7
Yeisu ina vatulúkwana
Diyuu tubudiyao idi gulagula manuna
Diyuu tubudiyao idi gulagula manuna
(Madiu 15:1-20)
1 E Parisi be nakae Yaubada ina Katukeda ana tovatulukwanayao maniyedi taiyao Yerusalema goi sima sitaligógana Yeisu yaina. 2-4 Parisi be nakae Diyuu liliudi tubudiyao idi gulagula sikabikaaonedi ame nakae: Neta nimadi geya sinikidokoidita, e geya sikaiketa. Neta aba maketi goi sima, neta geya siisiwoita, e geya sikaiketa. Tubudiyao idi gulagula tuwaina sikabikaaonedi. Nakae idi keiga, idi kontena be nakae idi keteri sinikidi bego Yaubada iuyaonedi. E kidi Parisi be nakae Yaubada ina Katukeda ana tovatulukwanayao sima Yeisu ina tovatotowanayao sigitedi nimadi geya kimasabaidimo Yaubada umana, o tadigo kada, ‘Nimadi geya sinikidita’ go, tuwo sikakáika. 5 Tauna Parisi be Yaubada ina Katukeda ana tovatulukwanayao Yeisu silumadade sidigo kadi,
‘Kom im tovatotowanayao manakae idi sinapu goi tubudao idi gulagula geya siguinuweta, go sem nimadi geya kimasabaidimo sikakáika?’
6 Go kina Yeisu kana,
‘Komi todedevimi polapola! Boi nimatu tutayana Aiseya Yaubada ina livala itaalavaite, e italavaitedokoimi, idigo kana,
“Ame tomotayadi sopadi goi siwowoinegu go,
yau atedi goi geya.
7 Idi vatulúkwana moe tomota idi nuwonúwana,
tauna idi sakululu yau yaigu
moe sakululu besobeso.”
Aiseya 29:13
8 Komi nakae. Yaubada ina lovina kokalavedi go, tomota idi gulagula kokabikaaonedi.’
9 Aiyuwoina idigo kana,
‘Komi koyagoidoko manakaemi Yaubada ina lovina kokataedi bego toinimi imi gulagula kokailagasidi ae? 10 Guna masi ame nakae: Boi Mosese Yaubada ina lovina italavaite, idigo kana,
“Tamamiyao be sinamiyao kowowooinēdi!”†a Mad 19:19; Mak 10:19; Luk 18:20; Epe 6:2.
Tateta 20:12; Atukeda 5:16
Aiyuwoina kana,
“Avatau neta tamana o sinana igieomaemae, e to kokaumateyāmo.”†b Vin 20:9.
Tateta 21:17
11 Go komi kotagona tomota tamana o sinana ilaatuwoko kana,
“Yabobona bego avinim go, yabobonayana bogina korabani.” ’
Korabaniyana ana yagoina moe kaasalaina Yaubada yaina.
Yeisu tuwaina kana,
12 ‘Moe nakae imi sinapu goi tauyana kosanabode bego tamana o sinana ivaitedi. 13 Moeko goi imi gulagulayadi tomota kovatuulukoidi sikabikaaonedi pasidi Yaubada ina livala kovayoko dogoi besobeso. Ago guinuwa badabadaidi moe nakae koguuinuwedi.’
14 E Yeisu ibóbwara ikavava, aiyuwoina boda iduduwemneidi sima ilatuwokoidi idigo kana,
‘Madabokimi konovēgu go, kopoikīki guna livala koyagoi! 15 Geya kada kaga tayamo takani bei ikibaibailida geya, go sem kaga sinaeda goi sisowóduwo, e moe sikibaibailida. [ 16 Avatauwa komi neta ma taaiyami, guna livala konoovedōko!]’‡ Nakona tomwana 16 Maki geya iginiyeta, go sem nakona tokaidámana tayamo toinina ina nuwonúwana igini.† Mad 11:15, 13:9,43; Mak 4:9,23; Luk 8:8, 14:35; Nuw 2:7,11,17,29, 3:6,13,22.
17 Tutayana Yeisu mana tovatotowanayao boda sikalavedi sina vada tayamo goi sisiu go, ina tovatotowanayao silumadade sidigo kadi,
‘Im livalakaibala kaga ana yagoina?’
18-19 Go kina Yeisu ilatuwokoidi kana,
‘Komi nakae bodayadi, nava nuwomi geya itaporeta? Manakae? Ame geya koyagoiyeta ae? Kaga liliuna taakanidi, geya sinoita nuwoda goi, go sem sisou sina gamoda goi namliyeta sisowóduwo sina mosamosa. Tauna moe dogoiyadi geya itoboinedita sikibaibailida.’
