1 ‑A ‑kë "dhʋ̈ ‑sü bha‑ 'gü, ꞊dhɛ 'ö ‑kë ꞊dhɛ Atanna ꞊ya kaa‑ Klisi ‑nu ka bho ga 'gü bha, pë ‑nu 'wo Atanna "piʋ̈, ‑yɛa 'ö Klisi 'dhö ‑ya ‑sü 'ka‑ 'gü ‑a ‑kɔ ‑së 'gü dhang‑ 'gü bha‑ 'gü bha ꞊në ‑kaa ‑ta kɔɔ‑. 2 A‑ ‑pö ka ‑dhɛ ꞊dhɛ 'ka ‑ya pë ‑nu 'wo dhang‑ 'gü bha ꞊në‑ ‑nu zuën ‑ta kö 'ka ka kwaa‑ "kpʋngtaapë ‑nu bha‑ ‑wɔn ‑zü. 3 ‑A ‑gɛn ‑mü ꞊dhɛ ka ꞊dhɛ 'mɛ 'ö ꞊ya ga ꞊në‑ 'dhö pë "pɛpɛ bha‑ ‑nu ‑gɔ. ‑Tosɛa ‑dee 'ö kaa‑ kë bha waa‑ Klisi ‑nu ‑wo ‑bin ‑sü 'ka Atanna ꞊në‑ 'gü. 4 Yi 'ö Klisi 'ö kaa‑ ‑tosɛa ‑dee 'ka bha 'ö dho ‑wo 'ka "yɛa‑, 'yö kaa ‑dɩ 'pö 'ka ‑wo 'ka "yɛa‑ 'tɔbhɔdhe 'gü.

5 ꞊Dhɛ 'ö "dhʋ̈, 'wɔn yaya 'ö‑ kë ‑dhɔ ‑yö mɛ ‑kë "kpʋngtaadhɛ ya‑ 'gü bha, ‑ka ka kwaa‑ ꞊gban "pɛpɛ kë ‑sü ‑zü kö 'ka ka wë bɔ Atanna "piʋ̈. ‑Zua zë ‑sü oo, "yënng dɔ waa‑ 'wɔn yaa kë ‑pɛng ‑dɔ mɛ ‑zʋ ‑bha ‑sü ‑nu, mɛ zuë" ‑bhɔ 'wɔn yaa ‑bha ‑sü ‑nu waa‑ ꞊naɔ ‑dhɔ ‑bha mɛ ‑kë "dhiʋ̈ ziö 'ka ‑sü ‑nu 'ö ꞊dhɛ 'pö ꞊dhɛ ꞊gebhɔ ‑dhɔkë ‑sü 'dhö bha, ‑ka ka ‑dɩ 'kun‑ ‑gɔ ‑së. 6 ‑A ‑gɛn ‑mü ꞊dhɛ 'wɔn suu ‑nu bha ꞊në‑ këwɔn 'yaa dhi Atanna ‑dhɛ 'yö‑ ‑wɔn 'gü 'yö dho 'wɔn wɔ gɔɔgbɩɩmɛ ‑nu ‑ta. 7 'Sa "tʋ̈ng 'ö 'wɔn yaa ‑kɔ ‑yö gun ziö ‑sü 'ka‑ 'ka kaa‑ ‑tosɛa ‑gɔ bha ka ‑gun "ta ‑kɔ suu bha ꞊në‑ kë sië 'pö.

8 "Kɛɛ dɔ 'kwa‑ wo ꞊taamasü ‑ya 'gü ya ‑ka ka bo 'wɔn suu bha‑ ꞊gban "pɛpɛ kë ‑sü 'ka. Zuëdhiʋ̈dhɛ oo, bhlɔɔ ‑ma mɛ 'gü ‑sü ‑nu waa‑ "gblüyaadhɛ ‑nu bha ‑ka ka kwaa‑ ‑zü. ‑Kaa kë ‑së kö 'pë 'ö ‑gban "si bho ‑sü ‑bha, "ɛɛn mɛ ‑dhiang yaa zë ‑sü ‑bha kö 'ya 'dho ‑wo ka "dhi ‑ta mɛ 'bha ‑dhɛ tongtongdhö. 9 ꞊Dhɛ 'ö ‑kë ꞊dhɛ ‑tosɛa kë ‑kɔ zii 'ka gun‑ 'gü ‑blɛɛsü 'ö ꞊ya gun ꞊ya kë ka 'tuʋ̈‑ 'ka bha 'ka ka bo‑ 'ka bha, 'ka 'dho‑ pö 'ka ꞊sua kë ka 'ko ‑nu ‑dhɛ 'zü (kë "dhʋ̈ kö 'ka bhɔ Atanna ‑bha). 10 ‑A ‑gɛn ‑mü ꞊dhɛ ‑tosɛa ‑dee 'dhɛ 'ka ‑da 'gü bha ‑yö mɛ "gla ꞊në‑ wo ‑kpɛawo 'ö dho‑ 'ka "dhiʋ̈ 'wɔndɔdhe 'gü, ꞊dhɛ ‑kɔ 'ö Atanna 'ö kwa ‑da bha 'ö‑ 'ka bha‑ 'dhö. 11 ‑Ya kë "dhʋ̈ kö 'mɛ 'kö ꞊wa bɔ Klisi 'ka, kö‑ ‑nu ꞊gban "pɛpɛ ꞊wa kë mɛ suu do ꞊në‑ 'ka, kö yö ꞊në‑ ‑nu ꞊gban "pɛpɛ 'gü, 'ö‑ ‑nu ‑bha 'wɔn ꞊gban ‑wɔn ꞊gban 'ka. Kö ‑a pö ‑sü 'ö ꞊dhɛ Zuifö ‑mü n 'ka, "ɛɛn ma ‑zë 'maa Zuifö 'ka, "ɛɛn yi ‑zë yi ‑go 'gbannë 'gü "kɛɛ 'mɛ 'kö 'wo ya ‑wo ‑kplëë 'ka, "ɛɛn 'zü 'mɛ 'wo ya ‑wɔbhlaamɛ ‑nu ‑mü, yi ‑zë yi "yan "dhiʋ̈ ꞊ya "pʋ, ‑ɛɛ 'zü 'wlɔɔ‑ ‑mü yi ‑zë yi 'ka, 'yö 'mɛ 'kö 'wo ya 'wo ꞊dhuëng 'ka bha kö‑ 'bhaa 'dhö 'zü. ‑A ‑gɛn ‑mü ꞊dhɛ kö Klisi ꞊në ꞊ya 'to 'wɔn bha‑ ꞊gban ‑gɔ 'ka mɛ ꞊gban 'gü.

