1 Do chadadwa naw a katawen no kapagāri ni Jehoas a āri no Israel a pōtot ni Jehoahas, si Amasyas a pōtot ni Joas, ki nayparin a āri no Joda. 2 Magtawen iya so dadwa poho kan dadima do nakapayparin na āri, kan nagāri do Jerosalem so dadwa poho kan sasyam a katawen. No ngaran ānang na, ki si Jehoaddin a taga Jerosalem. 3 Pinarin naw kosto do kapanyideb ni ĀPO, ki akmaba so pinarin naw no kapoonan na a si Dabid. Do tābo, ki inonotan na saw pinarinaw ni āmang na a si Joas. 4 Aran komwan, siraw logar saw a pagdaydayāwan, ki napakaro saba. Tinongtong dan tawotawo nangidāton so dāton kan naysosoh so insinso da daw.

5 Do nakapinsan danaw no kapagāri ni Amasyas, diniman na saw opisyal saw a nangdiman si āmang na a āri.* 14:5 Siraw opisyalis, ki sa Josabab kan Jehosabad. 2 Ār. 12:20-21 6 Aran komwan, diniman na sabaw pōtot saw no nangdiman saw. Ta pinarin naw sigon do naitolas do libro no Linteg ni Moyses a dawriw nangibilinan ni ĀPO a “Maipadiman sabaw inyapwan maynamot do gatos a pinarin anak da. As maipadiman sabaw anak maynamot do gatos a pinarin inyapwan. Kāda asa, ki madiman a maynamot do bōkod na a gatos.”† 14:6 Deot. 24:16

7 Nangdiman si Amasyas so asa poho a rībo a Edomita a soldādo do Payahosongan no Asin.‡ 14:7 2 Sam. 8:13 Sinākop na paw syodad a Sela§ 14:7 Sela, ki sintro no Edom. No chakey na batahen do chirin a Hebreo, ki “bato”. do gobat, kan tinādyan naw ngaran na do Jokteel. Iyaw nyaya ngaran, ki ari pa sichangori a araw.

8 As sinpangan na, nanoboy so nangay sa di āri no Israel a si Jehoas a pōtot ni Jehoashas a pōtot a mahakay ni Jeho. Kinarit na a kāna, “Mangay ka, ta maysalap ta do gobat.”

9 Ki inpaw-it ni Jehoas a āri no Israel atbay naw di Amasyas a āri no Joda, “Myan asa manolok a tamek do Lebanon a inpaw-it naw minsāhi do sidro a kayo do Lebanon a kāna, ‘Itoroh mo mabakesaya anak mo do pōtot kwaya a mahakay tan kabahayen na.’ Sinpangan na, myan bolaw a animal do Lebanon a homnabas, kan linasalasagan naw manolokaw a tamek. 10 Oyod a inābak mo saw Edomita, kan mapangas kas changori. Mapnek ka na pakono do nakapangābak mo, ki nāw mo na pakono do bahay mo! Āngo ta mangyokay ka so riribok, kan nawriw pakayapwan anchi no pakarārayawan mo kan do tawotawo no Joda?”

11 Ki inkaskāso naba ni Amasyas. Dawa, somnonget si Jehoas a āri no Israel kontodo dyirad bōyot naw, kan naysalap sa kan Amasyas a āri no Joda do Bet-semes do Joda. 12 No bōyot no Joda, ki naābak sa do bōyot no Israel, kan naychapayyapayyayo saw kāda soldādo a kominwan do bahabahay da. 13 As si Amasyas a āri no Joda a pōtot ni Joas a pōtot ni Ahasyas, ki tininiliw ni Jehoas do Bet-semes. Do dāwri, nangay si Jehoas do Jerosalem, kan rinakrak naw dadwa gasot a kamitro a ahad no Jerosalem a yapo do Rowangan no Epraim a mandad Rowanganaw a Sōli. 14 Inkaro na tabo balitok kan pirak kan tabo warawara a myan do irahem naw no timplowaw ni ĀPO kan tabo warawaraw do pangapyan saw do palasyo. Inkaro na pa sa a sibabahod tawotawowaw, kan somnabat do Samarya.

