1 “ओ आघें-अलि नेरो आबामैं, ङइ क्हेमैंए उँइँर बिल् त्हुबै ताँ तारे थेमिंन्।”

2 पावलइ हिब्रू क्युइर पोंब् थेसि चमैं ताँन् च्याँ तयाइ। छतमा चइ बिइ, 3 “ङ किलिकिया ह्‍युलर्बै टार्ससथें यहूदी ग, दिलेया ङ चु यरूशलेमर गमलिएल बिबै ङए गुरुए योउँइँले फारब् ग। धै ङ्योए खेमैंइ म्हाँदिबै रोसमैं ङइ छेनाले लोइमुँ। तिंयाँ क्‍हेमैंइ परमेश्‍वरलाइ सैं न्होंउँइँले म्‍हाँदिब् धोंले ङज्‍यै या खीलाइ म्‍हाँदिदा ङ्हाँइँमुँ।✡ 22:3 चिब्मैं ५:३४-३९ 4 येशूए घ्याँर✡ 22:4 यूह १४:६ प्रबै म्हिमैंलाइ ङइ ह्रुगुदिसि सैल् म्हैमल, मुँयुँमैं नेरो च्हमिरिमैं ङ्हिंना-ङ्हिंन् फैसि झेलर च्युवामल।✡ 22:4 चिब्मैं ८:३; २६:९-११ 5 चु ङइ बिबै ताँ क्ह्रोंसेंन् ग बिसि ख्रो पिंबै खेगि क्रथे नेरो ताँन् थेबै म्हि च्हों या ग्वाइ पिंल् खाँम्। खेंमैंउँइँले ङइ दमस्‍कस सहरर्बै यहूदीमैंए मिंर प्ह्रिछ्या योंइ। छले हग योंसि ङइ दमस्‍कसर मुँबै प्रभुए फिर बिश्‍वास लब्मैं सजैं पिंबर फैसि यरूशलेमर पखबर दमस्कसर ह्‍याल।

6 “ङ ह्‍यामा-ह्‍याम् दमस्‍कस फेखबि छेमा त्हिंयाँ आधाजरे तिखेर्न स्वर्गउँइँले थेबै ह्‍वे ङए कारग्यु चारइ। 7 छतमा ङ सर क्हुरिह्‍याइ, धै ‘ओ शाऊल, शाऊल, क्हिइ तले ङ ह्रुगुदिमुँ?’ बिबै कै घ्रि ङइ थेइ।

8 “छबिमा ‘ओ प्रभु, क्हि खाब् जा?’ बिसि ङइ ङ्योएमा खीजी ‘क्हिइ ह्रुगुदिरिबै नासरतर्बै येशू ङन् ग,’ बिइ। 9 ङने मुँबै म्हिमैंइ व्हेम् म्रोंइ, ङइ थेबै कै बिस्याँ चमैंइ आथे।

10 “छतमा ‘ओ प्रभु, तारे ङइ तो लले?’ बिसि ङइ ङ्योएमा प्रभुजी ङने बिइ, ‘रेसि दमस्‍कसर ह्‍याद्, परमेश‍वरजी क्हिने लद् बिबै केमैं ङइ क्हिने बिमिंब्मुँ।’ 11 च ह्‍वे चाराबै लमा ङइ तोइ म्रोंल् आखाँ। छतसि ङने मुँब्मैंइ डोरेदै ङ दमस्‍कसर पखइ।

12 “चर हननिया बिबै म्‍हि घ्रि मुँल। चइ मोशाइ पिंबै ठिम बेल्‍ले छेनाले म्हाँदिमल। धै दमस्कसर टिबै ताँन् यहूदीमैंइ चए मान लमल। 13 च हननिया ङ ङाँर खसि ङए उँइँर रासि ङने बिइ, ‘शाऊल अलि, क्हिए मि म्रोंल् खाँरिगे।’ छ बिबै तोंदोंन् ङए मि म्रोंल् खाँब् तसि ङइ चलाइ म्रोंइ। 14 च लिउँइ चइ ङने बिइ, ‘ङ्योए खेमैंए परमेश्‍वरजी खीए सैंर्बै ताँ क्हिइ सेल् खाँरिगे, खीए छ्याँबै के लबै येशूलाइ म्रोंल् खाँरिगे, धै खीए सुँउँइँले पोंबै ताँमैं थेल् खाँरिगे बिसि क्हिलाइ त्हाँइमुँ। 15 तलेबिस्याँ क्हिइ म्रोंब नेरो थेबै ताँमैं ताँन् म्हिमैंए उँइँर खीए ग्वाइ तसि क्हिजी बिमिंल् त्हुब्मुँ। 16 छतसि तारे तले क्हैल् लरिमुँ? रेद्! येशूए मिं किंसि ह्रोंसए आछ्याँबै केमैं ख्रुवाबर क्युर प्ल्हुँसि बप्‍तिस्मा किंन्।’