12 ‑A ‑kë "dhʋ̈ ‑sü 'gü n dheebhang ‑nu, ‑ka ‑tosɛa kë ꞊taamasü ya‑ 'gü ꞊dhɛ 'mɛ‑ ‑nu ‑dhɔ ‑yö Atanna ‑kë, 'ö ꞊yaa‑ ‑nu "zu 'ö ꞊wa kë "slʋ̈ʋ̈slʋ̈, 'ö ꞊yaa‑ ‑nu 'sü ꞊yaa‑ ‑nu ‑ya ‑dɩ ‑ta ‑a 'dhö. Kö mɛ "bhɩɩ‑ ‑nu ‑wëë ‑yö ka kë ꞊dedewo, kö 'ka "klʋ ‑yö dhi, kö 'ka ka ‑gɔ 'dho "sia‑ mɛ ꞊gban "pɛpɛ ‑dhɛ, kö 'ka kë dhɔngdhɔngsü, "kɛɛ kö ka zuë" ‑yö kë ‑sɛa. 13 Ka ꞊sɔng ‑yö 'kun bho 'koo. ꞊Ya kë ꞊dhɛ mɛ 'bha ‑siödhɛwɔn ꞊ya kë ö "tɛado "piʋ̈, ‑ka ka 'ko ‑nu ‑mawɔn 'to ka 'ko ꞊zinng 'gü. ‑Ka ka 'ko ‑nu ‑mawɔn 'to ꞊dhɛ ‑kɔ do 'ö kwa Dëmɛ ‑yö ka ‑mawɔn to‑ 'ka bha‑ 'dhö. 14 "Kɛɛ 'wɔn "pɛpɛ bha‑ ꞊gban ‑gɔ 'ö 'dhö, yö ‑mü ‑dhɔ ꞊në‑ 'ka. Ka ‑dhɔ ‑yö ka 'ko kë, ‑a ‑gɛn ‑mü ꞊dhɛ ‑dhɔ bha ꞊në ꞊ya kë ka ꞊zinng 'gü, 'yö ka ‑kɔ dho kë 'wɔn do ‑bha, 'yö ka ‑wʋ ‑yö ‑kë do, 'yö 'ka ‑kë mɛ do 'ka. 15 Atanna ‑yö ka ‑dhɛ kö zuëwaanusü ꞊në ‑yö kë ka ‑gɔ, kö 'ka kë mɛ do 'ka, zuëyagblʋ̈ʋ̈‑ 'ö "dhʋ̈ 'ö go Klisi "piʋ̈ bha ‑yö ka pa. 'Wɔn ‑yö 'to ka "yaan kö 'ka Atanna nuɛ" bho‑ ‑wɔn 'gü ‑kpɛawo. 16 ‑A ‑dhɛa ‑bha ꞊dhɛ Klisi ‑wʋ bha ‑yö kë ka "tʋʋdhö yi ꞊gban "pɛpɛ 'ka, kö yö ꞊në ‑yö kë kaa‑ 'wɔn ꞊gban "pɛpɛ zü ‑gban 'gü 'ka, kö 'ka ka 'ko ‑nu ꞊klang kë‑ 'ka, kö 'ka ‑dhio dɔ‑ 'ka ka 'ko ‑nu ‑ta 'wɔndɔdhe 'ö‑ nu ka ‑dhɛ bha‑ 'ka, kö 'ka Atanna 'tɔ bhɔ ‑tan ‑nu bho ka ‑sɔbhɛɛ 'ka ‑a nuɛ" bho ‑sü 'ka, kö 'ka "gbaɔ bho‑ ‑zü, kö "tan ‑dee 'ö‑ ‑bha 'Nii‑ "slʋ̈ʋ̈slʋ̈ dho "yi dɔ‑ 'ka ka ‑bɛan bha 'ka‑ bho ka faan ꞊gban 'ka. 17 'Wɔn "ʋʋ 'wɔn 'ö 'ka dho‑ kë, "ɛɛn 'ö 'ka dho‑ pö, ‑kaa kë kwa Dëmɛ Yesu 'tɔ bhɔ ‑dhɔ ‑dhɛ kö 'ka bɔ kwa Dëmɛ bha ꞊në‑ ‑ta kö 'ka kwa Dë Atanna nuɛ" bho 'wɔn ‑së "pɛpɛ 'ö‑ kë ka ‑dhɛ bha‑ ‑wɔn 'gü.

