1-2 ሄ ዎዴ ፃማቂዛ ዮሃኒሲ ኣሳስ “ሳሎ ካዎቴꬂ ማቲዳ ጊሽ ኢንቴ ናጋራፔ ሲሚቴ” ጊ ሳባኪሼ ዩሁዳ ባዞራ ዪዴስ። * ማቶ 4፡17፤ ማር 1፡15

4 ዮሃኒሲ ጋሜላ ኢሲኬፌ ኦሴቲዳ ማይዖ ማይዔስ። ባ ፄሳን ዳፎ ጊፄስ፤ ኢዚ ሚዛ ቁማይ ዴጌራ ኤሳኔ ቦሌ። * 2ካዎ 1፡8 5 ዬሩሳላሜፔ፥ ኩሜꬃ ዩሁዳፔኔ ዮርዳኖሴ ሻፋ ማታን ዲዛ ዴሬ ኣሳይ ዉሪ ዮሃኒሳኮ ዎꬊዲ፥ 6 ባ ናጋራካ ኢዛስ ፓፂሼ ዮርዳኖሴ ሻፋን ኢዛ ኩሼን ፃማቄቲዴስ።

7 ዳሮ ፋርሳዌቲኔ ሳዱቃዌቲ ኢዚ ፃማቂዛሶ ዪሺን ቤዪዲ ዮሃኒሲ “ኢንቴኖ ሾሻቶ! ኢንቴ ሲንꬃራ ዲዛ ሃንቆፌ ኣታና ማላ ኢንቴና ኦኒ ቤሲዴ? * ማቶ 12፡34፤ 23፡33 8 ኢንቴ ኢንቴ ናጋራፔ ሲሚዳይሳ ቤሲዛ ኦሶ ኦꬂቴ። 9 ‘ኑ ኣዋይ ኣብራሃሜይ ኑስ ዴስ’ ጊዛይሳን ኢንቴርካ ኢንቴና ባሌꬆፍቴ፤ ታ ኢንቴስ ፆሲ ሃይታ ሹቻታፔ ኣብራሃሜስ ና ኦꬂ ዴንꬃናስ ዳንዳዬስ ጋይስ። * ዮሃ 8፡33 10 ሄኮ ካልታይ ቃንፃናስ ሚꬃታ ጋርሳን ጊጌቲ ኡቲዴስ፤ ሄሳ ጊሽ ሎዖ ኣይፌ ኣይፎንታ ሚꬂ ዉሪ ቃንፄታናኔ ታማን ዬጌታና። * ማቶ 7፡19 11 ታኒ ማሮቴꬃስ ሃꬃን ፃማቃይስ፤ ሃራይ ኣቶ ሺን ታ ኢዛ ጫማ ቶካናስ ቤሶንታዴይ ታፔ ኣꬊዛ ሚኖይ ጉዬራ ያና፤ ኢዚካ ፂሎ ኣያናኒኔ ታማን ኢንቴና ፃማቃና። 12 ካꬅ ሱራጊዛ ፒꬃይ ኢዛ ኩሼን ዴስ፤ ኢዚካ ባ ካꬃ ባሌዛ ፒቲ ጌሻና፤ ባ ጊስቴዛካ ካꬃ ዲዔን ቆላና፤ ሃፓ ጊዲኮ ቶዖንታ ታማን ፁጋና” ጊዴስ።

13 ሄ ዎዴ ዬሱሲ ዮሃኒሳን ፃማቄታናስ ጋሊላፔ ዮርዳኖሴ ሻፋ ቢዴስ። 14 ጊዶ ኣቲን ዮሃኒሲ “ሃይሲ ሃኔና፤ ታኒ ኔናን ፃማቄታና ቤሲሺን ኔኒ ዋናዳ ታኮ ያይ?” ጊዲ ኢዛራ ማርሼቲዴስ።

15 ዬሱሲካ “ኣይኮይ ባዋ፥ ኤሮ ጋርኪ? ሃይሳ ኦꬂዲ ኑኒ ፂሎቴꬅ ኡባ ፖላናስ ኑስ ቤሴስ” ጊዴስ። ዮሃንሲካ ኢዛ ቆፋ ኤሮ ጊ ኤኪዴስ። 16 ዬሱሲ ፃማቄቲዲ ሃꬃፌ ኬዚዳ ማላ ሄራካ ሳሎይ ዶዬቲን ፆሳ ኣያናይ ሃራጴ ካፎ ሚሳቲዲ ኢዛ ቦላ ዎꬊሺን ቤዪዴስ። 17 ሳሎፔካ “ታኒ ኢዛን ኡፋዬቲዛ ናዚኔ ታ ሲቂዛ ታ ናዚ ሃይሳ” ጊዛ ቃላይ ሲዬቲዴስ። * ሜꬌ 22፡2፤ ማቶ 12፡18፥17፡5፤ ማር 1፡11፤ ሉቃ 9፡35