1 मावोर विस्वसिरिर! इव सबे पोल्‍लोन वेहचि, इद उंद पोल्‍लो इह्‌नन: मीट सामिना देय्वाते गिर्दा आसोर मन्ह्‌टु. मुने वेहतव पोल्‍लोन ओसो वेहतलाहि नाक कयर वावो, मीट विस्वसताह इळ्न अरयनद आयो इनजोर वेहतह्‌नन.

2 देवुळता मुनेह सेतेमतोर आयलाह डायना रिवज* 3:2 “डायना रिवज” इद पोल्‍लोता अर्तम पुनदना इतेके बाय्बलता आक्रि “पुनवव पोल्‍लोना अर्तमि” मन्ह्‌ता, इदिन अर्वाटु. कीम्ह्‌टु इनजोर मीक विस्वसिरिन काग़्हवालोर वातोर. उसरते मन्ह्‌टु! ओर पोटागंजिर कतमे लाग्वाङ कबस्क केवालोर आंदुर. 3 ओर मन्कलोर डायना रिवज कीयनद पोल्‍लो वेहतलाह आतोर. मति माट येसुन विस्वस कीतोरले निटम डायना रिवज कीतोरल आंदल, ओर आयोर. बाराह्‌क इतेके, माट देवुळता जीवा वेहतपु तान मोळ्किह्‌नल. ओसो किर्स्तु येसु माक पका बेरा गूनम तोहतोग़ इनजोर गिर्दा आय्ह्‌नल. ओसो मावा मन्कना बुदतगा बर्वस तासवा, तान डायिस पोहतप लेह्‌का पिसिह्‌नल. 4 मन्कना बुदता पोग़ोन बर्वस तासना इतेके नना पका तासेनन. आपुनाङ कबस्कनगा बर्वस तासिस बोग़ाय पोंगसोर तिरियतेके, नना ओन्काय पका पोंगसोर तिरियेनन. 5  मोसानाङ अडोन तपवालेवा नोमवालोर परुसिरा† 3:5 “परुसिर” इद पोल्‍लोतुन पुनदना इतेके बाय्बलता आक्रिते मनदनद “पुनवव पोल्‍लोना अर्तमि” मन्ह्‌ता, इदिन अर्वाटु. तुंगातोनन आंदन. नना पुटिस वारममेंड आतापया, अवे अडोङ वेहतपु, नावा डायना रिवज कीतोर. नना इस्रयेल जाततोनन, बिन्यामिनना कूळतोनन आंदन, नावाङ तादोर-बाबोर कतमतोर इस्रयेल जाततोरे. 6 अडोङ नोमलाहि नना इचोन जिदतोनन आंदन इतेके, विस्वसिरा मुडुन तिपल कीसोर मतन. बोर अडोङ नोमिसि सेतेमतोर आयलाह ऊळिंदुर, ओर नावा बेदे तप तोहता पग़वोर.

7 इव सबे पोल्‍लोन नना मुने पका पाय्दाताङ इनजोर इन्दन, मति इंजेके किर्स्तुन पुताह्‌कु इव सबे नुस्कनताङे इनजोर नना पुतन. 8 अचोने आयो मति, नावा सामि येसु किर्स्तुन पुनदनदे मोदुल पोल्‍लो आंदु. तान्काय एक्‍वा पाय्दाता पोल्‍लो बेदे इले. निटम ओनेनाह्‌क सबे पोल्‍लोन दुरा इह्‌नन, किर्स्तुने दोर्किह कीयलाहि नना इद्रम इह्‌नन. 9 ओना संगे जोळेम आस मनदलाहि, नना अव पोल्‍लोन वियेग़ इनजोर नेहचीतन. मोसानाङ अडोन नोमिस देवुळता मुनेह नना सेतेमतोग़ आयलाह ऊळोन, मति नना किर्स्तुन विस्वस कीताह्‌के, देवुळि नाक सेतेमतोग़ इता. 10-11 सेतेमता अग़ि बेद इतेके किर्स्तुन पुनदना; बेद लावते किर्स्तुन देवुळि जीवा अर्हता, अद लावतुन पुनदना; ओग़ तिपल आतप लेह्‌कान ननावने तिपल आसि ओना तिपलतगा कलियना; बह आयि देवुळि नाक जीवा अर्हचीयि इनजोर किर्स्तु डोलतोग़ अद्रमलेह्‌का नावा मन्कना बुद डोलिस मनदना; इव पोल्‍लोना पोग़ोन नावा विचर मन्ह्‌ता. अदिनेनाह्‌क बेव पोल्‍लोन मुने पका पाय्दाताङ इन्दन, अविस्किन इंजेके विळ्सलाह आतन.

