1 आइतबार न्हाँगर्न मि छेनाले आम्रोंबर्न मग्दालाथेंस्यो मरियम छगोंर ह्‍यामा छगोंउँइँले युँमा स्योथेंब् म्रोंइ। 2 झाइले च सिमोन पत्रुस नेरो येशूजी खोबै अर्को चेला ङाँर न्हेह्‍यासि बिइ, “म्हिमैंइ प्रभु छगोंउँइँले बैरु बोयाना! दिलेया खीलाइ खनिर थेंइँमुँ ङिइ आसे।”

3 छबिमा पत्रुस नेरो अर्को चेला बैरु त्‍होंसि छगोंउँइ ह्‍याइ। 4 चमैं ङ्हिंना-ङ्हिंन् न्हेह्‍याइ दिलेया अर्को चेला पत्रुस भन्दा ओंसों छगोंर फेनेइ। 5 च कुरसि छगों न्‍होंर ङ्‌ह्‍योमा सुतिए ट्हि क्वेंमैं मत्‍त्रे म्रोंइ, दिलेया च छगों न्होंर आहों। 6 च लिउँइ सिमोन पत्रुस या फेनेसि छगों न्होंर होंइ। चज्यै या ट्हि क्वेंमैं मत्‍त्रे म्रोंइ। 7 येशूए क्रर फैबै ह्रुमल ट्हि क्वेंमैंने आरेल। च तिराइ तासि मुँल। 8 छगोंर ओंसोंन् फेखबै अर्को चेला या न्होंर होंइ। चज्यै छाब् म्रोंसि येशू सिबउँइँले सोगों तना बिबै ताँ क्वेंइ। 9 (तलेबिस्याँ चमैंइ च त्हे समा येशू सिबउँइँले सोगों तल् त्हुम् बिसि परमेश्‍वरए छ्वेर प्‍ह्रिबै ताँमैं आक्होल।) 10 च लिउँइ च चेलामैं ह्रोंसए धिंर एह्‍याइ।

11 मरियम बिस्याँ छगोंए बैरु रासि क्रोरिल। च क्रोदै कुरसि छगोंउँइ ङ्‍ह्‍योमा 12 येशूए सिनु थेंबै क्ल्ह्‍योर तार्ग्या क्वें खिबै स्वर्गदूतमैं ङ्हिं घ्रि क्रउँइ अर्को प्हलेउँइ टिरिब चइ म्रोंइ। 13 स्वर्गदूतमैंइ चने “ओ नानि, क्‍हि तले क्रोरिल?” बिसि ङ्योएमा चइ बिइ, “म्हिमैंइ ङए प्रभु बोयाना। दिलेया खी खनिर थेंगे ङइ आसे।”

14 च्हौ ताँ बिसि च लिउँइ तोमा चइ येशू रारिब् म्रोंइ। दिलेया येशून् ग बिसि ङो आसेल। 15 येशूजी चने “ओ नानि, क्‍हि तले क्रोरिल? क्‍हिइ खाब् म्‍हैल?” बिसि ङ्योएमा चइ खी बगैंचार के लबै म्हि धों ङ्हाँसि बिइ, “चिब, क्‍हिइ छुइले खीलाइ बोयास्याँ, खनिर थेंइँमुँ ङने बिमिंन्। खीलाइ ङ बोह्‍याम्।”

16 येशूजी चने “ओ मरियम” बिमा चइ खी ङाँइ तोसि हिब्रू क्युइर खीने “रब्‍बोनि” बिइ। (छ बिब “ओ गुरुज्‍यू” ग।)

17 येशूजी चने बिइ, “ङ आछुइद् तलेबिस्याँ ङ तोगो समा आबा ङाँर आह्‍याइमुँ। बरु ङए अलिमैं* 20:17 ङए अलिमैं खीए चेलामैं ङाँर ह्‍यासि चमैंने ‘तारे ङ ङए आबा, क्हेमैंए आबा, धै ङए परमेश्‍वर, क्हेमैंए परमेश्‍वर ङाँर ह्‍यासिन् मुँ’ बिसि ङए ताँ बिमिंन्।”

