16
बाठो नाइकेए अहान्
1 येशूजी ह्रोंसए चेलामैंने बिइ, “प्लबै म्हि घ्रिल चाँजो लबै नाइके म्हि घ्रि मुँल। चइ ह्रोंसए क्ल्हेए सम्पति उडिदिवाइ बिसि म्हिमैंइ चए फिर छ्याब् ल्हैदिल।
2 “छतमा प्लबै म्हिइ चलाइ हुइसि बिइ, ‘क्हिए बारेर ङइ थेबै ताँ तो जा? क्हिइ लबै केए हिसाब ङलाइ पिंन्। तलेबिस्याँ तारे क्हि ङए सै न्होरए चाँजो लल् योंरिब् आरे।’
3 “छतमा च नाइकेइ सैं न्हों-न्हों बिइ, ‘ङए क्ल्हेइ ङ केउँइँले तेबर होंना। ङइ ताब क्योब लल् आखाँ, म्हिमैंने ह्रिसि चब् बिलेया ङ फापिम्। 4 छतसि तारे ङइ तो लल् त्हुमुँ ङइ मैंल् खाँइमुँ। केउँइँले तेवाबै लिउँइ ङइ स्वाब थुमैंने ङो सेब् मिं सेब् लल् त्हुइ। झाइले क्ल्हेइ ङ केउँइँले तेवाबै लिउँइ च थुमैंइ खेंमैंए धिंर ङ मान लब्मुँ।’
5 “च लिउँइ चइ क्ल्हेए असामिमैं घ्रि घ्रिले हुइसि ओंसों खबै असामिने ‘ङए क्ल्हेलाइ फोल् त्हुबै छे कति मुँ?’ बिसि ङ्योएइ।
6 “चइ बिइ, ‘हजार सों लिटर जैतूनए छ्युगु फोल् त्हुम्।’
“नाइकेइ चने बिइ, ‘क्हिए तमसुकर तारे हजार घ्रिसे ङ्हब्र मत्त्रे प्ह्रिद्।’
7 “झाइले चइ अर्कोने बिइ, ‘क्हिइ कति फोल त्हुमुँ बिमा।’
“च म्हिइ बिइ, ‘ङ्हिब्र म्हुरि गहुँ फोल् त्हुम्।’
“नाइकेइ च म्हिने बिइ, ‘क्हिए तमसूकरै या प्ह्रसे टुच्यु म्हुरि मत्त्रे प्ह्रिद्।’
8 “च बेमान लबै नाइकेइ छले असामिमैंए छे च्युगुदे लमिंइ बिब् सेसि च क्ल्हेइ नाइके बाठो मुँना बिसि सेइ। तलेबिस्याँ चु ह्युलर्बै म्हिमैंइ ह्रोंसए थुमैंने के लमा चारबै ह्वे योंबै परमेश्वरए सन्तानमैं भन्दा बेल्ले बाठो तम्।
9 “ङ क्हेमैंने बिमुँ, ह्रोंसए ल्हागिर ह्युलर्बै स न्होरउँइँले क्ह्रिबै थुमैं बनेद्। छ लस्याँ क्हेमैंए मुइ खाँयाबै त्हेर चमैंइ क्हेमैं स्वर्गर स्वागत लब्मुँ।”* 16:9 चु ताँए मतलब, चु नाइके बाठो तसि ह्रोंसइ योंबै हगउँइँले ह्युलर्बै थुमैं बनेइ। छलेना म्हिमैंइ परमेश्वरए फिर बिश्वास लसि चमैं ङ्योए थुमैं तरिगे बिसि ङ्यो चु ह्युलर मुँमन् ङ्योए सै न्होर नेरो ङ्योइ योंबै हगउँइँले परमेश्वरए के लले। छलस्याँ ङ्योए सै न्होर नुयालेया ङ्यो स्वर्गर फेनेल् योंब्मुँ।
10 येशूजी धबै बिइ, “च्युगुथिरि ताँर भर लल् खाँबै म्हि थेब् थेबै ताँरै या भर लल् खाँब तम्। दिलेया च्युगुथिरि ताँर बेमान लबै म्हि थेबै ताँरै या बेमान तम्। 11 छतसि क्हेमैं ह्युलर्बै सै न्होरर भर लल् खाँब आतइ बिस्याँ, स्वर्गर्बै खोंयोंइ आखाँबै सै न्होरए जिम्मा क्हेमैंलाइ खाबइ पिंमुँ? 12 क्हेमैं अरूए सै न्होरर भर लल् खाँब आतइ बिस्याँ, क्हेमैंइन योंल् त्हुबै सै न्होर खाबइ पिंमुँ? खाबज्यै आपिं।”