17 “च क्ल्ह्‍योउँइँले यरूशलेमर एखबै लिउँइ मन्दिरर प्राथना लरिमा ङ प्रभुने बेल्‍ले चेंदो तसि ङइ प्रभु म्रोंइ। 18 खीजी ङने, ‘युनन् यरूशलेमउँइँले त्होंह्‍याद्, तलेबिस्याँ ङए बारेर क्हिइ पिंबै ग्वाइ चमैंइ क्वेंरिब् आरे,’ बिमा 19 ङइ बिइ, ‘ओ प्रभु, ङइ च्हों धिंजरे ह्‍यासि क्हिए फिर बिश्‍वास लब्मैं धोंसि झेलर च्युवाब चमैं ताँनइ सेइमुँ। 20 चमैंइ क्हिए ग्वाइ पिंबै स्‍तिफनस सैवामा ङै या चमैंने क्ह्रिसि चलाइ सैवाबै म्हिमैंए क्वें रुँसि टिल।’✡ 22:20 चिब्मैं ७:५८ 21 छबिमा प्रभुजी ङने ‘ह्‍याद्, तलेबिस्याँ ह्रें-ह्रेंगोर्बै अरू ह्रेंमैं ङाँर ङइ क्हि कुल्मिंब्मुँ,’ बिइ।”

22 म्हि हुलइ पावलए ताँ च्हौ समा छेनाले थेइ। दिलेया च लिउँइ चमैइ “छाबै म्हि पृथ्‍बीउँइँले स्योवाद्। च सोबै लायकर्बै आरे,” बिदै ओरबर होंइ। 23 धै ह्रिसइ खेंमैंए क्वें ट्होदै त्हुल् उडिदै चमैं झन् सारले ओरइ।

24 छतमा रोमी पलटनर्बै चिबइ बिइ, “चलाइ ब्यारेक न्होंर पखसि कोर्राइ प्रुद्। चए बिरोधर म्हिमैं तले छले कै तेसि ओररिइमुँ बिसि चने ङयोएद्।” 25 झाइले सिपाइमैंइ पावललाइ ट्हिबिए छोइ फैबर होंमा पावलइ चेंदो रारिबै कप्‍तानने “तोइ छ्याब् आरेबै रोमी नागरिकलाइ* 22:25 रोमी नागरिक च त्हेर रोमी ग्याल्सर को-कोइ म्हि मत्‍त्रे रोमीथेंमैं मुँल। खाबै या रोमीथें मुँस्‍याँ च म्‍हि तोनतोर्न धोंब नेबै थेबै सजैं पिंल् आतमल। क्हेमैंइ कोर्राइ प्रुब ठिक मुँ वा?” बिसि ङ्योएइ।

26 चु ताँ थेसि कप्‍तानइ पल्टनर्बै चिब ङाँर ह्‍यासि “क्हिइ तो लल् म्हैल? चु म्हिम् रोमी नागरिक मुँना,” बिइ।

27 झाइले पल्टनर्बै चिब पावल ङाँर खसि “ङने बिद्, क्हि रोमी नागरिक वा?” बिसि ङ्योएमा खिइ बिइ, “ओं, ङिंबन् ग।”

28 छबिमा चिबइ “ङम् मुइ ल्हें फोसि रोमी नागरिक तब् ग,” बिमा पावलइ बिइ, “ङम् फिब् ओंनोंन् रोमी नागरिक ग।”

29 चु ताँ थेबै तोंदोंन् पवालने ङ्युलु-च्युलु लबै म्हिमैं स्योयाइ। पावल रोमी नागरिक मुँना बिब् सेसि चिबै या ङ्हिंयाँइ, तलेबिस्याँ चइ पावल फैबर ल्हैदिल।

30 दिलेया प्हँन्हाँग्धों यहूदीमैंइ पावलए फिर तो ताँर छ्याब् ल्हैदिगे बिसि पल्टनर्बै चिबइ क्होबै सैं लसि चलाइ प्ल्हमिंइ, धै ख्रो पिंबै खेगि क्रथेमैं नेरो थेबै म्हि च्हों खागु लसि पावल क्युरु पुइसि चमैंए उँइँर राल् पिंइ।