62
परमेश्वरजी रक्षा लमिंम् बिसि खीए फिर भर लब
क्वे प्रिंब्मैंए चिब यदूतूनए✡ ६२:० १ इति १६:४१,४२; २५:३-६ल्हागिर दाऊदए भजन घ्रि।
1 क्ह्रोंसेंन ङए सोइ परमेश्वरर मत्त्रे भों न्हल् योंम्;
खीजी ङ जोगेमिंम्।
2 खी मत्त्रे ङ रक्षा लमिंबै पारा,
नेरो ङए किल्ला ग,
छतसि ङ ङ्हिंसि त्हाररिब् आरे।
3 खोंयों समा क्हेमैंइ म्हिए न्होह्रों लरिमुँ?
फुयाबै गारा नेरो आभोंबै बार धों तबै म्हिलाइ
क्हेमैं ताँन् त्हुँसि क्र ओलै आखाँन् लब् वा?
4 चए थेबै पदउँइँले चलाइ क्युरु तवाबर चमैंइ मत्त्रे आछ्याँबै ताँ मैंरिम्।
चमैं स्योलिबै ताँमैंर सैं तोंम्।
चमैंए सुँइ आशिक पिंमुँ,
सैं न्होंर बिस्याँ सराप पिंम्।
तिस्याँदे मैंन्
5 छतसि ओ ङए सो, परमेश्वरर मत्त्रे भों न्हद्;
ङए आशा खीजीन् पूरा लमिंम्।
6 खी मत्त्रे ङ रक्षा लमिंबै पारा
नेरो ङए किल्ला ग;
छतसि ङ ङ्हिंसि त्हाररिब् आरे।
7 परमेश्वरए फिर बिश्वास लसि ङइ मुक्ति नेरो मान योंमुँ।
ङए भोंबै पारा नेरो ङए ग्वार योंबै क्ल्ह्यो परमेश्वरन् ग।
8 छतसि ओ म्हिमैं, खोंयोंन् बिलै खीनेन् भर थेंन्;
खीए ओंसों ह्रोंसए सैंर्बै ताँ बिद्;
तलेबिस्याँ ङ्योए ग्वार ह्रिबै क्ल्ह्यो परमेश्वर ग।
तिस्याँदे मैंन्
9 आयोब् आख्युब्मैं मुट्ठि घ्रि सो मत्त्रे ग,
प्लब्मैं या तोइ केर आफे,
तलेबिस्याँ पारर क्वेमा चमैं योंयाम्,
चमैं ङ्हिंना-ङ्हिंन् मुट्ठि घ्रि सो मत्त्रे ग।
10 धुदिबै केर भर आतद्
धै ह्योबै सैर थेब् आप्हैंन्;
क्हिए सै न्होर ल्हें तलेया चए फिर भर आथेंन्।
11 परमेश्वरजी ताँ घ्रि पोंइमुँ,
ङइ ल्हें खे च ताँ थेइमुँ:
ओ परमेश्वर, क्हि बेल्ले भोंब मुँ,
12 ओ याहवेह, क्हिजी खोंयोंइ आनुबै म्हाँया लमुँ।
तलेबिस्याँ क्हिजी ताँन् म्हिमैंलाइ
ह्रों-ह्रोंसइ लबै के अन्सार्बै नों सै पिंम्।✡ 62:12 अयू ३४:११; यर १७:१०; मत्ती १६:२७; रोम २:६; दर्शन २:२३