8
Yeisu boda aivasi tausani (4,000) ivaakanidi tetelina
(Madiu 15:32-39)
1 Amo tutayana aiyuwoina boda gagaina sikaaiyaka Yeisu taiyao go, geya avadimo. Tuwo ina tovatotowanayao iduduwedi sima, ilatuwokoidi idigo kana,
2 ‘Ame bodayadi bogina maliyalina aito sikaaiyaka go, geya avadimo, tauna anuwokapisiyedi. 3 Maniyedi aduwanau goi sima. Neta alatuwokoidi madi loga sisáwala, e nakona maniyedi enao goi bei simataginigini. Tauna anuwokapisiyedi.’
4 Go kidi ina tovatotowanayaoyadi sidigo kadi,
‘Ame yoyowo go! Manakaeda beredi takabidi nakae bei itoboineda ame tomotayadi tavakanidi sikáika gamodi? Geya vatau tayaamo itoboine!’
5 Go kina idigo kana,
‘Aivina imi beredi moedi?’
‘Geya, ainima aiyuwo’, kidi kaedi.
6 Tuwo bodayadi ilatuwokoidi poyapoya goi situsobu. Ikavava, berediyadi ainima aiyuwo ikabidi, ikauyagu Yaubada yaina. Ikavava, ikivisidi, ina tovatotowanayao ivinidi bego sikaiguyauyedi. Tuwo moitamo sikabidi sina sikaiguyauyedi tomota yaidi. 7 Íyana maniyedi giyaidi nakae sibabanedi, tuwo Yeisu ikabidi, manudi ikauyagu Yaubada yaina namliyeta ina tovatotowanayao ilatuwokoidi iyanayadi nakae sikaiguyauyedi. Tuwo nakae siguinuwe. 8 Sikaiguyauyedi, boda sikabidi, sikáika gamodi. Sikáika ikavava, valala sikatunokunokudi, bayao gagaidi ainima aiyuwo sikayaoda. 9 Ego bodayadi adi badabada moe aivasi tausani (4,000) nakae. Sikáika ikavava, Yeisu ilatuwokoidi sisáwala. 10 E bodayadi sisáwala go, kina mana tovatotowanayao oga sisowoya, sikailova sina Dalimanuta ana dadava.
Parisi latuwodi aba kinana
go, Yeisu ina katumátala adi isti manuna
go, Yeisu ina katumátala adi isti manuna
(Madiu 16:1-12)
11 Yeisu mana tovatotowanayao sima sivaiu, sisou go, kidi Parisi maniyedi sima Yeisu sikaumakimakiye; latuwodi sivakakone, tuwo sidigo kadi,
‘Aba kinana tayamo kuvatulukōima bei kayagoi kom moitamo Yaubada goi kuma.’† Mad 12:38; Luk 11:16.
12 Go Yeisu mana kategeda ikalayawoi idigo kana,
‘Tomota ame tomotayadi nakae manakae aba kinana siilusale? Moe sinapu igoyo go, ame alatuuwokoimi konōve: Yaubada geya tayaamo aba kinana bei ivinidi!’† Mad 12:39; Luk 11:29.
13 Ibóbwara ikavava, itaoya, ikalavedi go, iiwo ina oga goi aiyuwoina isowoyamna mana tovatotowanayao sikailova silokoina sina ituli ta dadava. 14 Sinonoina go, ina tovatotowanayaoyadi sigite beredi sinuwoilave bego sikabi. Beredi tayamo toito oga goi ikaaiyaka, ame tauna. 15 Go Yeisu livalakaibala goi ikatumatalidi idigo kana,
‘Ami dodōkana kidi Erodi be Parisi idi isti goi.’† Luk 12:1.
16 Ago ina livalayana kidi sitainasiye, tuwo taudiva sibobóbwara kadi,
‘Nakona amo nakae ilatuwokoida unana kita beredi tanuwoilave.’
17 Ago Tauyana bogina iyagoi manakaedi sinuwonúwana, tuwo idigo kana,
‘Kaga pasina amitava kobobóbwara bego geya ami beredimo? Nava geya koyagoidokoeta ae? Manakae? Nava dabami sikasa? 18 Manakae? Maa matami go, geya kogitegite? Ma taaiyami go, geya konovenove?† Yer 5:21; Isi 12:2; Mak 4:12. Geya konuwaisiyeta boi kaga iisowóduwo? 19 Boi tutayana beredi ainima goi tomota ainima tausani (5,000) avakanidi go, aivina valala ma bayaoidi kokatunokunoku?’
Tauyadi sidigo kadi,
‘Yawou aiyuwo.’
20 ‘Aiyuwoina boi tutayana beredi ainima aiyuwo goi tomota adi badabada aivasi tausani (4,000) avakanidi, aivina valala ma bayaoidi kokatunokunoku?’ Yeisu kaena.
Sidigo kadi,
‘Ainima aiyuwo.’
21 Ago Tauyana idigo kana,
‘Manakae? Nava ame guinuwayadi adi yagoina geya koyagoidita ae?’
Yeisu tokebo ikideedevine tetelina
22 E Yeisu mana tovatotowanayao bogina sina Betesaida goi sivaiu, sisou. Sisou go, boda maniyedi tayamo tokebo koroto sime Yeisu yaina goi sikawanoi makimaki sidigo kadi,
‘Tomoya, siyama kubisikōne bei idedevina.’
