1 झाइले पिलातसइ येशू न्होंर बोसि कोर्राइ प्रुबर ल्‍हैदिइ। 2 च लिउँइ सिपाइमैंइ पुजुए मुकुट बनेसि येशूए क्रर कुमिंइ, धै कलेजी रङर्बै क्वें खिमिंइ। 3 झाइले चमैं खी ङाँर खसि “येहूदिमैंए म्रुँ जय तरिगे!” बिदै खीलाइ प्लाँइ।

4 पिलातस धबै बैरु त्होंसि यहूदीमैंने बिइ, “ङइ चने तोइ छ्याब् आयों बिब क्हेमैंज्यै या सेरिगे बिसि ङइ च म्हि क्हेमैं ङाँर बैरु पुइमुँ।” 5 च लिउँइ पुजुए मुकुट नेरो कलेजी रङर्बै क्वें खिसि येशू बैरु त्होंयुमा पिलातसइ चमैंने बिइ, “लु, चु म्हिलाइ ङ्‍ह्‍योद्।”

6 येशू म्रोंबै तोदोंन् ख्रो पिंबै खेगि चिब्मैं नेरो मन्दिर रुँब्मैंइ ओरदै, “च क्रूसर च्योवाद्! च क्रूसर च्योवाद्! बिबर होंइ।”

छतमा पिलातसइ चमैंने बिइ, “क्‍हेमैंइन चु म्हि बोसि क्रूसर च्योवद्। तलेबिस्याँ ङइ चुने तोइ छ्याब् आयोंइमुँ।”

7 यहूदी चिबनाँब्मैंइ चने बिइ, “ङिए ठिमर बिब् धोंले चु सिलन् त्हुम्। तलेबिस्याँ चुइ ह्रोंसलाइन परमेश्‍वरए च्ह ग बिइमुँ।”

8 चु ताँ थेसि पिलातस झन् ङ्हिंयाँइ। 9 छतमा च धबै दरबार न्‍होंर होंसि “क्‍हि खनर्बै जा?” बिसि येशूने ङ्योएमा येशूजी चने तिजी या ज्वाफ आपिं। 10 छतमा पिलातसइ खीने बिइ, “क्हि ङने आपों वा? क्हि पिवाबै हग ङने मुँ, धै क्रूसर च्योवाबै हगै या ङने मुँ बिसि क्हिजी आसेइमुँ वा?”

11 येशूजी बिइ, “परमेश्‍वरजी आपिंस्याँ क्हिला ङए फिर तोइ हग आतमल। छतसि ङलाइ क्हिए योर पिंवाबै म्हिए फिर पापए छ्याब् झन् ल्हें तब्मुँ।”

12 च लिउँइ पिलातसइ येशूलाइ पिवाल् म्हैइ। दिलेया यहूदीमैं छ बिदै ओरइ, “क्हिइ चु म्हि पिवाइ बिस्याँ क्हि रोमी कैसर म्रुँए थु तरिब् आरे। ह्रोंसलाइन म्रुँ ग बिबै म्हिन् कैसरए बिरोधर तब्मुँ।”

13 पिलातसइ चु ताँ थेसि येशू दरबारए बैरु पुयुसि “युँमाइ स्युबै ह्‍यु” बिबै क्ल्ह्‍योरि निसाफ लबर क्हुँइ। (हिब्रू क्युइर च ह्‍युए मिं गब्‍बथा बिमुँ।) 14 च त्हे दुःखने फ्रेबै चाडए ल्हागिर चैदिबै सैमैं तयार लबै त्हिंइ✡ 19:14 लेबी २३:५-८ मुँल। च त्हेर त्हिंयाँर्बै च्युसे ङ्हिं ह्राबि छेमा। पिलातसइ यहूदीमैंने “ङ्‌ह्‍योद्, क्हेमैंए म्रुँ,” बिइ।

15 छबिमा “बोयाद्, बोयाद्, च क्रूसर च्योवाद्!” बिसि चमैं ओरइ।

छतमा पिलातसइ चमैंने “ङइ क्‍हेमैंए म्रुँ क्रूसर च्योवाद् वा?” बिसि ङ्योएमा

“रोमी कैसर म्रुँ बाहेक् ङिला अरू म्रुँ आरे,” बिसि ख्रो पिंबै खेगि चिब्मैंइ बिइ।

16 झाइले पिलातसइ येशूलाइ क्रूसर च्योवाद् बिसि यहूदीमैंए योर पिंवाइ। धै सिपाइमैंइ येशू बोयाइ।

17 येशूजी ह्रोंसए क्रूस ह्रोंसइन नोसि क्र खोप्‍लें बिबै क्ल्ह्‍योर ह्‍याइ। (हिब्रू क्युइर च क्ल्ह्‍योए मिं गलगथा बिमुँ।) 18 चर चमैंइ खी क्रूसर च्योवाइ धै खीए क्‍योलोउँइ म्हि घ्रि त्हर्ग्योउँइ म्हि घ्रि च्योवाइ। येशू बिस्याँ चमैंए म्हाँजोर मुँल। 19 झाइले पिलातसइ “नासरतरथें येशू, यहूदीमैंए म्रुँ ग” बिबै छ्याब् प्ह्रिसि क्रूसए फिर टौंदिल् पिंइ। 20 येशू क्रूसर च्योवाबै क्ल्ह्‍यो यरूशलेम सहरए चेंदोन् मुँल। छतसि ल्हें म्हिइ छले प्ह्रिथेंबै छ्याब् खेइ। च ताँ हिब्रू, रोमी, नेरो ग्रिक क्युइर प्ह्रिथेंल। 21 ख्रो पिंबै खेगि चिब्मैंइ पिलातसने बिइ, “ ‘यहूदीमैंए म्रुँ ग’ बिब आङिं, बरु ‘चुइ ङ यहूदीमैंए म्रुँ ग बिल’ बिसि प्ह्रिमिंन्।”

