1 एफिसस चर्चर्बै एल्डरमैंने फ्रेसि ङि क्यु झाजर क्रेसि कोस बिबै क्ल्ह्‍योर सरासर खइ, धै प्हँन्हाँग्धों रोडसर फेखइ, छाइले नुइँम्दों पटारा बिबै सहरर फेखइ। 2 झाइले फोनिके ह्‍युलर ह्‍याबै क्यु झाज घ्रि स्यासि ङि चर क्रेसि ह्‍याइ। 3 छले ह्‍यामा ङि साइप्रस बिबै टापूए चेंदो फेखमा ङिइ च टापूए त्हेब्ब्रेउँइँले सिरिया ह्‍युलउँइ ह्‍यासि टुरोस सहरर तइ, तलेबिस्याँ क्यु झाजर्बै समनमैं चर खारल् त्हुमल। 4 झाइले ङि चर्बै चेलामैंने त्होसि ङिरो चर्न टिइ। पबित्र प्ल्हउँइँले चमैंइ “यरूशलेमउँइँ आह्‍याद्!” बिसि पावलने बिइ। 5 च क्ल्ह्‍योउँइँले ङि प्रबै त्हे तबइले ङि चमैंने फ्रेसि ह्रोंसए घ्याँ क्हामा। चर्बै प्रभुए फिर बिश्‍वास लब्मैंइ ह्रोंसए परवा, प्हसेमैं ताँन् किंसि ङि सहरए बैरु समन् सबर खइ। धै ङि मा ङ्युँइए छेउर च्हि तुँसि प्राथना लइ, धै चमैंने फ्रेसि 6 ङि क्यु झाजर क्रेइ। चमैं बिस्याँ खेंमैंए धिंर एह्‍याइ।

7 टुरोसउँइँले मा ङ्युँइए घ्याँ क्हासि ङि टोलेमाइसर फेखइ। चर प्रभुए फिर बिश्‍वास लब्मैंने त्होसि चमैंने बालु तिरो टिइ। 8 प्हँन्हाँग्धों ङि चमैंने फ्रेसि कैसरियार खइ, धै सैं तोंबै ताँ बिदै प्रबै फिलिपए धिंर ह्‍यासि चर्न टिइ। फिलिप यरूशलेमर प्रभुए सेवा लबर त्हाँबै ङिउलो न्‍होंर्बै म्‍हि घ्रि मुँल।✡ 21:8 चिब्मैं ६:५; ८:५ 9 चला ब्ह्‍या आलबै च्हमि प्लि मुँल। चमैं या अगमबक्‍तामैं मुँल।

10 ङि चर दे त्हिंइ टिमा यहूदीयाउँइँले अगाबस मिं मुँबै अगमबक्‍ता घ्रि खइ।✡ 21:10 चिब्मैं ११:२८ 11 चइ पावलए फगि किंसि ह्रोंसए यो प्हले फैसि बिइ, “ ‘चु फगिए क्ल्हे यरूशलेमर ह्‍याइ बिस्याँ चर्बै यहूदीमैंइ चलाइ छलेना फैसि अरू ह्रेंमैंए योर पिंवाब्मुँ,’ बिसि पबित्र प्ल्हजी बिइमुँ।”

12 चु ताँ थेसि ङि नेरो चर्बै म्हिमैं क्ह्रिसि पावलने “यरूशलेमर आह्‍याद् ओ!” बिसि यो छ्युँ लइ। 13 दिलेया खिइ बिइ, “क्‍हेमैं छले क्रोसि ङए सैं तले च्योंब् लमुँ? प्रभु येशूए ल्हागिर ङ जेलर फैब् मत्‍त्रे आङिं, यरूशलेमर सिल् त्हुनाबिलेया ङ तयार मुँ।”

