16
Yesus do muri wari!
(Mateo 28:1-8; Luka 24:1-12; Johani 20:1-10)
1 Bèli rai, hari èna, lodꞌo hebꞌajꞌa do Jahudi. Ta èla pejèna lodꞌo, ta pekèdꞌèike Maria ti rae Magdala, Maria do wala (do ina ri Jꞌako), nga Salome, la wèli èi loko wumèngi, do ta èbe roo bèli rai, la pihe ngiꞌu Yesus, pedutu hadꞌa Jahudi. 2 Rai jꞌami ae lodꞌo Migu, ta pekèdꞌèike roo tèlu la rai dare Yesus. 3-4 Pa telora rujꞌara, ta pedai ke roo, mihe ane, “Weh! Naduu ke do ta ami ri dii, ta riho ne wowadu worena do henèbꞌe ubꞌa roꞌa nee? Mèka dꞌo dii tèlu, ta riho ne wowadu ène!”
Ta dꞌai roo la nii, ngède ri roo ne wowadu ne èla ke periho. 5 Ta maho ke roo la dꞌara roꞌa ène. Ta kebꞌèdꞌèiane ke roo, ri ngède ri roo he dèu do ngèru do mejèdꞌèipa hebꞌèka kedꞌanga roo, nga pake bꞌara wo pudi kewaꞌa. 6 Ta lii ke ne do ngèru na ène pa roo, “Bꞌole medaꞌu muu! Toi ri yaa, ta muu he ma kale Yesus ti Nasare, do èla pe pemade ri roo pa ajꞌu ketoe. Peꞌee dꞌo pa dꞌee, èla ke Noo pemuri wari. Mai ma heleo miha ri muu, ne era pebꞌèjꞌe ngiꞌu Noo. Peꞌee dꞌoke. 7 Bꞌale we muu mèriai! La pika pa Petu he, ta èla ke Yesus pemuri wari. Nèi ke Noo do uru la Galilea. Do ta pehapo muu nga Yesus pa nii, mi namii ne lii pika uru Noo pa muu. Naa, bꞌale we muu!”✡ Mateo 26:32; Maꞌu 14:28
8 Ta dꞌai ne ngède ri mobèni he, ta dꞌo peꞌee tèra ke ne ngiꞌu Yesus, ta hengodo ke roo. Ta perai ke roo la tele. Bꞌale roo mèri-mèriai. Pedai dꞌo roo pa naduu-naduu pa rujꞌara, ri rihi medaꞌu roo.
Yesus pehapo nga Maria ti Magdala
(Mateo 28:9-10; Johani 20:11-18)
9 Rai jꞌami ae lodꞌo Migu, Yesus pengèdi èni pa Maria ti Magdala, do ngèdi ta hudꞌèiti dꞌara noo ri Yesus, pidu ngiꞌu wango. * Lii do bꞌuke pa dꞌara buku lii Yunani do rihi uru, nga do rihi ie, pedèka pa ayat 8. Lii Pedꞌèii Maꞌu, henèbꞌe nga dꞌue keraꞌa rujꞌara: he èhi do merai (Markus 16:9-20), nga he èhi ri do bꞌabꞌa (Markus 16:9-10). Pedutu lii do mèu dꞌara, do toi woie ne lii pedꞌèii Maꞌu na dꞌee, hari dꞌue keraꞌa rujꞌara nahee, bꞌuke leto we. Tao ne lai henèbꞌi na ènetèke (bꞌuke) pa era do pedèka rai. Hari dꞌue lii pedꞌèii jꞌara lua muri wari Yesus ti made mada, nga lai do ta jꞌèga ri dèu do parahajꞌa pa Yesus. 10 Ta èla noo pe pengèdi nga Yesus, ta bꞌale ke noo la pika pa harièle dèu do ngèdi ta pedute Yesus. Do pee ko roo pa dꞌara pekupu, nga hedui pengee he, nga pewewi èi namada ta henge ne lua made Yesus. 11 Ta lii ke Maria pa roo, “Ta ngaa muu ku pee ko nga hedui? Bꞌole hedui ri ne pengee, èla ke Yesus pemuri wari! Do na dꞌee kowe, pehapo ko nga yaa!”