22 दिलेया पिलातसइ “मुँरिगे! ङइ तो प्ह्रिइ छाबन् मुँरिगे,” बिइ।

23 झाइले सिपाइमैंइ येशू क्रूसर च्योवासि खीए क्वें प्लिसि प्लिबाँ लसि ताँन् सिपाइमैंइ चुइ। धै खीए फिर्बै क्वें या चमैंइ किंइ। च क्वें ताइले माइ समन् आटुल्‍ले योइ रोब् मुँल। 24 छतसि चमैंइ खेंमैंए न्होंर बिइ, “चु क्वें आट्होले, बरु चु खाबल् तम् बिसि चिट्ठा झोंले।” परमेश्‍वरए छ्वेर प्ह्रिबै ताँ पूरा तरिगे बिसि छ तब् ग।

25 येशूए क्रूस ङाँर्न खीए आमा, खीए आमाए अङाँ, क्लोपासए प्ह्रेंस्यो मरियम नेरो मरियम बिबै मग्दालाथेंस्यो रारिल। 26 झाइले येशूजी खीए आमा नेरो खीजी खोबै चेला चर रारिब् म्रोंसि आमाने बिइ, “ओ आमा, ङ्‍ह्‍योद्, चु क्हिए च्ह ग!” 27 छलेन खीजी खोबै चेलाने बिइ, “ङ्‍ह्‍योद्, चु क्हिए आमा ग!” च त्हेसेरो च चेलाइ येशूए आमा खीए धिंर न्हबर बोइ।

28 च लिउँइ येशूजी तारे ताँन् के लल् खाँइ बिब् सेसि परमेश्‍वरए छ्वेर प्ह्रिबै ताँ पूरा तरिगे बिसि “ङ क्यु पिइ,” बिइ।✡ 19:28 भज ६९:२१; २२:१५ 29 चर प्हा क्युँइ प्लिंबै कुँइँडि घ्रि मुँल। चमैंइ च प्हा क्युँर ह्रुइ प्ल्हुँसि हिसप बिबै सिंए प्हरेर फैसि खीए सुँर झोंमिंइ। 30 झाइले येशूजी प्हा क्युँ थुँसि बिइ, “तारे ङए के खाँयाँइ!” च्हौ बिसि क्र कुरसि खीजी सो पिवाइ।

31 च त्हिंइ प्रिबै त्हिंइए ल्हागिर चैदिबै सैमैं तयार लबै त्हिंइ मुँल। यहूदीमैंइ प्रिबै त्हिंइर के आलमल। धै च खास प्रिबै त्हिंइ मुँल। छतसि सिनुमैं क्रूसर आतरिगे बिसि चमैंइ पिलातसने यो छ्युँ लसि “चमैंए प्हले चोवासि चमैंए ज्यु बोयारिगे,” बिइ।* 19:31 चमैंए प्हले चोवासि चमैंए ज्यु बोयारिगे क्रूसर च्योवाबै म्हिमैं खोंयों खोंयों ल्हें त्हे समा आसिमल। छतसि चमैंए प्हले चोवास्याँ सो सेंल् आखाँमल धै युनन् सियामल। 32 छबिमा सिपाइमैं खसि येशूने बालु क्रूसर च्योवाब्मैंए प्हले घ्रि घ्रिले चोवाइ। 33 झाइले चमैं येशूए प्हले चोबर खमा खीजी ओंसोंन् सो पिवाल् खाँब् म्रोंइ। छतसि खीए प्हले आचो। 34 दिलेया सिपाइमैं न्होंर्बै घ्रिइ खीए कोखर बर्साइ ल्हिबै तोदोंन् को नेरो क्यु त्होंइ। 35 (क्हेमैंज्यै या क्वेंल् खाँरिगे बिसि चु ताँ म्रोंबै म्हिइ खै तब् म्रोंइ छाबन ग्वाइ पिंसि बिब् ग। चए ग्वाइ क्ह्रोंसेंन्ब मुँ, धै ह्रोंसइ क्ह्रोंसेंन्बै ताँ बिइमुँ बिसि चइ सेइमुँ।)

38 अरिमाथियाथें योसेफ बिबै म्हि घ्रि येशूए चेला मुँल। च यहूदी चिबनाँब्मैंने ङ्हिंमल छतसि आसेल्‍ले न्हों-न्हों मत्‍त्रे येशूए चेला मुँल। चइ पिलातसने येशूए सिनु बोयाल् पिंन् बिसि यो छ्युँ लमा पिलातसइ येशूए सिनु बोल् पिंइ। धै चइ येशूए सिनु बोइ। 39 म्हुँइँसर ओंसोंन् येशू ङाँर खबै निकोदेमस या योसेफने बालु ह्‍याइ। चइ सोंच्युसे सों किलोदे गन्धरस नेरो एलवा कोंबै द्रब्य किंसि चर बोइ।✡ 19:39 यूह ३:१-२ 40 यहूदीमैंए सिबै त्हेर लबै रोस् धोंले चमैंइ लिंबै थाँ खबै अत्तर येशूए सिनुर फोसि सुतिए क्वेंर म्होरइ। 41 येशू क्रूसर च्योवाबै क्ल्ह्‍योए रेर्न बगैंचा घ्रि मुँल। च बगैंचार खाबइ आपाबै छारा छगों घ्रि मुँल। 42 च त्हे क्‍यु सैसि म्हाँदिबै चाडए ल्हागिर तयार लबै त्हिंइ मुँल। धै च छगों या चेंदोन् मुँबइले चमैंइ येशू चर्न थेंइ।