“Inau au naua kesa na veke mau gini vatsa

laka e utu saikesa vaniau kau moro ngaongao tana baka daki.

2 ?Me laka nagua vaga na God Susuliga Sosongo aia e totu i gotu ke nauvanigita

agana na mani voliginiada tana rongona nida sasaga?

3 Aia nogo e moloa na taguseko ma na toroutsa ke gadovigira igira ara sasi.

4 Ma God e donaginigira nogo pipi sui na omea au naugira;

me reigira pipi sui niqu tsakutua.

5 “Inau au vatsa laka au tau saikesa malapalusia ke kesa,

mau tau saikesa goto tovoa na perobulesiaqira na tinoni tavosi.

6 Me ti vaga God ke tovoginiau na omea na tovomamava manana,

me sauba nomoa ke reiginia laka inau au tau tsukia sa sasi.

7 Me ti vaga inau au piloligi taninogoa na sautu dou,

se au tami segeniqu vania na tabotabo ke raqa pukaliau,

se ti vaga kaira na limaqu ara ka gini bau na sasi,

8 mi tana me dou moa ti vaga God ke tamivanigira na tinoni tavosi

kara vutiligigira ma kara ganigira na omea sui au tsukagira nogo.

9 “Me ti vaga au gini tubulagi tana rereina na tauna kesa gaqu verakolu,

mau totu popoi, mau pipitua i tano tana matsapana na valena,

10 mi tana, me dou moa ti vaga na tauqu inau ke aqosi gana mutsa kesa na mane tavosi

me ke ba maturu i nigena.

11 Na tinoni e tsukia na vatana na kibokibo vaga ia e tugua nomoa na kede matesiana.

12 Na vatana na sasi vaga ia e vaga saikesa moa ti na lake loki e gani poponoa na tinoni ia.

Me ti vaga inau au tsukinogoa sa sasi vaga ia, me dou moa ti na lake ke gani matesiau,

me ke kodogira sui goto na omea au tamanigira.

13 “I sau kalina e kesa vidaqira niqu tinoni aqo e tû me taimataqu inau,

minau au rongomi vatavidoua, mau nauvania na omea e goto.

14 ?Me ti vaga inau kau tau nauvaganana ia, me sauba

nagua tangomana kau tsarivania God kalina aia ke mai na pedeaqu?

15 Maia nogo God e volaau inau i tobana tinaqu,

maia goto nogo e volagira igira niqu tinoni aqo i tobana tinaqira.

16 “Inau au tau saikesa sove na sangaaqira igira ara tau tamanina sa omea;

mau tau goto dona kau reilegira igira na daki tinamate e utugana vanigira na tsodoana sa omea,

17 se kau reilegira na baka tinamate kara totu vitoa kalina inau au mutsa gaqu.

18 Tana mauriqu popono inau au tau kuti na reitutuguaqira.

19 “Mi kalina au reia kesa e tau tamanina sa omea,

me utugana vania na voli polona,

20 minau au tû mau sauvania na polo ara aqosiginia na ivuna sipi

e talumai tana niqu bara na sipi segeni nogo inau.

Mi tana aia e tsonikaeginiau tana tobana popono.

21 “Me ti vaga au peqonogoa sa baka tinamate,

rongona au dona nogo laka sauba ke gini mana moa gaqu tana tinete,

22 mi tana me dou moa ti kara kavikutigira na limaqu,

ma kara loqoligigira na sulina na kokovequ.

23 Me rongona inau au matagunia nina kede God,

me gini utu lelê vaniau na nauana na omea seko vaga ia.

24-25 “E mana rago laka inau au aqo kakai mau gini tamani omea danga,

mau tau moa gini kaekae ma kau tsotsovata tana omea danga au tamanigira.

26-27 Mi kalina au reia na aso e sina maka sosongo tana parako,

ma na vula e rereidou sosongo kalina e datomai tana saipono,

me tau goto siloviau ma kau ngaoa na samasama vanikaqira,

ma kau domia na limaqu tana kukuni tanikaqira.

28 Ma na tinoni e tsukia sa vatana na sasi vaga ia e tugua nomoa na kede matesiana,

rongona e tiatagarâ na God Susuliga Sosongo.

29 “Minau au tau gini mage kalina au reia ara rota igira gaqu gala,

se ke gini laoqu kalina e gadovigira kesa na omea seko,

30 mau tau goto gini sasi tana nongiana God ke kede matesigira.

31 Pipi sui lakalaka na tinoni ara aqo vaniau ara donaginia

laka inau au soalakagira pipi kalina igira na tinoni labavô.

32 Mau soamaigira na tavetadana kara sagemai i valequ,

rongona au tau padangaoa kara eno sesere lê i levugana vera.

33 “Igira na tinoni tavosi ara tovoa laka kara tiapoia na sasi ara naua,

minau e utu saikesa kau tiapoia na omea seko au tsukia.

34 Mau tau goto gini matagu tana rongona niqira goko dangadanga ara tsaria na tinoni

ma kau gini totu mui ma kau taopoi i laona na valequ.

35 “?Me laka e tagara kesa ke ngaoa na rongomiana na omea inau au tsaria?

Inau au gini vatsa laka pipi sui na tsaqina goko au tsarigira ara mana sui.

!Ke dou sosongo ti vaga God Susuliga Sosongo ke tuguvisu vaniau!

Me ti vaga God ke maretsunagira na omea aia e reia i koniqu

me dou ti ke sauvaniau na mamarena ma kau reia,

36 mi tana minau kau kaveria tana kokovequ

ma kau molokaea i lovaqu vaga moa kesa gaqu kepi taovia.

37 Ma kau ba tû i matana God vaga moa na dalena kesa na taovia tsapakae,

ma kau tsarivulagi vania pipi sui na omea au naugira.

38 “Me ti vaga inau au kominogoa nina kao kesa mau ba aqoa gaqu uta i konina,

39 mau ganigira na omea au tsukagira tana kao ia au tau volia,

maia na tamanina pukuga e gini mate na vitoa,

40 me dou moa ti kara mate lê tana kao igira sui na piuqira na uiti ma na barli inau au rasavaginigira,

ma kara dato tsavugira na itai kokonaga ma na buruburu seko.”

Mi tana e sui nina tsaqina goko a Job.