13 येशूजी धबै बिइ, “खाबज्यै या क्ल्हे ङ्हिंए के तिखेर्न लल् आखाँ। तलेबिस्याँ चइ घ्रिलाइ हेल लमुँ, झाइले अर्कोने म्हाँया लमुँ। छलेन क्ल्हे घ्रिइ बिब छेनाले ङिमुँ, अर्को क्ल्हेलाइ तो धोंइ आङ्हाँ। च धोंलेन् क्हेमैंज्यै या परमेश्वर नेरो मुइए सेवा तिखेर्न लल् आखाँ।”✡ 16:13 मत्ती ६:२४
14 येशूजी बिबै ताँ थेसि फरिसीमैंइ खीए बिल्लि लइ। तलेबिस्याँ चमैंए ल्हागिर मुइ थेबै सै मुँल। 15 धबै येशूजी चमैंने बिइ, “क्हेमैं म्हिमैंए उँइँरि ‘ङ छ्याँब धर्मि म्हि ग’ बिसि थेब प्हैंम्। दिलेया क्हेमैंए सैं न्होंर तो मुँ बिसि परमेश्वरजी सेम्। म्हिमैंए सैंर थेब ङ्हाँबै सै परमेश्वरए उँइँर तोइ आङिंबै सै ग।
16 “बप्तिस्मा पिंबै यूहन्नाए पलो समा स्योंमा परमेश्वरजी मोशाने पिंबै ठिम नेरो अगमबक्तामैंइ प्ह्रिबै छ्वे मत्त्रे मुँल। च त्हेसेरो तिंयाँ समा ‘परमेश्वरजी ग्याल्स लबर होंइमुँ। छतसि खीलाइ म्हाँदिद्, छ लस्याँ खीजी क्हेमैंए फिर आशिक पिंब्मुँ,’ बिसि परमेश्वरए ग्याल्सर्बै सैं तोंबै ताँ† १६:१६ ग्रिक क्युइर परमेश्वरए ग्याल्सए बारेर बिप्रइमुँ। छतसि ताँन् म्हिमैं ह्रोंसइ खाँन् समा भों लसि परमेश्वरए ग्याल्सए न्होंर होंम्।✡ 16:16 मत्ती ११:१२-१३ 17 दिलेया मु नेरो पृथ्बी म्हयाल् खाँमुँ, परमेश्वरए छ्वेर प्ह्रिबै ताँ घ्रि या आम्ह।✡ 16:17 मत्ती ५:१८
18 “छतसि ह्रोंसए प्ह्रेंस्यो वासि अर्कोने ब्ह्या लबै म्हिइ ब्यभिचार लम्। छलेन पार लबै च्हमिरिने ब्ह्या लबै मुँइँज्यैया ब्यभिचार लम्।”✡ 16:18 मत्ती ५:३२; १ कोर ७:१०-११
प्लबै म्हि नेरो लाजरस
19 येशूजी धबै बिइ, “छाबै प्लबै म्हि घ्रि मुँल। चइ सै ल्हें फेबै छ्याँबै क्वेंमैं खिमल। त्हिंइ ह्रोंसे लिं-लिंबै चबै सैमैं चसि मजाले त्हिंइ थोमल। 20 दिलेया लाजरस बिबै ङ्हाँदु म्हि घ्रि मुँल। चए ज्यु तिगोंन् पोर मुँल। चलाइ अरू म्हिमैंइ प्लबै म्हिए तगारर्न पखसि थेंमिंमल। 21 ‘प्ल्होबै म्हिइ चब् चमा सर तेयाबै क्हें ठाँडा-ठुँडे चल् योंम् उ?’ ङ्हाँसि लाजरस ङाँइ ङ्ह्योरिमल। दिलेया चल् आयोंमल, च मत्त्रे आङिं, नगिमैं खसि चए पोरमैं ल्हेंमल।
22 “तिगें लाजरस सियाइ। धै स्वर्गदूतमैं युसि च स्वर्गर अब्राहामए क्वेंदर बोइ‡ १६:२२ अब्राहामए क्वेंदर बोइ परमेश्वरजी खीए ताँ क्वेंब्मैंए ल्हागिर स्वर्गर भत्यार पिंब्मुँ। च भत्यारर ताँन् भन्दा थेबै म्हि अब्राहाम तब्मुँ। छले मान योंबै प्ह्रें अब्राहामए क्वेंदर टिब्मुँ। थेंइ। झाइले च प्ल्होबै म्हि या सियासि म्हिमैंइ पावाइ। 23 च नर्गर फेनेसि बेल्ले दुःख योंरिमा चइ कैंडु स्वर्गउँइ ङ्ह्योइ छले ङ्ह्योमा ह्रेंगोउँइँलेन् अब्राहाम नेरो चए क्वेंदर लाजरस क्हुँरिब् म्रोंइ।
