2
ओर्विन-ओर्वोग़ बेस ऊळना
1-2 मीट इंजेके किर्स्तुना संगे जोळेम आताह्कु, मीक दीरा वास्ता. देवुळि मीक जीवा कीसि मीवा जीवातुह्क सितुर ईयलाह आता. ओसो मीक तना जीवा ईसि मियगा जागा आता. अह कीसि मीकु तना दया कीयनद, जीवा कीयनद बुदि ईता. इव सबे पोल्लोङ निटम आताह्कु, मीवाङ विचर्क अमेसा ओर्विह्क-ओर्वोना संगे कलियिस मनिङ. देवुळि मीक जीवा कीतपु, मीट वने ओर्विह्क-ओर्वोग़ जीवा कीम्ह्टु. मीट सबेटोरिर उंदिय एकाते मनजि, देवुळता अग़दे ऐंगेन ताकाटु. अह ताकतिर इतेके नावा गिर्दा पूरा आयग़ा. 3 मियग्डाहि बोग़े तना कुदता कदर पर्ह्कमाकेग़, अहे उगसताङ पोमाडेङ केमाकेग़. मति कुदि उड्ला बुदतोग़ आसि, दुस्रोरिन आपुह्काय वीळिसि कदरतोरा लेह्काने ऊळना. 4 सिरप आपुनाय पाय्दातेनाह्क बोग़े बाताले केमाकेग़, मति दुस्रोरा पाय्दातेनाह्क वने ऊळेग़. 5 बेद्रम येसु किर्स्तुना बुद मता, अद्रमे मीवा वने बुद मनि.
6 ओग़ पूरा देवुळिय मतोग़.
अद्रम मनजि तेला “देवुळता बराबरतोनन” इनजोर
अद अदिकरतुन पोस मनोग़.
7 मति ओग़ अद अदिकरतुन पूरा विळ्सतोग़,
विळ्सिसि साकुर केवाना लेह्का आतोग़.
आसि मन्कल मारियिस इद बूमतगा वातोग़.
8 मन्कल आसि ओग़ इचोन उड्ला बुदतोग़ आतोग़ इतेके,
देवुळबाबाना पोल्लोतुन केंजिसि तना जीवा वने ईतोग़.
हव्कनागुटाता हामुर ओसोय लजाता मन्ज तेला* 2:8 हव्कनागुटातगा वेळ्हतोग़ मन्कन लोकुर उस्किंदुर-पास्किंदुर, ओसो सबेटोर ऊळनाह ओन कूळल कीसि वेळ्हंदुर., अदिन वने ओग़ तना पोग़ोन एतोग़.
9 अदिनेनाह्क देवुळि ओन सबेटोरिह्क बेरोग़ कीता,
ओसो सबे पेदिर्किह्काय ओनाय पेदिरतुन बेरा कीता.
10 देवुळदीपते मनवालोर, हानादीपते मनवालोर,
इद बूमते मनवालोर सबेटोर येसुन दंडुम अरयिर.
11 अहे सबेटोराङ वेंजेह्कु, “येसु किर्स्तुये सामि आंदोग़” इनजोर कबुल आसि,
देवुळबाबाह्क मान ईयिर इनजोर देवुळि येसुन इद्रम कीता.
इद बूमतगा वेह्चता लेह्का मीट दींचाट
12 अदिनेनाह्क गोततोरिर, मीक वेहतलाह आतन: नना मियगा मतन अस्के, बेद्रम मीट नना काग़्हतव पोल्लोन केंजिस ताकतिर, अद्रमलेह्का इंजेकवने नना मियग्डाहि जेक मनदह्पा, इंका ओसो जिदते मीट अव पोल्लोन केंजिसि ताकाटु. बेद पिसमुळता अग़दे देवुळि मीक ताकिह कीयलाह आता, अदे अग़दे मीट तान रेयिसि उड्ला बुदते ताकसोर मन्ह्टु. 13 बाराह्क इतेके देवुळिये इद्रम ताकलाह मियगा विचर्क पुटिह कीस्ता, ओसो तान्क विचर वायनव कबस्क कीयलाह तोळ वने ईस्ता.