12 पोग़ोन बेव पोल्‍लोन रासतन, अव नावा मनमुळतगा पूरा आताङ इनजोर वेहोन. अगा एवतन इनजोर इनोन, मति बेगा एवसिह कीयलाह किर्स्तु नाक पोयतोग़, अगा एवयलाह नना वितलाह आतन. 13 मावोर विस्वसिरिर! अगा नना एवतन इनजोर इनोन, मति इद कबळ कीय्ह्‌नन: पेग़्के अरतव पोल्‍लोन सीता केवा, नावा मुनेह मनदनद सीनातगा एवयलाहि वितलाह आतन. 14 सीनातगा एववालोरिह्‌क देवुळि बेद इनम ईकन इनजोर केयिह्‌ता, अद इनमतुन किर्स्तु येसुना मेटे दोर्किह कीयलाह नना वितलाह आतन.

15 माट देवुळतुन बेस पुतोरल इदे विचरते मनदकल. ओसो बेदाय पोल्‍लोते मीवा दुस्रा विचर मतेके, ताना लोप्पा वने देवुळि मीक सेतेम तोहतग़ा. 16 तेला मति, मीट देवुळता लोप्पा इचानाह बेव पोल्‍लोन पुतिर, अव पोल्‍लोन पोसि मीट ताकसोर मन्ह्‌टु.

17 मावोर विस्वसिरिर! बेद्रम ताकना इनजोर माट मीक तोहचीतोम. मीट सबेटोरिर नाक ऊळिसि उंदिय विचरते नावा लेह्‌कान ताकाटु. ओसो मावा लेह्‌का ताकवालोरिन बेस-नेह्‌ना ऊळिसि, ओरा लेह्‌काने कीम्ह्‌टु. 18 नना इद्रम बाराह्‌क इह्‌नन इतेके, किर्स्तु हव्कनागुटातगा डोलतद पोल्‍लोतुन वेल्‍लाटोर मन्कलोर पास्कसोर ताकिह्‌तोर. ओरा पोल्‍लोतुन नना अमेसा मीक वेहचोर मतन. इंजेकवने अळसोर-अळसोर वेहतलाह आतन. 19 ओर दायनद अग़ि बूळेम आयनेके ओस ईस्ता. ओर तमा पोटातेनाह्‌क लालुस्क कीसोर ताकिह्‌तोर. तमाङ करबताङ विचर्कने पोंगसोर तिरियिह्‌तोर. ओर दुनियाताङ पोल्‍लोनगाने सीता कीसोर मन्ह्‌तोर. 20 मति माट बार इद दुनियाता लोकुरल आयवल, माट पोग़ोटा देवुळदीपता लोकुरल आंदल. अग्डाहिये माक पिसिह केवाल येसुसामि किर्स्तु वायनोग़ इनजोर, ओना अग़ ऊळसोर मह्‌नल. 21 सबेटविन ताकिह कीयलाहि ओनगान लाव मन्ह्‌ता. अद लावते मावा मेंदुलतुन बद्ले कीसीयनोग़. इतेके इद कळियनद मावा मेंदुलतुन तना बेस्केन बूळेम आयवद मेंदुलता लेह्‌कान पूरा बद्ले कीसीयनोग़.