Yeisu ina livalayadi ame goi awoinu liliudi ivayokoidi awoinu taagonaidi.
20 E aiyuwoina Yeisu idigomna kana,
‘Kaga tomota nuwoda goi siisowóduwo, e moe dogoiyadi sikibaibaailida. 21 Tomota nuwodi goi nuwogau goyogoyoidi siisowóduwo. Nuwogauyadi pasidi ame sisowóduwo: Masisi goyogoyoina, vaináwana, aumata, 22 roerata, matakónana, guinuwa goyogoyoidi, pola, sakava ana vikaiya owáowana, piki, tagíwaya, nuwatue be nakae guinuwa owáowana. 23 Ame dogoiyadi goyogoyoidi liliudi tomota nuwoda goi siisowóduwo sikibaibaailida.’
Vavina Totuyoyowo ina numisa tetelina
(Madiu 15:21-28)
24 E Yeisu itaoya ina tovatotowanayao taiyao amo dadavayana sikalave go, sina Taya ana dadava goi. Amoko goi vada tayamo ibabane ana toboine ikaiyaka. Tuwo isiu go, geya latuwona bego tomota siyagoi vadayana goi ikaaiyaka. Go geya itoboineyeta bei isiugau, 25 go sem vavina tayamo vala inove Yeisu ikaaiyaka, tuwo mainao ima ivatugúyala Yeisuyana aena goi ikawanoi natuna vavina naagovaina manuna. 26 Ego vavinayana Totuyoyowo tayamo, tauyana Poinike vavinaina. E ima ikawanoi Yeisu yaina idigo kana,
‘Dimoni tayamo natugu ikiinagove go, akawanoi yaim bego dimoniyana kuvatapiye isiya.’
27 Go kina Yeisu idigo kana,
‘Mainao gogómana sigimikáika, gamodi. Geya itoboineyeta bei gogomanayadi avadi akuliuyedi go, alavedi weiniya goi.’
28 ‘Go Tomoya, weiniyayadi woi teboro ogalaoina goi sikaaiyaka gogómana avadi mgumguna siikasámdala’, vavinayana kaena.
29 Yeisu idigo kana,
‘Moe livala mooitamoina! Livalayana pasina kutāoya, kwaluvīla kūna im vada. Dimoniyana boi natum ikiinagove bogina isowóduwo ina.’
30 Tuwo moitamo, vavinayana itaoya ina ina vada, e natuna igite kebana goi iimasisi go, dimoniyana bogina isowóduwo ina.
Yeisu koroto taiyana patupatuna
ikideedevine tetelina
ikideedevine tetelina
31 Yeisu itaoya aiyuwoina Taya ana dadava ikalave go, ina Saidoni ana dadava iseivata ina Dekapoli dadavina goi isiu ina asa Galili Bwaena kikina goi. 32 Amoko goi koroto tayamo ikaaiyaka taiyana patupatuna be nakae maena imoumou. Tuwo senao sime Yeisu yaina goi sikawanoi makimaki sidigo kadi,
‘Tomoya, neta siyama kubisikōne bei idedevina.’
33 Tuwo moitamo ibala ina korotoyana ikabi, boda sikalavedi go, aditava sina masigava sitaoya. Sitaoya, Yeisu nimadidina ivaisiudi korotoyana taiyana sinaena. Ikavava, toinina nimadidina igiwoli, korotoyana maena ibisikone. 34 Ikavava, ikandolaga yábana goi mana nuwokapisi ikalayawoi go, idigo kana,
‘Epapāta!’
Moe ana kaigavila kada, ‘Kutapōra!’ 35 E korotoyana taiyana sitapora nakae maena idedevina, tauna ibobwara dókana. 36 Ago Yeisu boda isanabodedi idigo kana,
‘Geya vatau tayaamo yaina moe kotaalavāite!’
Tuta badabadaina nakae ilatuuwokoidi go, tuwo tuwaina sitaalavaite tomota yaidi. 37 Go tomota ina guinuwa sigite, sikainaopa gagaina sidigo kadi,
‘Iyaa! Ina guinuwa madabokina dedevina! Tauyadi taiyadi patupatudi ikidedeevinedi bei sinowo, nakae tauyadi maedi simoumou ikidedeevinedi bei sibobwara dókana.’
†a7:10 Mad 19:19; Mak 10:19; Luk 18:20; Epe 6:2.
†b7:10 Vin 20:9.
‡7:16 Nakona tomwana 16 Maki geya iginiyeta, go sem nakona tokaidámana tayamo toinina ina nuwonúwana igini.
†7:16 Mad 11:15, 13:9,43; Mak 4:9,23; Luk 8:8, 14:35; Nuw 2:7,11,17,29, 3:6,13,22.