1 Do chadadwa naw a poho kan papito a katawen no kapagāri ni Jeroboam a āri no Israel, si Asaryas a pōtot ni Amasyas, ki nayparin a āri no Joda. 2 Nagtawen si Asaryas so asa poho kan anem do nakapagāri na, kan nagāri so dadima poho kan dadwa a katawen do Jerosalem. No ngaran no ānang na, ki si Jekolyas a taga Jerosalem.* 15:2 2 Kron. 26:3-4 3 Pinarin naw kosto do kapanyideb ni ĀPO a akmas pinarinaw ni āmang na a si Amasyas. 4 Aran komwan, siraw logar saw a pagdaydayāwan, ki napakaro saba. As siraw tawotawowaw, ki tinongtong daw mangidāton so dāton kan naysosoh so insinso do dawri.

5 Pinagliproso ni ĀPO si Āri Asaryas, kan nāw na a nandad arawaw a nakadiman na. Minyan do matarek a bahay a maychatanyi.† 15:5 Leb. 13:46 Si Jotam a pōtot no āryaw, ki iyaw manyidechideb so palasyowaw kan nangitoray siras tawotawowaw do dawri a tana.

6 Siraw kadwan saw a napariparin do nakapagāri ni Asaryas, kan tabo a pinaripinarin na, ki naitolas sabawri do librowaw no pakasaritāan dan ar-āri no Joda? 7 Nachipaynahah si Asaryas dyirad aāmang naw, kan naitābon a nachirapa dyira do syodadaw ni Dabid. Si Jotam a pōtot na, ki nachitādi dya a āri.

8 Do chatatdo naw a poho kan wawaho a katawen no kapagāri ni Āri Asaryas do Joda, si Sakaryas‡ 15:8 No nyaya a Āri Sakaryas, ki matarek kan iyaw propīta no Dyos a si propīta Sakaryas. a pōtot ni Jeroboam, ki nayparin a āri no Israel, as kan nagāri so anem a kabohan do Samarya. 9 Pinarin naw marahet do kapanyideb ni ĀPO a akmas pinarin dan aāmang na. Tinadyichokodan nabaw gatogatos ni Jeroboam a pōtot ni Nebat a nawriw napawnot siras tawotawo no Israel a naygatos.

10 Si Sallom a pōtot ni Jabes, ki nagpangta so maikontra di Sakaryas. Kinelbat na a diniman si Sakaryas do idi a Ibleam,§ 15:10 “Do idi a Ibleam” mana “do salapen dan tawotawo”. as kan nachitādi dya a āri. 11 Siraw kadwan saw a napariparin do nakapagāri ni Sakaryas, ki naitolas sa do librowaw no pakasaritāan dan ar-āri da no Israel. 12 Dawa, natongpal no inchirin ni ĀPO di Jeho a kāna, “Siraw kapotōtan mo, ki maydisna sanchi do trono no Israel a manda do chapat na a kapotōtan.”* 15:12 No āri sa do apat a kapotōtan a somarono di Āri Jeho, ki sa Jehoahas, Jehoas, Jeroboam, kan Sakaryas. 2 Ār. 10:30

13 Si Sallom a pōtot ni Jabes, ki nayparin a āri no Israel do chatatdo naw a poho kan sasyam a katawen no kapagāri ni Ossias† 15:13 Si Ossias, ki mayngaran pa si Asaryas. a āri no Joda, kan nagāri do Samarya so asa kabohan. 14 Sinpangan na, si Menahem a pōtot ni Gadi, ki komnaro do Tirsa a nangay do Samarya. Kinelbat na si Sallom a pōtot ni Jabes do Samarya, kan diniman na, as kan nachitādi dya a āri.

15 Siraw kadwan saw a napariparin do nakapagāri ni Sallom kan iyaw nakapagpangta naw, ki naitolas sa do librowaw no pakasaritāan dan ar-āri do Israel.

16 Sinpangan na, nakayapo do Tirsa, nangay si Menahem, kan hinanyib na a rinārayaw syodad a Tipsah. Pinarin naw nya maynamot ta chinaskeh da iniwangan rowangan saw. Diniman naw tabo minyan daw kan tabo a minyan do omdibonaw. As binochakan na pa iniwangan bodek dan tabo mabōgi saw a mababakes.

17 Do chatatdo naw a poho kan sasyam a katawen no kapagāri ni Asaryas a āri no Joda, si Menahem a pōtot ni Gadi, ki nayparin a āri no Israel. Nagāri do Samarya so asa poho a katawen. 18 Pinarin naw marahet do kapanyideb ni ĀPO. Do ōnos no nakapagāri na, tinadyichokodan na sabaw gatogatos ni Jeroboam a pōtot ni Nebat a nawriw napawnot siras tawotawo no Israel a naygatos.