18 छबिमा मग्दालाथेंस्यो मरियम ह्‍यासि चेलामैंने “ङइ प्रभु म्रोंइ!” बिबै ताँ नेरो प्रभुजी बिबै ताँ या चमैंने बिइ।

19 च आइतबारए ङेसार चेलामैं यहूदी चिबनाँब्मैंने ङ्हिंसि म्रा तोरसि धिं न्होंर टिरिल। छले टिरिमा येशू चमैंए म्हाँजोर राखसि “क्हेमैं छिं ङ्हाँरिगे,” बिइ। 20 च्हौ बिसि खीजी चमैंने खीए यो नेरो कोखै या उँइँइ। “प्रभुन् मुँना” बिब् सेसि चेलामैं बेल्‍ले सैं तोंइ। 21 येशूजी धबै चमैंने बिइ, “क्‍हेमैं छिं ङ्हाँरिगे! आबाजी खैले ङ कुल्‍मिंइ, छलेन ङज्‍यै या क्‍हेमैं कुल्मिंब्मुँ।” 22 च्हौ बिसि खीजी चमैंए फिर सो फुइसि बिइ, “पबित्र प्ल्ह किंन्। 23 खाबै पाप क्हेमैंइ क्षमा लमुँ, चमैंए पाप क्षमा तमुँ। छलेन खाबै पाप क्हेमैंइ क्षमा आल, चमैंए पाप क्षमा आत।”✡ 20:23 मत्ती १६:१९; १८:१८

24 येशू चेलामैं ङाँर खमा च्युसे ङ्हिं चेलामैं न्होंर्बै दिदुमस बिबै थोमा चमैंने बालु आरेल। 25 छतसि अरू चेलामैंइ थोमाने बिइ, “ङिइ प्रभु म्रोंइ।”

दिलेया थोमाइ चमैंने बिइ, “खीए किला क्योबै यो आम्रोंन् समा धै किला क्योबै यो नेरो खीए कोखर ङए यो आझोंन् समा ङ चु ताँ क्वेंरिब् आरे।”

26 प्रेरो लिउँइ खीए चेलामैं म्रा तोरसि धिं न्होंर्न टिरिल। थोमा या चमैंने बालुन् मुँल। च त्हेर्न येशू धिं न्होंर होंखसि चमैंए म्हाँजुर रासि “क्‍हेमैं छिं ङ्हाँरिगे,” बिइ। 27 झाइले खीजी थोमाने बिइ, “योरि चुर झोंसि ङए योमैं ङ्‍ह्‍योद्। धै क्‍हिए यो ङए कोखरै झोंन्। संका आलल्‍ले बिश्‍वास लद्।”

28 छबिमा थोमाइ खीने “ओ ङए प्रभु, ओ ङए परमेश्‍वर!” बिइ।

29 येशूजी चने बिइ, “क्‍हिइमि ङ म्रोंबइले ङए फिर बिश्‍वास लइ, दिलेया ङ आम्रोंलेया ङए फिर बिश्‍वास लब्मैं ङ्‍हो सब्मैं ग।”

30 येशूजी अरू ल्हें औदिबै चिनुमैं चेलामैंए उँइँर लइ। च केमैं चु कितबर आप्ह्रिइमुँ। 31 दिलेया “येशू परमेश्‍वरए च्ह नेरो खीजी कुल्‍मिंबै म्रुँ ख्रीष्‍ट ग,” बिब क्हेमैंइ क्वेंरिगे धै खीए फिर बिश्‍वास लबइले क्हेमैंइ खोंयोंइ आखाँबै छ्ह योंरिगे बिसि ङइ चु ताँमैं प्ह्रिइमुँ।