61
ङ भन्दा थेबै पारार डोरेमिंन्
क्वे प्रिंब्मैंए चिबए ल्हागिर गिटार-सारङ्गींमैं ह्रादै प्रिंबै दाऊदए भजन।
1 ओ परमेश्वर, ङइ ग्वार ह्रिब थेमिंन्,
ङए प्राथना छेनाले थेमिंन्;
2 ङए सैं आतेसि
पृथ्बीए छ्योगोउँइँले ङइ क्हिने ग्वार ह्रिमा,
ङ भन्दा थेबै पारार डोरेमिंन्,
3 तलेबिस्याँ ङए ग्वार योंबै क्ल्ह्यो नेरो
शत्तुरमैंउँइँले जोगेल् योंबै भोंबै धरर क्हिन् ग।
4 खोंयोंन् बिलै क्हिए तम्बुर ङलाइ टिल् पिंन्!
क्हिए प्ह्यागोंमैंइ ङए रक्षा लद्।
तिस्याँदे मैंन्
5 तलेबिस्याँ ओ परमेश्वर, क्हिने बालु ङइ फैबै भकलमैं क्हिजी थेइमुँ;
क्हिलाइ मान लब्मैंइ योंल् त्हुबै सैमैं क्हिजी ङलाज्यै या पिंइमुँ।
6 म्रुँए छ्ह ह्रिंग्यो लमिंन्;
च खोंयोंन् बिलै सोरिगे।
7 च परमेश्वरए ओंसों खोंयोंन् बिलै राजगद्दिर टिरिगे;
क्हिजी खोंयोंइ आनुबै म्हाँया लबइले नेरो च क्हिए फिर भर लल् खाँबइले चए रक्षा लमिंन्!
8 झाइले दिन ह्रोसे क्हिने फैबै भकल ङइ पूरा लमा
ङ क्हिए मिं खोंयोंन् बिलै थेब् लसि क्वे प्रिंब्मुँ।