1 तिगें रोमी म्रुँए ल्हागिर बालि रेब्‍मैं नेरो अरू आछ्याँबै के लब्मैं* 15:1 आछ्याँबै के लब्मैं चमैं यहूदी ठिम छेनाले आम्हाँदिबइले फरिसीमैं नेरो धर्म-गुरुमैंइ हेल लइ। खीए ताँ थेबर खीए ङाँर खल। 2 छाब् म्रोंसि फरिसीमैं नेरो शास्‍त्रिमैंइ “चु म्‍हिइमि आछ्याँबै के लब्मैं या खोमन। झाइले चमैंने बालुन् चब् थुँब् लमन बिसि,” गनगन लबर होंइ।✡ 15:1-2 लूक ५:२९-३०

3 छतसि येशूजी चमैंने चु अहान् बिइ, 4 “क्‍हेमैं न्‍होंरि खाबलैया क्‍यु प्र मुइबिस्‍याँ च क्यु प्रए न्‍होंरि घ्रि म्‍हयास्‍याँ चइ कुच्युसे कु क्यु क्ह्‍योंर्न वाथेंसि म्हयाबै क्‍यु आयोंन् समा आम्‍है रो वा? 5 म्हयाबै क्यु योंबै लिउँइ च क्‍ल्‍हे बेल्‍ले सैं तोंसि क्यु काँधर तेंसि प्‍ह्रोंर पखम्। 6 छले प्‍ह्रोंर खसि चइ ह्रोंसए थुमैं नेरो ङ्‌हेब्-ट्हुबमैं हुइसि ‘ङ बेल्‍ले तोंइमुँ, क्‍हेमैं या सैं तोंन्। तलेबिस्याँ ङए म्‍हयाबै क्‍यु योंइ,’ बिम्।

7 “ङ क्हेमैंने बिमुँ, ‘ङइ पाप के लइमुँ ङलाइ क्षमा पिंन्,’ बिल् आत्हुबै कुच्युसे कु धर्मि म्‍हिमैं भन्दा ‘ङ पापि मुँ, ङइ पाप केमैं लइमुँ, ङलाइ क्षमा पिंन्,’ बिसि सैं एबै म्‍हि घ्रि म्रोंसि परमेश्‍वर स्‍वर्गर बेल्‍ले सैं तोंम्।”

8 येशूजी धबै अर्को ताँ बिइ, “च्हमिरि घ्रिने चाँदिए मुइ च्‍युउँलो मुँल। दिलेया चाँदिए मुइ घ्रि म्‍हयास्‍याँ चइ बत्ति म्रोंसि कुजाइ फ्‍योसि च आयोंन् समा फन् फन्‌ले आम्‍है रो वा? 9 च मुइ योंबै लिउँइ ह्रोंसए थुमैं नेरो ङ्‌हेब्-ट्हुब्‍मैं हुइसि ‘ङ बेल्‍ले सैं तोंइमुँ, क्‍हेमैं या सैं तोंन्। तलेबिस्याँ ङए म्‍हयाबै मुइ योंइ,’ बिसि चइ बिब्मुँ। 10 ङ कहेमैंने बिमुँ, च धोंलेन् दुष्‍ट के पिसि खी ङाँइ सैं एसि छ्याँबै घ्‍याँर प्रबै म्‍हि घ्रि म्रोंसि परमेश्‍वरए स्‍वर्गदूतमैं बेल्‍ले सैं तोंम्।”

11 येशूजी धबै बिइ: “म्‍हि घ्रिल च्‍ह ङ्हिं मुँल। 12 च्‍ह च्‍योंबइ आबाने बिइ, ‘आबा, ङए अँश कति योंमुँ, च तोगोन् ङलाइ पिंन्।’ च्हइ छबिमा आबाइ ह्रोंसए सै न्होर च्‍ह ङ्हिं चुमिंइ। 13 दे त्हे लिउँइ च्‍ह च्‍योंबइ ह्रोंसए अँश चुँवाँसि ताँन् मुइ खागु लसि धिंउँइँले त्‍होंयाइ। धै ह्रेंगोर्बै ह्‍युलर ह्‍यासि बेल्‍ले फुर्मास लसि मुइ ताँन् नुवाइ। 14 मुइ ताँन् नुवाल् खाँबै लिउँइ च ह्‍युलर थेबै अँङ्गल् तसि च फोत्तेन् तयाइ। 15 छतमा च ह्‍युलर्बै म्‍हि घ्रि ङाँर के म्‍हैबर ह्‍याइ। च म्‍हिइ ह्रोंसए म्रोंर तिलिमैं छबर कुलइ। 16 तिलिइ चबै सैमैं म्रोंसि च बेल्‍ले म्रोमल। दिलेया खाबज्‍यै चलाइ चबै सै आपिंमल।