Tapulara bꞌale ri roo, mihe ane, “Weh! Bꞌole peluu jꞌii ri èu!”
Yesus pengèdi èni rii pa do dꞌue dèu
(Luka 24:13-35)
12 Èla pe na ène, era do dꞌue ana ajꞌa Yesus do kako la hewue rae. Pa telora rujꞌara, ta dèka ke Yesus la pengèdi èni pa roo dꞌue. Rowi do wala ke ne hia Noo, hèku ue ta tui hudi ne tade ri roo. 13 Ta bꞌale ke roo dꞌue, la pika pa ihianga roo, “Weh! Dꞌèno ko ri muu! Ngine dꞌee, pehapo Yesus nga jꞌii pa rujꞌara!”
Tapulara ne lii ihianga roo harièle, “Weh! Bꞌole peluu jꞌii ri muu!”
Yesus pengèdi èni pa harièle ana ajꞌa Noo
(Mateo 28:16-20; Luka 24:36-49; Johani 20:19-23; Muri Mada Dèu Pejuu Yesu 1:6-8)
14 Èla pe na ène, pengèdi èni rike Yesus pa do henguru he dèu ana ajꞌa Noo, pa dꞌara mejèdꞌèita ngaꞌa roo. Ta bꞌani ke ri Noo, mihe ane, “Weh! Rihi kètu wowadu muu! Dèu ta pika pa muu, ta do ngède ke Yaa ri namada roo miha, parahajꞌa dꞌo muu! Ane muu, ta peluu muu. Na dꞌee, ne ke Yaa ma hedꞌapa muu. Èla tèra ke Yaa pemade, tapulara do na dꞌee, ne ke Yaa do muri wari! Naa, heleo ri namada muu miha.
15 Hèku, na dꞌee, kako we muu la èpa kebꞌihu rai-wawa dꞌee, la pepeke pa harièle dèu ne Lii Hagꞌa Dꞌara ngati Yaa.✡ Muri Mada Dèu Pejuu Yesu 1:8 16 Naduu do parahajꞌa nga Yaa, jꞌe do herani ke, do ta wie ri Deo ne helama pa noo, mijꞌe nara noo ta muri loro helaꞌu nga Deo pa liru-bèla. Tapulara naduu dodꞌo parahajꞌa, do ta nara ruwolo noo, ta hane loro noo ri Deo pa tele. 17 Ne dèu do parahajꞌa pa Yaa, do ta tao ri roo, ae keraꞌa rutada madalae, mijꞌe ta toi ri harièle dèu, ta kuaha do era pa roo dèka ngati Deo. Unupala he roo, do ta nara roo ta hudꞌèiwango nga ngara Yaa. Do ta wie ri Deo, ta iꞌa pedai lii pedai do wala, dodꞌo toi ri roo. 18 Kiri ta hibꞌi ri dobꞌoho do nga raho, kiadꞌo lèka ta nginu raho roo, ihilaka dꞌo roo. Ki tèka roo wolaèba pa wukolo dèu do pèda, ta ie ma ne dèu ène.”
Yesus ta dꞌede la liru-bèla
(Luka 24:50-53; Muri Mada Dèu Pejuu Yesu 1:9-11)
19 Ta èla Yesus pepedai lii nga ana ajꞌa Noo he, ta dꞌede ke Noo ri Deo la liru-bèla. Pa nii, jadꞌèi Noo ta ai dꞌanga Deo, mejèdꞌèi Roo helaꞌu ta pereda.✡ Muri Mada Dèu Pejuu Yesu 1:9-11
20 Ta èla pe mi nahère, ana ajꞌa Noo he, pedute ne lii pereda Noo. Pekèdꞌèiroo la harièle kebꞌihu rai la pepika Lii Hagꞌa Dꞌara ngati Yesus pa harièle dèu. Ta wie ke ri Deo pa roo, ne kuaha ta tao ae keraꞌa rutada madalae do èla pewie ri Yesus. Ae tèra ne dèu do parahajꞌa pa Yesus, ri ne Lii Haga Dꞌara na dꞌee, do petuu.
