40
1 Mwenyezi Mlungu achimuamba Ayubu,
2 “Dze, ashindanaye na ye Mwenye Nguvu Zosi anaweza kumrekebisha?
Ye ahehaye na Mlungu, iye naamjibu.”
Ayubu anamjibu Mlungu
3 Ndipho Ayubu achimjibu Mwenyezi Mlungu achiamba,
4 “Lola, mimi si rorosi, ndakujibu utu wani?
Nkafunga mromo wangu.
5 Nikagomba limwenga, nami sindajibu.
Nikagomba kano mbiri, ela sindaenderera.”
Mwenyezi Mlungu anamjibu Ayubu
6 Ndipho Mwenyezi Mlungu achimjibu Ayubu kula mo chikulukuluni achiamba,
7 “Dzifunge nguwo zidine,
Ndakuuza maswali, nawe undanijibu.
8 Dze, ikale undaonyesa kukala uamuli wangu sio wa haki?
Undanihenda kukala na makosa ili udzihende u wa haki?
9 We una mkpwono dza wa Mlungu,
na kutuluza sauti ya kunguruma dza yakpwe?
10 Aya dzivwike ukulu na uwezo,
dzipambe na nguma na ishima.
11 Onyesa tsukizizo nyinji,
umlole adzikpwezaye, umtsereze.
12 Lola chila mmwenga adzikaryaye, umutsereze,
na uvyoge-vyoge ayi osi pho achiphoima.
13 Azike mtsangani phamwenga,
afungire ko kuzimu.
14 Ndipho nami ndakuambira
kukala mkpwonoo wa kulume unaweza kukupha ushindi.
15 Lola, cho chiboko,
nrichoumba phamwenga nawe,
chicho nkurya nyasi dza ngʼombe.
16 Lola, nguvuze zi mwakpwe chibiruni,
na uwezowe u kpwenye kano za ndaniye.
17 Nkuhenda mchirawe ukagoloka dza muerezi,
kano za vigavye zikindikindi phamwenga.
18 Mifuphaye ni dza miridza ya shaba,
na maguluge dza miraba ya chuma.
19 Iye ni wa kpwandza kahi ya kazi ya Mlungu,
richa iye ariyemuumba amusengerere na upangawe!
20 Mana myango nkumvyarira chakurya
pho phavumbwapho ni nyama osi a tsakani.
21 Nkudzilaza tsini ya migunga, mihi ya miya,
achifwitswa ni miduga mo matopeni.
22 Vivuri-vuri vya migunga nkumfwitsa,
mihi imerayo kanda-kanda ya muho ikamzunguluka.
23 Lola, muho uchifurika, iye kaogopha,
hata muho Joridani ukafurika kufikira kanwaye, ye kana wasiwasi.
24 Ni ani awezaye kumuhenda chipofu ili amgbwire?
Au ni ani awezaye kugbwira pulaye na muhambo?