39
1 Dze, unamanya wakati mbuzi za myangoni zivyalapho?
Udzangbweona mbala achivyala?
2 Dze, unaweza kuaolangira miezi hadi kuvyala kpwao?
Au unamanya nyo wakati avyarirao,
3 wakati azamapho na kuvyala ana ao,
na nyo utsungu wa kuvyala ukasirira phapho?
4 Ana aho nkukula na kuphaha nguvu ko weruni,
nikuuka na kusauya tsona.
5 Ni ani ariye richira foro akale huru?
Ni ani ariyevugula kowa?
6 Námupha jangbwa rikale kayaye,
na tsi ya munyu ikale makaloge.
7 Iye nkutseka kululu za mudzi,
chisha kana mphiriki wa kumpigira kululu.
8 Nkuzunguluka ko myangoni kuendza nyasi,
nkuendza chila kodza itsi.
9 Dze, nyahi andakubali kukuhumikira?
Au kusala mwako chaani usiku?
10 Dze, unaweza kumfunga nyahi mikowa arime?
Yani arime madeteni nyumazo?
11 Dze, undamuadamira kpwa kukala ana nguvu nyinji,
au umrichire kaziyo ngumu?
12 Dze, unamuamini akurehere mtsereo
na aukusanye phatu pha kuwagira?
13 Mbuni nkupiga-piga maphage kpwa shobo,
ela nyoyaze taziyaigana na za korongo.
14 Nikubwaga mayayige photsi,
na kugaricha gaphahe dzoho mtsangani,
15 na kuyala kukala ganaweza kuvundzwa ni lwayo
na kukala nyama wa tsakani anaweza kugavyoga.
16 Nkuahendera ukatili anae avi sio akpwe,
hata anae achifwa ye kajali
17 mana Mlungu wamuhenda ayale ikima,
na kamuphere achili ya kufikiriya.
18 Aandzulapho maphage azole mairo,
iye nkutseka farasi na mphirikiwe kpwa kukala farasi kamshinda mairo.
19 We ndiwe uriyemupha farasi nguvu,
au kuvwika singoye nyoya nyire?
20 We ndiwe umuhendaye akatinatina dza ndzije?
Mrirowe wa maringo unaogofya.
21 Nkumvura-mvura deteni na kufwahirwa ni nguvuze,
nkutuluka kpwendakutana na enye silaha.
22 Iye nkutseka wuoga, naye kaogopha bii,
kalozera upanga kogo.
23 Ryaka rinakokolosa phakpwe lavuni,
phamwenga na fumo ringʼalaro-ngʼalaro na mkuki ungʼalao-ngʼalao.
24 Kpwa usiru na more nkuitifula yo tsi,
chisha gunda ririrapho iye kaweza kuima.
25 Gunda ripigbwapho, iye nkurira,
Nkunusa kungu ya viha kula kure,
nkusikira msindo wa akulu a jeshi na kululu za viha.
26 Dze, cho chiphanga chinauruka kpwa ikimayo,
na kuandzula maphage kuphiya uphande wa mwakani?
27 Dze, kozi nkuphiya dzulu kpwa amuriyo,
na kudzenga nyumbaye phatu pha dzulu?
28 Nkuishi dzulu za myamba na kuihenda mudziwe,
myamba yenye lutsa ndiyo ngomeye.
29 Kula kuko nkuriyariya chakuryache,
matsoge nkuchiona kula kure.
30 39:30 Mathayo 24:28; Luka 17:37Anae nkufyondza mlatso,
na pharipho chimba, nkukala phapho.”