18 Dhong ‑nu 'ö 'ka gwaan‑ ‑bha, ‑ka ka ‑gɔ 'waanu kaa‑ gɔɔn‑ ‑nu ‑dhɛ. ‑A ‑gɛn ‑mü ꞊dhɛ dhong ‑nu 'dhɛ 'kö ꞊wa bɔ kwa Dëmɛ 'ka, ‑a ‑dhɛa ‑bha ꞊dhɛ ‑wo ‑tosɛa kë ‑kɔ bha ꞊në‑ 'gü.

19 Gɔɔn‑ ‑nu kaa ‑dɩ 'pö, kaa‑ dhong ‑nu ‑dhɔ ‑yö ka kë, 'ka 'dho ꞊gbaɔn‑ ‑nu ‑ta 'ö ‑tosɛa din ‑yö ‑siö ‑nu 'gü.

20 'Në ‑nu, ‑ka ka 'kpɔmɛ ‑nu ‑wʋ ma ‑kɔ ꞊gban ‑kɔ ꞊gban 'gü, 'mɛ 'ö 'bha ‑kplü kwa Dëmɛ ‑bha 'bha‑ kë ‑kɔ bha ꞊në‑ 'gü 'yö ‑dhi Atanna ‑dhɛ.

21 'Nëdë ‑nu, 'ka 'dho 'wɔn din ‑siö kaa‑ 'në ‑nu 'gü 'ö‑ ‑nu 'gü ‑yö ga ka ‑wɔn 'ka 'ö ‑tosɛa din ‑yö ‑siö ‑nu 'gü.

22 ꞊Dhuëng ‑nu, ‑ka ka dëmɛ ‑nu 'wo "kpʋng ꞊taa yö bha‑ ‑nu ‑wʋ ma ‑kɔ ꞊gban ‑kɔ ꞊gban 'gü. 'Ka‑ kë sië "dhʋ̈, ‑kaa kë "gblʋ̈ʋ̈dhɛ "puu ‑ta, ‑ka zë kwa Dëmɛ ‑wɔn ꞊në‑ ‑dhɛ kö 'ka‑ kë "dhʋ̈, kö 'ka 'dho zë ka ‑dhɔ ‑bha mɛbhɩɩdhe kë ‑sü ‑zë ‑dhɛ 'ö 'ka‑ ‑kë ‑a ‑nu "yandhiʋ̈ ꞊naa doseng. 23 'Wɔn "ʋʋ 'wɔn 'ö 'ka‑ pö 'ka‑ kë, ‑kaa kë ka zuë" "puu 'ka ka faan ꞊gban 'ka ꞊dhɛ 'pë 'kii‑ kë mɛ "bhɩɩ‑ ‑zë ‑dhɛ 'ö 'ka‑ ‑kë kwa Dëmɛ ꞊në‑ ‑dhɛ ‑a 'dhö. 24 ‑Ka 'dhang bho‑ "dhiʋ̈ ꞊dhɛ ka Dëmɛ ꞊dede 'ö 'dhö 'ö 'ka 'wɔn ‑nu bha‑ kë sië‑ ‑dhɛ bha yö ‑mü Klisi ꞊në‑ 'ka. ꞊Dhɛ ka ꞊trɔɔn ꞊dede 'ö 'dhö yö ‑mü ‑dhɛkpaɔ dhia" saan 'ö Atanna ‑ya ‑ya ‑bɔ ö 'ka ‑mɛ ‑nu ‑gɔ bha ꞊në‑ 'ka. 25 ‑A ‑gɛn ‑mü ꞊dhɛ 'wɔn ꞊gban "pɛpɛ ꞊trɔɔn‑ ‑dhö. Mɛ "ʋʋ mɛ 'ö ꞊ya 'wɔn yaa kë, ‑a ꞊trɔɔn 'ö ꞊mɔɔ‑ ‑bha Atanna ‑dho nu‑ ‑dhɛ, ‑a ‑gɛn ‑mü ꞊dhɛ 'yaa bɔ mɛ 'bha 'ka ꞊flü ‑wɔn 'gü.