15 Siraw kadwan saw a napariparin do nakapagāri ni Jehoas, no pinariparin naw kan napatayoka na saw, nagrāman nakapachigobat naw di Amasyas a āri no Joda, ki naitolas sabawri do librowaw no pakasaritāan dan ar-āri no Israel? 16 Nachipaynahah si Jehoas dyirad aāmang naw, kan naitābon do Samarya dyirad ar-āryaw no Israel. Si Jeroboam a pōtot na, ki nachitādi dya a āri.

17 Nabyay pa si Amasyas a pōtot ni Joas a āri no Joda so asa poho kan dadima a katawen do nakatayokaw no nakadiman ni Jehoas a pōtot ni Jehoahas a āri no Israel. 18 Siraw kadwan saw a napariparin do nakapagāri ni Amasyas, ki naitolas sabawri do librowaw no pakasaritāan dan ar-āri no Joda? 19 Myan saw nagpangta so maikontra di Amasyas do Jerosalem. Dawa, nayyayo si Amasyas a kominwan do syodad a Lachis. Ki myan saw nanglakat sya, kan diniman da daw. 20 Pinanaybi da a pinasakay do kabalyo, kan naitābon do Jerosalem dyirad aāmang naw do syodad ni Dabid. 21 As do dāwri, tabo da no tawotawowaw no Joda, ki pinatnek da si Asaryas* 14:21 Si Asaryas, ki mayngaran pa si Ossias. a nagtawen so asa poho kan anem, kan pinayparin da a āri a nachitādi di āmang na a Amasyas. 22 Si Asaryas, ki iyaw minirwa a nangpatnek so idi a Elat† 14:22 1 Ār. 9:26 kan napaybidi do Joda do nakatayoka no nakadiman ni āmang na.‡ 14:22 2 Kron. 26:1-4

23 Do chaasa poho naw kan dadima a katawen no kapagāri ni Amasyas a āri do Joda a pōtot ni Joas, si Jeroboam a pōtot ni Jehoas, ki nayparin a āri no Israel do Samarya, kan nagāri so apat a poho kan asa a katawen. 24 Pinarin naw marahet do kapanyideb ni ĀPO, kan tinadyichokodan nabaw tabo a gatos ni Jeroboam a pōtot ni Nebat a nawriw napawnot siras tawotawowaw no Israel a naygatos. 25 Iyaw napaybidi so paypandanaw no Israel a yapo do Lebo-hamat§ 14:25 Nya paypandanaw no Israel do ammyānan do chimpo ni Āri Solomon. 1 Ār. 8:65 do ammyānan a komwan do Kanayan no Araba do abagātan. Nya, ki sigon do chirinaw ni ĀPO a Dyos no Israel a naichirin do pachirawatan na a si Jonas a pōtot ni Amittay a propīta a yapo do Gat-heper.* 14:25 Jon. 1:1

26 Naboya ni ĀPO iyaw taywara a kalidyat dan tawotawo no Israel a aran siwayawaya mana adīpen. Abaw aran asa somidong dyira. 27 Ki abaw binata ni ĀPO a hanyiben na a ponasen ngaran no Israel. Dawa, inpaisalākan na sa do kakamay ni Jeroboam a pōtot ni Jehoas.

28 Siraw kadwan saw a napariparin do nakapagāri ni Jeroboam, tabo a pinaripinarin na, no matored saw a kaparin na dyirad gobgobat, kan an maypāngo nakapaybidi na para do Israel so Damasko kan Hamat a dyinira no Joda, ki naitolas sabawri do librowaw no pakasaritāan dan ar-āri no Israel? 29 Nachipaynahah si Jeroboam dyirad aāmang na a ar-āri no Israel. Si Sakaryas a pōtot na, ki nachitādi dya a āri.