1 Do nakadāmagaw ni Is-boset a pōtot ni Saulo a nadiman si Abner do Hebron, nabwanan dana so katored, as taywara a nariribokan tabo tawotawo a Israel. 2 Iyaw nya pōtot ni Saulo, ki myan dadwa opisyal na a mangidaōlo siras bonggoy a mangraot. No ngaran asaw, ki si Baanah. Iyaw asaw, ki si Rekab. Sira, ki pōtot ni Rimmon a yapo do Beerot do trībo no Benhamin. (Beerot, ki naibidang a partis no tana no Benhamin, 3 ta siraw tawotawo no Beerot, ki pinayyayowan daw idi a Gittaim kan minyan sa a gan-ganaet a mandas changori.)

4 Si Jonatan a pōtot ni Saulo, ki myan pōtot na a napidayan maybīt a kokod na. Nagtawen iya so dadima do nakapakarapit no dāmag a yapo do Jesreel a maynamot do nakadiman da Saulo kan Jonatan. Do nakadāmagaw no manalobalaw sya, binaba na kan inpayyayo naw adekeyaw. Ki do nakapagal-alisto naw, naryan naw adekeyaw a nasday kan napidayan. No ngaran na, ki si Mepiboset.

5 Asa karaw, sa Rekab kan Baanah a pōtot ni Rimmon a Beerotita, ki minohbot sa a mangay do bahayaw ni Is-boset. Do nakawara daw daw, mayegen danaw araw kan myan si Is-boset a maynaynahah do dāwri. 6 No mabakesaw a magbanbantay so pantaw, ki nakaycheh, ta nadoho do kayan na a maytahep. Dawa, sililimed sa Rekab kan Baanah a somindep a nangay do mamanyitwaw a partis no bahayaw.

7 Do nakasdep daranaw, naboya da si Is-boset a myan a maypoktad do katri naw. Binagkong da kan diniman da, as kan nakapotoh da so oho naw. Do dāwri, inahap daw oho naw, as nakapayyayo darana a naychararakan do ayaman no Araba. 8 Inyangay daw oho naw ni Is-boset di Dabid do Hebron. Binata da do āryaw a kon da, “Chaya dyaw oho naw ni Is-boset a pōtot ni Saulo a kabōsor mo a makey a mangdiman dyimo. Changori a araw, ki intoroh ni ĀPO dyimo mo āpo a āri ko iyaw kapamahes mo di Saulo kan dyirad kapotōtan na.”

9 Inatbay ni Dabid sa Rekab kan Baanah a pōtot ni Rimmon a Beerotita a kāna, “Ta akmas kasigorādo no kasibibyay ni ĀPO a nangisalākan dyaken do tabo riribok, 10 do kayanaw no nangibaheyaw dyaken a kāna, ‘Si Saulo, ki nadiman dana,’ kan iniktokto na a mangyangay so maganay a dāmag, inpatiliw ko kan inpadiman ko iya do Siklag. Iyaw nawriw pinakagon-gona na do nakaiyangay naw dyaken so nawri a dāmag! 11 Dyori a ad-adda dana an siraw marahet a tawo, ki nangdiman so abos gatos a tawo do mismo a bahay na do yanan katri naw? Rebbeng ko abawri a singiren dyinyo raya naw do kakamay nyo, as kan opasen koynyo do tanaya?”

12 Dawa, inmandar ni Dabid dyirad mahahakay na saw, kan diniman da sa. Inakteb da saw kakamay kan kokod da, as kan nakailōdyit da siras bangkay daw do payisaw no līnaw do Hebron. Ki inahap daw oho naw ni Is-boset, kan intābon da do aschipaw a tanem ni Abner do Hebron.