12
च्हमिरि नेरो अजिङ्गर
1 च लिउँइ मुर औदिबै चिनु म्रोंइ: च्हमिरि घ्रिइ त्हिंयाँ खिल, चए प्हले न्होंर लयाँ मुँल, धै चए क्रर च्युसे ङ्हिं मुसारए मुकुट मुँल। 2 चइ प्हसे नोल, धै प्हसे फिबै रें खसि थेबै कै तेरिल।
3 च लिउँइ धबै मुर अर्को औदिबै चिनु म्रोंइ: चर बेल्ले थेबै ओल्ग्या अजिङ्गर मुँल। चए क्र ङि मुँल, धै क्र ह्रोंसे मुकुट मुँल। झाइले चए रुँ च्यु मुँल।✡ 12:3 दान ७:७ 4 चए म्येइ मुर्बै सारा सोंबाँर तिबाँ सोर्दिसि पृथ्बीर भ्योंवाइ। कोलो फिबै तोंदोंन् क्ल्ह्योंवाब् बिसि च अजिङ्गर कोलो फिबि छेबै च्हमिरिए उँइँर रारिल।✡ 12:4 दान ८:१० 5 धै च च्हमिरिइ च्ह घ्रि फिइ। (च च्हइ पैए प्हरे छेसि ताँन् ह्रेंमैंए फिर ग्याल्स लब्मुँ।) कोलो फिबै तोंदोंन् दूत घ्रिइ कोलोलाइ परमेश्वर ङाँर बोसि खीए राजगद्दिर थेंइ।✡ 12:5 यशै ६६:७; भज २:९ 6 च च्ह फिबै च्हमिरि बिस्याँ क्यु आयोंबै क्ल्ह्योउँइ भौदिह्याइ। चरि चए ल्हागिर हजार घ्रिसे ङ्हिब्रसे ट्हुच्यु (१,२६०) त्हिंइ समार्बै चब् थुँबै सैमैं परमेश्वरजी ओंसोंन् तौदु लथेंल।
7 च लिउँइ स्वर्गर ल्हडें तइ। मिखाएल बिबै थेबै स्वर्गदूत नेरो चए न्होंर्बै स्वर्गदूतमैंइ च अजिङ्गरने ल्हडें लइ। च अजिङ्गर नेरो चए दूतमैं या चमैंने ल्हडें लइ।✡ 12:7 दान १०:१३,२१; १२:१; यहू ९ 8 दिलेया मिखाएलइ ट्होवासि च अजिङ्गर नेरो चए दूतमैं च त्हेउँइँले स्वर्गर टिल् आयों। 9 मिखाएलइ च थेबै अजिङ्गरलाइ स्वर्गउँइँले भ्योंवाइ। च अजिङ्गर स्योंम्बै प्हुरि ग, चलाइ स्युर्गु नेरो दुष्ट बिम्। चइ ताँन् ह्युलर्बै म्हिमैंने स्योर तेसि लुइमुँ। च नेरो चए दूतमैंलाइ परमेश्वरए दूतमैंइ पृथ्बीर भ्योंवाइ।✡ 12:9 उत ३:१; लूक १०:१८
10 झाइले स्वर्गर छ बिबै थेबै कै ङइ थेइ,
“तारे ङ्योए परमेश्वरजी ह्रोंसए म्हिमैं जोगेमिंइमुँ!
खीजी ह्रोंसए ग्याल्स लबै भों उँइँमुँ!
तारे परमेश्वरजी कुल्मिंबै म्रुँ ख्रीष्टजी ह्रोंसए ग्याल्स लबै हग उँइँमुँ!
तलेबिस्याँ ङ्योए अलि-अङाँमैंलाइ परमेश्वरए उँइँर त्हिंयाँ म्हुँइँस छ्याब् ल्हैदिबै दुष्ट
स्वर्गउँइँले मिखाएलइ भ्योंवाइमुँ।✡ 12:10 अयू १:९-११; जक ३:१
11 ङ्योए अलि-अङाँमैंइ क्यु च्हजए को नेरो खेंमैंइ पिंबै ग्वाइउँइँले
च दुष्टए फिर ट्होइमुँ,
तलेबिस्याँ खेंमैंए ज्युए म्हाँया आलल्ले
चमैं सिबरै या तयार मुँल।
12 छतसि स्वर्ग नेरो चर मुँब्मैं सैं तोंन्।
दिलेया पृथ्बीर नेरो मा ङ्युँइर मुँब्मैंए फिर बिस्याँ थेबै दुःख तब्मुँ,
तलेबिस्याँ च स्युर्गु दुष्ट क्हेमैं ङाँर युइमुँ,
झाइले चए त्हे च्युगुदे मत्त्रे चैमुँ बिब् सेसि
च बेल्ले ह्रिस खइमुँ।”
13 ह्रोंसलाइ स्वर्गउँइँले पृथ्बीर भ्योंवाब् था सेसि अजिङ्गरइ कोलो फिबै च्हमिरिलाइ ल्हाइ। 14 दिलेया च च्हमिरि अजिङ्गरउँइँले लोबर म्हि आटिबै क्ल्ह्यो समा प्हुरह्यारिगे बिसि परमेश्वजी चलाइ थेबै क्व्रेए प्ह्या ङ्हिं पिंइ। च म्हि आटिबै क्ल्ह्योर सोंदिं से म्हैंन ट्हुल् समा च च्हमिरिए ल्हागिर चब-थुँबै सैमैं परमेश्वरजी ओंसोंन् तौदु लथेंल।✡ 12:14 दान ७:२५; १२:७ 15 झाइले च च्हमिरिलाइ नोबोरिगे बिसि च अजिङ्गरइ ह्रोंसए सुँउँइँले थेबै स्यों तेइ। 16 दिलेया च च्हमिरिलाइ जोगेमिंबै ल्हागिर पृथ्बीइ सुँ फैसि च अजिङ्गरए सुँउँइँले त्होंबै स्यों क्ल्ह्योंवाइ। 17 छतमा च अजिङ्गर च च्हमिरिने बेल्ले ह्रिस खइ। धै च च्हमिरिए अर्को सन्तानमैंने, अथवा परमेश्वरए ताँ ङिंब्मैं नेरो येशूए बारेर क्ह्रोंसेंन्बै ग्वाइ पिंब्मैंने ल्हडें लबर ह्याइ। 18 धै च धबै मा ङ्युँइए रेर राइ।