14 ङिइ बिब खिइ आङिंमा “प्रभुए सैंर मैंब् धों तरिगे,” बिसि ङि तोइ आबिल्‍ले टिइ।

15 च लिउँइ ङिइ चैदिबै समानमैं तोन्दोंरि तौदु लसि यरूशलेमउँइँ ह्‍याइ। 16 ङिने बालु कैसरियार्बै को-कोइ चेलामैं या ह्‍याल। चमैंइ ङिलाइ मनासोन बिबै साइप्रसथेंए धिंर बोइ। च ओंसोंन प्रभुए फिर बिश्‍वास लबै म्हि मुँल। चए ङाँर्न ङि टिइ।

17 झाइले ङि यरूशलेमर फेनेमा, चर्बै प्रभुए फिर बिश्‍वास लब्मैंइ सैं तोंसि ङि बेल्‍ले मान लइ। 18 प्‍हँन्हाँग्‍धों पावल ङिने याकूब ङाँर ह्‍यामा चर्चर्बै ताँन् एल्डरमैं चर खागु तल। 19 चमैंने जय मसीह लसि पावलइ “अरू ह्रेंमैंए म्हाँजोर सैं तोंबै ताँ बिप्रमा परमेश्‍वरजी ङउँइँले तो-तो केमैं लइ,” बिसि ताँन् ताँमैं घ्रि-घ्रिले चमैंने बिइ।

20 चु ताँ थेबै लिउँइ चमैंइ परमेश्‍वरए मिं क्वेइ। धै च एल्डरमैंइ पावलने बिइ, “थेद् अलि, चुर यहूदीमैं न्होंरै या प्रभुए फिर बिश्‍वास लब्‍मैं ल्हेंन् मुँ। चमैंइ मोशाइ पिंबै ठिममैं या छेनाले म्हाँदिम्। 21 दिलेया चमैंइ क्हिए बारेर स्योलिबै ताँ थेइ। ‘मोशाइ पिंबै ठिम पिवाद्, धै कोलोमैंए ज्युर चिनु आलद्, यहूदी रोस आम्हाँदिद्,’ बिसि क्हिइ अरू ह्रेंमैंए म्हाँजोर टिबै यहूदीमैंलाइ लोमिंइँमुँ रो। 22 तोगो क्हि खइमुँ बिब चमैंइ खैले बिलेन् थेब्मुँ। तारे तो लब् जा? 23 छतसि ङिइ बिब् धों लद्। चोखो तले बिसि भक्‍कल् लबै म्हि प्लि ङिने बालु मुँ। 24 चमैंने बालु क्हि या चोखो तदु, चमैंए खर्ज या क्हिइन फोमिंनु।✡ 21:23-24 गन्ती ६:१३-२१ धै चमैंइ क्र खोररिगे। छले क्हिइ ठिम म्हाँदिब् म्रोंसि क्हिए बारेर ओंसों थेबै आछ्याँबै ताँ क्ह्रोंसेंन् आङिंन बिसि ताँनइ सेब्मुँ। 25 प्रभु येशूए फिर बिश्‍वास लबै अरू ह्रेंमैंइ बिस्याँ, ‘कुर ख्रो पिंबै सैमैं नेरो को आचदु, खरि ङिसि सैबै खेदोए से आचदु, धै ब्यभिचार आलदु,’ बिसि ङिइ प्ह्रिछ्यार प्ह्रिइमुँ।”✡ 21:25 चिब्मैं १५:२९; लेबी १८:६-२३; २०:१०-२१; व्य २२:१३-३०

26 छबिमा पावलइ च भक्‍कल् लबै म्हि प्लि बोसि प्हँन्हाँग्धों चमैंने बालु ह्रोंसै या चोखो तबै के लइ। धै खेंमैंए चोखो तबै त्हिंइ खोंयों पूरा तब् ङ्‍हे धै चमैं घ्रि-घ्रिए ल्हागिर ख्रो खोंयों पिंब्मुँ बिसि था पिंबर पावल मन्दिर न्होंर होंइ।