17 “च त्‍हेर बल्‍ल चइ आबाए धिं मैंइ। झाइले चइ बिइ, ‘ङए आबाए के लब्मैंइ चब् म्रेंन्‍ले चसेया चबै सै ङैंम्, ङ बिस्‍याँ चुर चल् आयोंसि सिबर होंइमुँ। 18 तारे ङ आबा ङाँर ह्‍यासि आबाने छ बिम्, “ओ आबा, ङइ क्हिए ताँ आङिंसि परमेश्‍वर नेरो क्‍हिए बिरोधर आछ्याँबै के लइ। 19 तारे ङ क्‍हिए च्‍ह बिबै लायकर्बै आरे। बरु ङ क्‍हिए के लबै म्‍हि घ्रि धोंलेन् क्‍हि ङाँर टिल् पिंन्,” बिब्मुँ’ बिसि चए सैंर मैंइ।

20 “झाइले च रेसि आबा ङाँर ह्‍यारिमा च धिंउँइँले ह्रेंगोर खरिब चए आबाइ म्रोंइ। छले ह्रोंसए च्ह एखरिब् म्रोंसि आबा बेल्‍ले सैं तोंइ। धै च्‍ह ङाँर न्हेह्‍यासि अँउँलो खोएसि म्वें लइ। 21 च्‍हइ आबाने बिइ, ‘ओ आबा, ङइ क्हिए ताँ आङिंसि परमेश्‍वर नेरो क्‍हिए बिरोधर आछ्याँबै के लइ। तारे ङ क्‍हिए च्‍ह बिबै लायकर्बै आरे।’

22 “दिलेया आबाइ के लबै म्हिमैं हुइसि बिइ, ‘युन्ले ताँन् भन्दा छ्याँबै क्‍वें नेरो च्या पखसि चु खिमिंन्, जुत्‍तै या खिमिंन्। 23 झाइले छोबै क्‍यु साँडे सैसि भत्‍यार लसि ङ्यो बेल्‍ले सैं तोंदै चले। 24 तलेबिस्याँ चु ङए च्‍ह सियाल, दिलेया सोसि खइ; म्‍हयाल, दिलेया योंइ।’ छतसि ङ्यो सैं तोंदै भत्‍यार लसि चब् थुँब लबर होंइ।

25 “च त्‍हेर च्‍ह थेब म्रोंर मुँल। च म्रोंउँइँले धिंए चेंदो फेखमा धिंर बाजा ह्रासि सेब्-प्रिंब लरिबै कै थेइ। 26 छतसि चइ के लबै म्हि घ्रि हुइसि ‘धिंर तो लबर होंइमुँ जा?’ बिसि ङ्योएइ।

27 “के लबै म्हिइ बिइ, ‘क्‍हिए अलि खइमुँ, छले च छेनाले एखब् म्रोंसि क्‍हिए आबा सैं तोंसि ङ्यो बाजा ह्रादै सेदै प्रिंदै सैं तोंदै चब् थुँब् लले बिसि छोबै क्यु सैसि भत्यार लइमुँ।’

28 “चु ताँ थेसि च्‍ह थेब बेल्‍ले ह्रिस खसि धिं न्‍होंर ह्‍याल् आङिं। छतमा आबा बैरु त्‍होंसि च वाँबर होंइ। 29 दिलेया चइ आबाने बिइ, ‘च्‍हौ ल्‍हें बर्ष समा ङइ क्‍हिए केब्छैंइ धोंले के लइ। क्‍हिइ ल्‍हैदिबै तो के मुँलेना ङइ आल! आबिमल। दिलेया ङइ तो योंइ? सैं तोंल्‍ले थुमैंने स्‍योगैं चरिगे बिसि क्हिइ ङलाइ र-झजा घ्रि या आपिं। 30 क्‍हिए सै न्होर बोसि ताँन् नुवाबै च्ह एखमा चए ल्हागिर क्‍हिइ छोबै क्‍यु साँडे सैसि च्‍हौ थेबै भत्‍यार लमिंब आ।’

31 “छबिमा आबाइ चने बिइ, ‘ठागु, क्‍हिम् खोंयोंन् बिलै ङने बालुन् मुँ। ङने मुँबै सै न्होर ताँन् क्‍हिलन् ग। 32 तिंयाँ ङ्योइ भत्‍यार लसि बेल्‍ले सैं तोंल् त्‍हुम्। तलेबिस्याँ क्‍हिए अलि सियाल, सोसि खइ, म्‍हयालेया योंइ।’ ”