Leta ke Pol usuf
Taitus
Orek Famu
Leta igii Pol i siit u usuf Taitus. Taitus biil i sikin Iudaia. I ongen fafas sau ke Pol ke ka sokiliis liu kia, ma ka unune lo Iesu Karisito. I la ta tura Pol una Ierusalem aunbiing foron aposel tikii ri la turim (par Aposel 15:2). Pol fawu i wuun ta u una Korin (par 2 Korin 7:6-7 ke 8:7). Namih, Pol ka tus pes u isi in fofonoi na lotu na bit na Krit (par Taitus 1:5).
Na leta igii, Pol i fas Taitus isi matngan fanu arafa in fule pes ri isi rin tapiek tom foim na lotu. Ke ka fas u isi in fofonoi rokap na lotu koseng foron tom fafausum famfabal, ke in fausum fakasi fanu ini rokap na sinang.
Leta usuf Taitus i aragii:
1:1-4 Tanwara na leta igii
1:5-16 Foron famfamu na lotu
2:1-15 Fafausum usuf foron tom unune
3:1-11 Rokap na liu ae rin mi lo
3:12-15 Farfarop na orek ke Pol usuf Taitus
1
1 Ia Pol, ia nenge fafauun ke God ke nenge aposel ke Iesu Karisito, isi ian farakrakai unune ken fanu ae God ka fule pes ta ri. Ke iak fausum ri isi rik usum na tekentu ae in filange ri isi rik mi na wolwol ke God. 2 Unune turan tasum igii ru fefesti na liu fitliu ae kere nene ini unune isi. I wara le God i falimlim ta isi in ta liu fitliu, aunbiing biil biitom i fakiis ta piklinbat. Ma God ae, biil i lem la. 3 Ma na aunbiing tom i put ta u, God Tom Fafaliu kirer ka famalal orek kia. Orek ae i unune ufu ta usuf iau ma ka wuun ta iau isi fafas ini.
4 2Korin 8:23; Galatia 2:3; 2Timoti 4:10Ia sisiit usuf o Taitus, o keng kalalik tutus, wara le itikii sau e unune kirah.
Famais ke siaroh usuf o sing God Tama kerer ke sing Karisito Iesu, Tom Fafaliu kirer.
Foron Famfamu na Lotu
5 Ia la koseng ta wo aiwa na Krit,* Krit i e nenge tara bit ma ifuun e maleh aiwa lo. isi ok fatortores fakasi foron foim ae biil i rop tah ke ok tim pes ti foron famfamu na lotu na foron maleh, arae tom ia patrai ta o. 6 1Timoti 3:2-7Aunbiing on tim pes ti famfamu, on tim pes kaltu ae biil ti tuk lo, itikii sau e antu ke berberat kia rin foron tom unune ma biil ri tiu ri la ini sinangun talos, ma biil rin foron tom ongen fabulwar. 7 Nenge famfamu na lotu ae le in parpar kaleh na foron foim ke God, in rokap le in kaltu ae biil ti tuk lo. Biil in falaumet u tom, biil in tom ngaliaf sape, biil in tom ininmet, biil in tom fapaket, ke biil in tom akalemok. 8 Isau le in kaltu una somangat pes fanu una matanfel kia, in ier la isi rokap na sinang, in nagogon fakasi wolwol kia tom, in tom tortores, in kalkaluu na mata God ke in fatortores fakasi liu kia. 9 In posefat na orek tekentu ae ri ka fausum ta u ini, isi i sabin ik farakrakai fanu ini fafausum ae i tekentu ke ik famalal sinangun fanu ae ri tikale Rokap na Fafas la.
Pol i Fanau Taitus na Foim kia
10 Foron famfamu na lotu rin mi na foron rokap na sinang arae, wara le ifuun e fanu ri ongen ufu fafausum tekentu ma ri foron tom orek foes ke foron tom famfabal. Ifuun lo ri e fan Iudaia, ae ri tara la le, rin kiit pununfon fanu tamat tikii namin nagogon ke Moses. 11 On babat na ngusri, wara le ri famam falaulau unune ken fanu na fale matanfel ini matngan fafausum ae biil i rokap le rin fausum fanu ini. Ri tel u sau arae una fabal pes pitkalang sing fanu. 12 Nenge profet tom tina Krit i use ta u aragii, “Fan Krit ri foron tom lemlemet, sinangu ri i laulau arae foron muruuw, ri foron tom angos, ke ri foron tom kiimkiim.” 13 Ma orek ken profet ae ulo ri, i tekentu kanaka. Pesu, on fakiing ri isi unune kiri ik tekentu, 14 isi gong mang ri mi na foron titiipapah foes ken fan Iudaia ke na nagogon ken fanu ae biil ri somangat pes tekentu. 15 Fanu ae balri i kalkaluu, foron tier tikii i kalkaluu usuf ri, isau le fanse ae balri i duh ma biil ri unune, foron tier tikii i duh usuf ri. Wolwol tikii kiri i duh na mata God ma biil ifasi rin iliim sani i tortores. 16 Ri use u le ri usum lo God, isau le sinangu ri i fakawe ufu. Ri fanu laulau kanaka tom, ri foron tom ongen fabulwar ma biil ifasi le rin tel ti foim rokap.