LUA HENÈBꞌE LII PEDꞌIRI MAꞌU, PEDUTU DO HURE DO BꞌUKE DO WALA
Ta dꞌai ne do tèlu mobèni he ta peꞌabu nga Petu he, ta pedꞌèii ke roo harièle jꞌara lua do ngèru do pedai lii nga roo pa rai dare ne ngine. † Lii do bꞌuke pa dꞌara buku lii Yunani do rihi uru, nga do rihi ie, pedèka pa ayat 8. Lii Pedꞌèii Maꞌu, henèbꞌe nga dꞌue keraꞌa rujꞌara: he èhi do merai (Markus 16:9-20), nga he èhi ri do bꞌabꞌa (Markus 16:9-10). Pedutu lii do mèu dꞌara, do toi woie ne lii pedꞌèii Maꞌu na dꞌee, hari dꞌue keraꞌa rujꞌara nahee, bꞌuke leto we. Tao ne lai henèbꞌi na ènetèke (bꞌuke) pa era do pedèka rai. Hari dꞌue lii pedꞌèii jꞌara lua muri wari Yesus ti made mada, nga lai do ta jꞌèga ri dèu do parahajꞌa pa Yesus. Moko ke Yesus miha pereda pa ana ajꞌa Noo he, lita kako la pepeke ne Lii Hagꞌa Dꞌara ti Noo la hari-hari era, hape la èpa kebꞌihu rai-wawa. Lii Hagꞌa Dꞌara na dꞌee, do pika rujꞌara ta Deo do ta wie helama pa harièle dèu ti hala-ludu roo, mijꞌe ta nara roo ta muri mada peloro nga Noo.
Lii Hagꞌa Dꞌara na dꞌee, do petuu tèra. Ri do mi nahère ke, ku pee noo ta era loro, hape la lodꞌo na mii-mii.
✡16:7 Mateo 26:32; Maꞌu 14:28
*16:9 Lii do bꞌuke pa dꞌara buku lii Yunani do rihi uru, nga do rihi ie, pedèka pa ayat 8. Lii Pedꞌèii Maꞌu, henèbꞌe nga dꞌue keraꞌa rujꞌara: he èhi do merai (Markus 16:9-20), nga he èhi ri do bꞌabꞌa (Markus 16:9-10). Pedutu lii do mèu dꞌara, do toi woie ne lii pedꞌèii Maꞌu na dꞌee, hari dꞌue keraꞌa rujꞌara nahee, bꞌuke leto we. Tao ne lai henèbꞌi na ènetèke (bꞌuke) pa era do pedèka rai. Hari dꞌue lii pedꞌèii jꞌara lua muri wari Yesus ti made mada, nga lai do ta jꞌèga ri dèu do parahajꞌa pa Yesus.
✡16:15 Muri Mada Dèu Pejuu Yesu 1:8
✡16:19 Muri Mada Dèu Pejuu Yesu 1:9-11
†16:9 Lii do bꞌuke pa dꞌara buku lii Yunani do rihi uru, nga do rihi ie, pedèka pa ayat 8. Lii Pedꞌèii Maꞌu, henèbꞌe nga dꞌue keraꞌa rujꞌara: he èhi do merai (Markus 16:9-20), nga he èhi ri do bꞌabꞌa (Markus 16:9-10). Pedutu lii do mèu dꞌara, do toi woie ne lii pedꞌèii Maꞌu na dꞌee, hari dꞌue keraꞌa rujꞌara nahee, bꞌuke leto we. Tao ne lai henèbꞌi na ènetèke (bꞌuke) pa era do pedèka rai. Hari dꞌue lii pedꞌèii jꞌara lua muri wari Yesus ti made mada, nga lai do ta jꞌèga ri dèu do parahajꞌa pa Yesus.