32
Nina Goko a Elihu
(32:1–37:24)
1 Bâ, mi kalina tugira a Elipas, ma Bildad, ma Sopar, ara tu reia laka e utu nogo a Job ke mololea na gini goko tana rongona laka aia e gotolaka i matana God, mi tana mi tugira ara tu tau goto tovoa na tuguvisu vaniana nina goko, mara tu mui lê moa. 2 Maia e kesa na mane vaolu e totu varangi i tana, me rorongomigira kalina ara gogoko. Aia Elihu na asana, na dalena a Berakel, ma na kukuana a Bus, maia na duli konina a Ram. A Elihu e gini kore sosongo kalina e rongomia a Job e tsarisegenina laka aia moa e gotolaka, maia God e tagara. 3 Maia e kore goto vanitugira tolu na kulana a Job, rongona tugira ara tu tau tangomana na tuguvisudouana nina goko, me gini laba vaga moa laka ti God e sasi. 4 Ma Elihu aia e kesa na mane vaolu sosongo, maia e totu mui moa tana kukuni poi tsau kalina ara tu goko sui talu tugira. 5 Mi kalina aia e reia laka tugira tolu ara tu tau nogo tangomana na tuguvisudouana nina goko a Job, maia e momosa tobana, 6 me tû me tuturiga na goko me tsarivaganana iani,
“Inau na mane vaolu moa, migamu amu tinoni loki nogo,
maia nogoria na rongona ti inau au gini pada matagu na tsariana vaniamui na omea au padâ i tobaqu.
7 Au padasegeniqu laka igamu amu tinoni loki, mamu sasaga sosongo nogo,
me tugugamu nogo na votagoko sasaga.
8 Maia segenina moa nina Tarunga Tabu na God Susuliga Sosongo
e dona ke tusuvanigira na tinoni na sasaga loki.
9 Me tau moa tana rongona gana loki na tinoni ke naua ti ke gini sasaga sosongo,
se ke sangaginigira na reigadoviana na omea e goto me dou.
10 Me vaga ia, mi kalina ia au ngaoa igamu kamu rorongovata kalina inau kau goko;
me dou ti kamu tamivaniau kau tsarivanigamu na omea au padâ.
11 “Inau au berengiti sosongo kalina au rongomigamu amu gogoko vania a Job,
mau pipitu moa kalina amu lalavea na goko sasaga koegua kamu tsarivania.
12 Inau au totu mui dodo moa mau rongomigamu kalina amu terevia na tuguvisuana nina goko a Job,
mamu tau tangomana na sauvulagiana laka a Job nogo e sasi.
13 ?Megua ti amu tsaria laka amu tsodovulaginogoa na sasaga loki?
Ma nina aqo moa God ke tsarivisu vania a Job rongona igamu amu terevilea.
14 Maia Job e goko vanigamu igamu, me tau goko vaniau inau,
me ti aia ke goko vaniau inau, me utu saikesa kau tsarivania na goko vaga amu tsarivania igamu.
15 “Migoe a Job ko rongomiau kalina ia. Tugira ara tu terevia na tuguvisu vaniamu nimu goko,
mara tu tau goto tamanina sa tsaqina goko kara tu tsarivanigo.
16 ?Me laka e dou kau pipitu babâ moa inau kalina tugira ara tu totu mui lê nogo vaga ia,
mara tu tau nogo dona nagua kara tu tsaria?
17 Tagara, kalina ia minau segeniqu nogo kau gokovisu vanigo,
ma kau tsarivanigo na omea au pada i tobaqu.
18 E silovi sosongoliau na goko
me utu goto kau tangoli visugira niqu tsaqina goko.
19 Me ti vaga kamu tau tamivaniau kau goko,
me sauba inau kau tavongani subu ma kau botsa, vaga moa na todo na uaeni e danga na uaeni vaolu i laona.
20 Niqu aqo nomoa kau goko ti ke gini rago na tobaqu.
21 Me utu nomoa kau sanga kesa tabana i laona na vaiganigi vaga ia;
me utu goto kau valoginia ke kesa.
22 Inau au tau saikesa dona na valo tinoni,
me ti vaga kau nauvaganana ia, me sauba God ke tsaku sosongo ke kedeau.”