27 छले चमैं चोखो तसि ङिरो तबि छेमा एशिया ह्‍युलर्बै यहूदीमैंइ मन्दिरर पावल म्रोंमा चर्बै म्हिए हुललाइ सुरिदिवासि पावललाइ क्हाइ। 28 “ओ इस्राएलर्बै म्हिमैं, ङि ल्होमिंन्! तलेबिस्याँ चु खन्तोंदोंबै म्हिमैंने ङ्योए ह्रें, ङ्योए ठिम नेरो चु मन्दिरए बिरोधर लोमिंदै प्रबै म्हि चुन् ग। च्हौ मत्‍त्रे आङिं, चुइ ग्रिकमैं या चु मन्दिर न्होंर पखसि ङ्योए पबित्र क्ल्ह्‍यो अशुद्ध लवाइमुँ,” बिदै चमैं ओरबर होंइ। 29 तलेबिस्याँ ओंसों चमैंइ एफिससथें त्रोफिमस बिबै म्हि घ्रि पावलने बालु सहरर म्रोंबइले पावलइ च म्हि मन्दिर न्होंर पखब ग ङ्हाँइ।

30 ताँन् सहरर खैला-बैला तमा ल्हें म्हि न्हेखसि पावल क्हाइ। चमैंइ मन्दिरउँइँले पावल बैरु चैं पखमा खेगिमैंइ युन्ले मन्दिरर्बै म्रामैं तोरावाइ। 31 झाइले चमैंइ पावल सैल् म्हैल। च त्हेर्न यरूशलेम तिगोंन् खैला-बैला तरिइमुँ बिबै ताँ रोमी पल्टनर्बै चिबए न्हर थेनेइ। 32 चिबइ चु ताँ थेबै तोंदोंन् सिपाइमैं नेरो कप्‍तानमैं बोसि चमैं ङाँर न्हेयाइ। चमैंइ पल्टनर्बै चिब नेरो सिपाइमैं खरिब् म्रोंमा पावल धोंब पिवाइ।

33 च पल्टनर्बै चिब खसि पावल क्हासि सँउँलि ङ्हिंइ फैबर ल्हैदिइ। धै “चु म्हि खाब् जा? चुइ तो लइ?” बिसि चर्बै म्हिमैंने ङ्योएइ। 34 चर्बै म्हिमैं न्होंरि कोइ तिथो, कोइ अर्कोन् ताँ लसि ओरइ। छले चर्बै म्हिमैंए हल्‍लाइ लमा चर तो तरिइमुँ बिसि क्होल् आखाँबइले पल्टनर्बै चिबइ सिपाइमैंने “पावल ब्यारेकर बोयाद्!” बिइ। 35 छले पावल ब्यारेकर्बै खटकटिर फेखमा म्हिमैं झन् ह्रिसइ बेल्‍ले ओरसि पावलए उँइँर कारग्यु तखइ। छतब् म्रोंसि सिपाइमैंइ च क्वेबोइ। 36 तलेबिस्याँ म्हिए हुल चए लिलि ल्हैदिसि “च सैलन् त्हुम्!” बिसि ओरदै खइ।

37 ब्यारेक न्होंर होंबि छेमा पावलइ पल्टनर्बै चिबने “चिब, ङइ ताँ घ्रि क्हिने बिल् योंम् उ?” बिमा चिबइ बिइ, “क्हिइ ग्रिक क्युइ पोंल् ह्रम्मा? 38 क्हि च मिश्रथें आङिं वा? चइ ओंसों प्होंगि कैगि लसि हजार प्लि प्होंगि लब्मैं क्यु आयोंबै क्ल्ह्‍योर बोयाल।”

39 छबिमा पावलइ बिइ, “आङिं चिब। ङम् किलिकिया ह्‍यलर्बै टार्ससथें यहूदी ग। च टार्सस थेबै सहर ग। चु म्हिमैंने ङइ ताँ तिजी-ङ्हिजी बिल् पिंन् ओ।”

40 पावलए ताँ थेसि चिबइ पोंल् पिंइ, धै पावल खटकटिर रासि म्हिमैंने योइ हस्त लमा म्हिमैं तोइ आबिल्‍ले च्याँ तबै लिउँइ चइ चमैंने हिब्रू क्युइर पोंबर होंइ।