14 बाताल कीतेक तेला मुयोग़ आयवा, गिटोगटो आयवा कीसोर मन्ह्टु. 15 अस्के मीट कसुरलेवोरिर, लाग्वदिन पुनवोरिर देवुळता पेकोरिर दिसकिर. तेल्वेरा ओसो करब बुदतोर मन्कलोरा नडुम मनजि पोग़ोटाङ उकाना लेह्का ईकळते मांजवालोरिर दिसकिर. 16 मीट देवुळता पिसमुळ ईयनद पोल्लोतुन पोस विळ्समाटु. अद्रम मीट मतेके, नना मियगा पूरा दोगनाह कह्टेम कीतद उगसिन अनो इनजोर, किर्स्तु वायनद दिया वेहता पग़यकन; वेर मावोर बेसतोर विस्वसिर इनजोर मीवा लोप्पा इनदा पग़यकन. 17 बूमयालोर देवुळतुह्क जन्वरता पूरा मोक ईतप लेह्का, मीट अगा पिलिपि सहरते मीवा विस्वसतेनाह्कु तिपल आसोरेन मह्निर, अद्रम मीट देवुळतुन माळिह्निर. नाक इगा रोम सहरते हव्कतेक वने नावा नेतुर मीवा मोकतगा वळ्पतप आयग़ा. अदिह्क नना बेस गिर्दा आयकन. इंगो! मीवा संगे बेस गिर्दा आयकन. 18 अद्रम मीटवने बेस गिर्दा आम्ह्टु. नावा संगे बेस गिर्दा आम्ह्टु.
तिमोति ओसो इपपुरुदितुस, वेर बेसतोर सेवकिर आंदुर
19 येसुसामिना विचर मतेके, नना नावा तोळतोग़ तिमोतिन मियगा चट्पिटे लोहतकन इनजोर आसा कीयलाह आतन. ओग़ मल्स नयेके वायनोग़ अस्के मियग्डा कबुरतुन केंजिसि निटमे नावा जीवातुह्क सितुर आयग़ा. 20 नावा लेह्कान मीक निटम आलिह केवाल, ओन विळ्सिसि इगा बोग़े इलेग़. मीट बेस मह्निरो, इलविरो इनजोर ओग़ इगा अमेसा आलिह कीसोर मन्ह्तोग़. 21 दुस्रोर आपुनाङ-आपुनाङ विचर्कने ताकिह्तोर, किर्स्तुना विचर बाताल मन्ह्ता, तान बोरे सीता केवोर. 22 मति तिमोति अद्रमतोग़ आयोग़. ओग़ सेतेम बुदतोग़ आंदोग़, इदिन मीट इतेके पुतिरे. मग़ि तपेना सेवा कीतप लेह्का, किर्स्तुना बेसता कबुरतुन पोकुर कीयलाह नावा संगे कबळ कीतोग़. 23 जेलताहि नाक विळ्सनुरा, विळ्सोरा, इद पोल्लो एर्का आतस्के, ओन नना मियगा लोहचीकन इनजोर विचर कीयलाह आतन. 24 मति सामि नाक वने चट्पिटे मियगा ततनोग़ इनजोर, सामिना पोग़ोन नना आसा तासतन.
25 तिमोति मियेके पया वायनोग़ निटमे, मति इंजेके मावा तोळतोग़ विस्वसि मियग्डोग़ इपपुरुदितुसिन मियगा मल्हच लोहतलाह विचर कीयलाह आतन. ओग़ बेसता कबुर वेहतलाह नावा संगे तोळ आंदोग़, ओसो अद कबुरतेनाह्क नावा संगे लळेम आयवाल वने आंदोग़. नावा साय्ता कीयलाह मीट ओन लोहच मतिर. 26 मति ओग़ मीक ऊळलाह पका आलिह कींदोग़. ओग़ बेमरते मतदिन मीट केंजतिर, केंजिसि मीट पका आलिह कीय्ह्निर इनजोर ओन्क एर्का आतस्के, ओना जीवा चुहेम आयो. 27 ओग़ निटम इचोन बेमरते मतोग़ इतेके पूरा डोलनाह आस मतोग़, मति देवुळि ओना पोग़ोन दया कीताह्कु सव्रेम आतोग़. ओग़ सव्रेम बार आयवा मतेके, जेलते मनदनद नावा दुकमता पोग़ोन इद ओसो दुकम अरस मनालि. मति अद्रम आयवा, देवुळि नावा पोग़ोन वने दया कीता. 28 अदिह्क ओन मियगा चट्पिट लोहतलाह विचर कीयलाह आतन. ओन ऊळकिर अस्के मीक बेस गिर्दा आयग़ा; ओसो नावा जीवातुह्क वने सितुर आयग़ा. 29-30 बेद सेवातुन जेकताहि मीट नयेनाह्क कीया पग़विर, अद सेवातुन ओग़ इगा वासि नयेनाह्क कीसीतोग़. अद सेवा कीनेके, ओना जीवा दोकाते अरस मता, किर्स्तुना कबळतेनाह्क डोलसोर मतोग़. अदिनेनाह्क ओग़ मियगा वायनोग़ अस्के, सामिना सेवक इनजोर ओन मीटु बेस गिर्दाते कलियाटु. ओना लेह्का सेवा केवालोरिह्क बेस कदर ईम्ह्टु.
*2:8 2:8 हव्कनागुटातगा वेळ्हतोग़ मन्कन लोकुर उस्किंदुर-पास्किंदुर, ओसो सबेटोर ऊळनाह ओन कूळल कीसि वेळ्हंदुर.