19 Sinpangan na, si Pol‡ 15:19 No oyod a ngaran na, ki si Tiglat-pileser. 2 Ār. 15:29 a āri no Assirya, ki nangay a domnarop do tana a Israel. Tinorohan ni Menahem iya so tatdo a poho kan wawaho a katonilada no pirak tan ahwahoken na si Pol, kan tan somidong si Pol di Menaham a payiten naw bōkod naw a pagāryan. 20 No nakapanghap ni Menahem so pirak, ki yapo do kapagpabwis na siras tawotawo no Israel. Kāda mabigbigbig a mabaknang a mahakay, ki machita a magor-or so singkwinta a kapidāso a pirak a maitoroh do āri no Assirya. Dawa, do dāwri, somnabat danaw āryaw no Assirya kan nabidin paba do tana a Israel.

21 Siraw kadwan saw a napariparin do nakapagāri ni Menahem kan tabo a pinaripinarin na, ki naitolas sabawri do librowaw no pakasaritāan dan ar-āri no Israel? 22 Nachipaynahah si Menahem dyirad aāmang na. Si Pekayas a pōtot na, ki nachitādi dya a āri.

23 Do chadadima poho naw a katawen no kapagāri ni Asaryas do Joda, si Pekayas a pōtot ni Menahem, ki nayparin a āri no Israel do Samarya. Nagāri so dadwa a katawen. 24 Pinarin naw marahet do kapanyideb ni ĀPO. Tinadyichokodan na sabaw gatogatos ni Jeroboam a pōtot ni Nebat a nawriw napawnot siras tawotawo no Israel a naygatos. 25 Sinpangan na, iyaw opisyalaw no bōyot na a si Peka a pōtot ni Remalyas kontodo singkwinta saw a rārayay na a taga Gilead, ki nagpangta sa so maikontra dya. Diniman na si Pekayas a magrāman sa Argob kan Aryes do nakotāanaw a yanan do irahem no palasyowaw do Samarya. On, diniman ni Peka si Pekayas, kan nachitādi dya a āri.

26 Siraw kadwan saw a napariparin do nakapagāri ni Pekayas kan tabo pinarin na, ki naitolas sa do librowaw no pakasaritāan dan ar-āri do Israel.

27 Do chadadima poho naw kan dadwa a katawen no kapagāri ni Asaryas do Joda, si Peka a pōtot ni Remalyas, ki nayparin a āri no Israel do Samarya. Nagāri so dadwa poho a katawen. 28 Pinarin naw marahet do kapanyideb ni ĀPO. Tinadyichokodan na sabaw gatogatos ni Jeroboam a pōtot ni Nebat a nawriw napawnot siras tawotawo no Israel a naygatos.

29 Do chimpo ni Peka a āri no Israel, si Tiglat-pileser§ 15:29 No birngas na, ki si Pol. 2 Ār. 15:19 a āri no Assirya, ki nangay kan inhap naw idiidi a Idyon, Abel-bet, Maakah, Janoa, Kede, kan Hasor. Sinākop na paw tana a Gilead kan Galilya a magrāman tabo tana no Naptali. Inkaro na saw tawotawo a sibabahod a inikwan do Assirya. 30 As do dāwri, nagpangta si Hosea a pōtot ni Ela so maikontra di Peka a pōtot ni Remalyas. Kinelbat na kan diniman na, as kan iyaw nachitādi dya a āri do chadadwa poho a katawen no kapagāri ni Jotam* 15:30 Chapatak taba āngo ta komwan kapamidang da, ta sigon do 2 Ār. 15:33 kan 2 Kron. 27:1, nagāri lang si Jotam so asa poho kan anem a katawen. a pōtot ni Ossias.

31 Siraw kadwan saw a napariparin do nakapagāri ni Peka kan tabo a pinaripinarin na, ki naitolas sabawri do librowaw no pakasaritāan dan ar-āri no Israel.

32 Do chadadwa a katawen no kapagāri ni Peka a pōtot ni Remalyas a āri no Israel, si Jotam a pōtot ni Ossias a si Asaryas, ki nayparin a āri no Joda. 33 Nagtawen so dadwa poho kan dadima do nakapagāri na, kan nagāri so asa poho kan anem a katawen do Jerosalem. No ngaran ānang na, ki si Jerosa a pōtot a mabakes ni Sadok. 34 Pinarin naw kosto do kapanyideb ni ĀPO a akmas pinarin āmang na a si Ossias. 35 Aran komwan siraw logar saw a pagdaydayāwan, ki napakaro saba. As siraw tawotawowaw, ki tinongtong daw mangidāton so dāton kan naysosoh so insinso do dawri. Pinatnek a mirwa ni Jotam mamanyitwaw a rowangan no timplo ni ĀPO.

36 Siraw kadwanaw a napariparin do nakapagāri ni Jotam kan tabo a pinaripinarin na, ki naitolas sabawri do librowaw no pakasaritāan dan ar-āri no Joda? 37 (Do dāwri sa araw, inrogi ni ĀPO nanoboy si Resin a āri no Aram kan si Peka a pōtot ni Remalyas so maikontra do Joda.) 38 Nachipaynahah si Jotam dyirad aāmang naw, kan naitābon a nachirapa dyira do syodad ni Dabid a syodad ni āmang na. Si Ahas a pōtot na, ki nachitādi dya a āri.