23 Tuwo itaoya tokeboyana nimana ibisikedekede inave asayana goi sisowóduwo go, Yeisu igíwala tokeboyana matana goi namliyeta baige matana ibisikone. Ikavava, ilumadade kana,
‘Kaga itoboinem kugite?’
24 Tokeboyana idigo kana,
‘Tomota agitedi. Nakae agitedi sivaabebeo go, adi kaigigita alova nakae.’
25 Tuwo aiyuwoina Yeisu ibisibala korotoyana matana ibisikonemneidi, e matanayadi sikatupailala be nakae sidedevina, tauna itoboine kaga liliuna igitedokoidi. 26 Ago Yeisu idigo kana,
‘Kuseivāta kūna im kasa go, taabu kwaaluvīla asayana goi.’
Yeisu kina Guyau go,
mana tosabokuliyao gedageda bei sibabane
mana tosabokuliyao gedageda bei sibabane
(Maki 8:27—9:1)
27 Tuwo Yeisu mana tovatotowanayao sitaoya sina Sesariya Pilipai asainao. Sinonoina go, enao goi Yeisu ilumadadedi idigo kana,
‘Tomota sibobóbwara koonovedi manakaedi sinuuwonúwana yau manugu?’
28 ‘Tomota maniyedi sidigodigo bego kom Iyoni tosayóyova. Go maniyedi sidigodigo bego kom Eliyau. Go maniyedi sidigodigo bego kom Yaubada ina tokabivalavala tayamo’, tauyadi kaedi.† Mak 6:15; Luk 9:7-8,19.
29 Go Yeisu idigo kana,
‘Go komi manakaemi konuwonúwana yau manugu?’
Pita idigo kana,
‘Kom Guyau!’† Iyo 6:68-69.
30 Yeisu ikatumatalidi idigo kana,
‘Moe geya vatau tayaamo kolaatuwōko.’
31 Tuwo ivatowo ivatulukoidi idigo kana,
‘Tomalatomota gedageda badabadaidi bei ibabanedi. Aiyuwoina tomoyamoya be Tonúwala Gagaidi be Yaubada ina Katukeda ana tovatulukwanayao bei sikatae namliyeta sikaumate go, maliyalina aitonina goi bei itaoyamna.’
32 Moe Yeisu toinina italavaitedoko, tauna Pita itaoya Yeisu ikabi, adi taiyuwo sibala sina masigava goi, e Pita ivatowo Yeisu ibove. 33 Go kina Yeisu itugavila ina tovatotowanayao igitedi go, Pita ibove, idigo kana,
‘Kom nuwom geya kuyatoeta Yaubada ina nuwonúwana goi, go sem nuwom kuyato tomota idi nuwonúwana goi. Tauna kom im guinuwa Kaleya nakae. Kūna mligu goi kusabokuliyēgu!’‡ Kūna mligu goi kusabokuliyēgu: Da Giriki niyadi goi ame ana yagoina aiyuwo itoboine. Tayamo mae nakae. Go aiyuwoina itoboineda takaigavile kada, ‘Kwalavēgu!’† Mad 16:13-23; Luk 9:18-22.
34 Yeisu boda madabokidi ina tovatotowanayao taiyao iduduwedi sima ilatuwokoidi idigo kana,
‘Avatauwa komi neta latuwomi kosabokuuliyegu, toinimi yawoimi kokaasalēdi be nakae toinimi imi kerose kokaavalēdi namliyeta baige kōma kosabokuuliyēgu.† Mad 10:38; Luk 14:27. 35 Ame moitamo. Avatauwa bego yawoidi sivagagale, e nava yawoidi vau bei sitagau. Go avatauwa neta yau pasigu be nakae Vala Dedevina pasina yawoidi sitagau, e nava yawoidi vau bei sibabane.† Mad 10:39, 16:25; Luk 9:24, 17:33; Iyo 12:25. 36 Guna nuwonúwana ataligei. Yawoimi moe dogoi gagaina. Nakae neta poyapoya esaesaina gagaina madabokina kokabi go, yawoimi sitagau vata, e bei kaga ana dedevina? Geya. 37 Ame moitamo. Neta yawoimi sitagau vata, geya tayaamo kaga ikaaiyaka itoboine bei yawoimiyadi kotalamapuyedi. 38 Moitamo. Ame tuta boda Yaubada situgavile be nakae kidi goyo sinadi go, avatauwa neta omayamaya pasina yau silawoiwoiyegu be nakae guna livala silawoiwoiyedi, nava tutayana Tomalatomota Tamana ana káeyana tomoeeyalina ivagiitakoe goi bei ima anerose kimaasabaidi taiyao, e nakae bei ilawoiwoiyedi.’† Mad 16:24-28; Luk 9:23-27.
†8:18 Yer 5:21; Isi 12:2; Mak 4:12.
‡8:33 Kūna mligu goi kusabokuliyēgu: Da Giriki niyadi goi ame ana yagoina aiyuwo itoboine. Tayamo mae nakae. Go aiyuwoina itoboineda takaigavile kada, ‘Kwalavēgu!’
†8:33 Mad 16:13-23; Luk 9:18-22.
†8:35 Mad 10:39, 16:25; Luk 9:24, 17:33; Iyo 12:25.
†8:38 Mad 16:24-28; Luk 9:23-27.