, nanoboy si Āri Hiram do Tiro so pinakainawan na sa di Dabid. Myan inyonot da saw toroso a sidro, siraw karpintīro, kan siraw mayatoy saw, as kan napatnek sa so palasyo a para di Dabid. 12 As si Dabid, ki natonngan na a si ĀPO iyaw no napayparin dya a āri do tabo a Israel, kan pinatohos naw pagāryan na a para dyirad tawotawo na a Israel.

13 Do nakatayoka no nakakaro ni Dabid do Hebron a kominwan do Jerosalem, arwaro paw minabakes kan binaket na. Naypāro saw pōtot na a mababakes kan mahahakay. 14 Siraw nyayaw ngarangaran dan pōtot na saw a mahahakay a naiyanak do Jerosalem: Sammwa, Sobab, Natan, Solomon, 15 Ibhar, Eliswa, Nepeg, Japya, 16 Elisama, Eliyada, kan Elipelet.

17 Do nakadāmag daw no Pilisteo saw a si Dabid, ki napidi a āri no Israel, nangay intīro a bōyot dan Pilisteo a mangchichwas a mangtiliw sya. Ki si Dabid, do nakapakadngey naw so maynamot do dyaya, minosok a nangay do pagkamītanaw a gwardyado. 18 Nawara saw Pilisteo saw kan nagwaras sa do Payahosonganaw no Repaim. 19 Dawa, inyahes ni Dabid di ĀPO a kāna, “Mangay akori a mangdarop siras Pilisteo? Iparawat mo sawri dyaken?”

Tinbay ni ĀPO a kāna, “On, mangay ka, ta syirto a iparawat ko sanchiw Pilisteowaw dyimo.”

20 Dawa, nangay si Dabid do Baal-perasim kan dawriw nangabākan na sira. Binata na a kāna, “Akmas kapaboswang no layos, komwan kapakaknyiknyīn no karārayaw ni ĀPO siras kabōsor ko.” Dawa, napangaranan nawri a yanan so Baal-perasim.‡ 5:20 No chakey na batahen “Baal-perasim,” ki “Si ĀPO a mangpaboswang.” 21 Do nakapayyayo dan Pilisteowaw, tinokos da saw didyosen daw daw, as kan inhap da Dabid kan bōyot na saw.§ 5:21 Dadakay dan nangābak saw mangikaro siras didyosen no kabōsor da a ipaboya da no bīleg no mismo a dyos da. 1 Sam. 5:1-2

22 Sinpangan na, minirwa dana sa somnonget Pilisteo saw, kan nagwaras sa do Payahosongan no Repaim. 23 Dawa, inyahes dana ni Dabid di ĀPO, kan tinbay na a kāna, “Magtaros kaba omdarop sira. Magrikos kamo do dyichodan daw, as kadarop nyo sira do salapen daw no balsam a kayokayo. 24 Apāman a madngey nyo iyaw ōni a akmas magmarcha saw a kokod do tōtok saw no balsam a kayokayo, makalyalisto kamo a domarop. Ta no chakey nanchi a batahen nya, ki manmanma si ĀPO kan inyo a mangdarop so bōyot no Pilisteo.” 25 Do dāwri, pinarin ni Dabid akmas inmandar naw ni ĀPO, kan diniman na saw Pilisteo saw a yapo do Gibeon a nanda do Geser.