24 “चइ कै तेसि बिइ, ‘ओ बाज्यू अब्राहाम, ङए फिर ल्हयो खसि लाजरस ङ ङाँर कुल्मिंन्। चए योरि क्युर प्ल्हुँसि ङए सुँर झोंमिंरिगे। तलेबिस्या ङ चु मिए राबर थेबै दुःख योंरिइमुँ।’
25 “दिलेया अब्राहामइ बिइ, ‘बाबु, क्हिइ मैंन्। क्हिए छ्हर छ्याँ-छ्याँबै सैमैं योंसि क्हिइ सुखले छ्ह थोइ। दिलेया लाजरसइ दुःखै दुःखर्न छ्ह थोइ। दुःख योंलेया चइ परमेश्वर मैंइ, क्हिइ बिस्याँ परमेश्वर खोंयोंइ आमैं, ङम् ङन् ग बिसि टिइ। छतसि तोगो चुर लाजरसइ सुख योंइमुँ, क्हिइ बिस्याँ चर दुःख योंइमुँ। 26 चुर्बै म्हिमैं छुइले चर ह्याल् आखाँरिगे, धै चर्बै म्हिमैं या चुर ङि ङाँर खल् आखाँरिगे बिसि क्हेमैं नेरो ङिए म्हाँजोरि बेल्ले थेबै गैरु होंल्दों मुँ।’
27 “छबिमा च प्ल्होबै म्हिइ बिइ, ‘छ बिस्याँ, ओ बाज्यू, ङ यो छ्युँ लमुँ क्हिइ लाजरस ङए आबाए धिंर कुल्मिंन्। 28 तलेबिस्याँ ङए त्येमैं ङ्हउलो चर मुँ। चमैं या चु नर्गर आयुरिगे बिबै ल्हागिर लाजरस ह्यासि चु दुःख योंबै क्ल्ह्योए बारेर्बै ताँ चमैंने बिमिंरिगे।’
29 “दिलेया अब्राहामइ बिइ, ‘चमैंने बालु स्योंम्बै मोशा नेरो अगमबक्तामैंइ प्ह्रिबै छ्वे मुँ। चमैंइ च छ्वेर प्ह्रिबै ताँमै छेनाले खेरिगे, थेरिगे।’
30 “च प्ल्होबै म्हिइ धबै बिइ, ‘आङि, बाज्यू अब्राहाम, चमैंइ प्ह्रिबै ताँ आक्वेंलै या सियाबै म्हिमैंउँइँले घ्रि सोगों तसि चमैं ङाँर ह्याइ बिस्याँ बल्ल चमैंइ ह्रोंसए आछ्याँबै केमैंउँइँले सैं एसि परमेश्वरए ताँ क्वेंब्मुँ।’
31 “दिलेया अब्राहामइ चने बिइ, ‘मोशा नेरो अगमबक्तामैंए ताँ आक्वेंस्याँ म्हि घ्रि सिबउँइँले सोगों तसि चमैं ङाँर ह्याना बिलेया चमैंइ क्वेंरिब् आरे।’ ”
*16:9 16:9 चु ताँए मतलब, चु नाइके बाठो तसि ह्रोंसइ योंबै हगउँइँले ह्युलर्बै थुमैं बनेइ। छलेना म्हिमैंइ परमेश्वरए फिर बिश्वास लसि चमैं ङ्योए थुमैं तरिगे बिसि ङ्यो चु ह्युलर मुँमन् ङ्योए सै न्होर नेरो ङ्योइ योंबै हगउँइँले परमेश्वरए के लले। छलस्याँ ङ्योए सै न्होर नुयालेया ङ्यो स्वर्गर फेनेल् योंब्मुँ।
✡16:13 16:13 मत्ती ६:२४
†16:16 १६:१६ ग्रिक क्युइर परमेश्वरए ग्याल्सए बारेर
✡16:16 16:16 मत्ती ११:१२-१३
✡16:17 16:17 मत्ती ५:१८
✡16:18 16:18 मत्ती ५:३२; १ कोर ७:१०-११
‡16:22 १६:२२ अब्राहामए क्वेंदर बोइ परमेश्वरजी खीए ताँ क्वेंब्मैंए ल्हागिर स्वर्गर भत्यार पिंब्मुँ। च भत्यारर ताँन् भन्दा थेबै म्हि अब्राहाम तब्मुँ। छले मान योंबै प्ह्रें अब्राहामए क्वेंदर टिब्मुँ।