1 ‑Gɔmɛ ‑nu, kaa ‑dɩ 'pö ‑a ‑naa kë ka "yaan ꞊dhɛ ka ‑gɔmɛ ‑mü Atanna 'ka 'pö dhang‑ 'gü, kö 'ka kaa‑ ꞊dhuëngzë ‑nu 'kun ‑së, kö 'wɔn 'ö ‑kë mɛ 'ka 'wɔn 'ka ꞊në‑ 'ka‑ kë‑ ‑nu 'ka.

2 Ka 'gü 'ya 'dho ga ‑bhɛa Atanna ‑dhɛ ‑sü 'ka, ‑ka ‑ya ka "yaan ‑a kë "dhʋ̈ ‑sü 'gü yi ꞊gban "pɛpɛ 'ka kö ka‑ nuɛ" bho sië ‑kpɛawo. 3 'Ka bhɛa" sië "dhʋ̈, ‑ka bhɛa" 'pö yi ‑wɔn 'gü kö ‑yö zian bho yi ‑gɔ kö 'yi‑ ‑wʋ "dhiʋ̈ ‑loo mɛ ‑nu ‑bha ‑dhɛ yö, kö Klisi ‑wɔn 'ö ‑bin ‑sü 'ka mɛ "bhɩɩ‑ ‑nu ‑gɔ 'ö 'waa‑ dɔ bha 'a‑ ‑ta "pʋ‑ ‑nu ‑dhɛ 'kpakpadhö, ‑a ‑gɛn ‑mü ꞊dhɛ a ‑kaso 'gü yö ꞊në‑ ‑wɔn 'gü ya, 4 "kɛɛ kö 'ma‑ pö, kö 'a‑ pö "pɛɛpɛdhö, kö "yi 'ya 'dho kë‑ "piʋ̈, "kɛɛ kö ‑yö kë ꞊dhɛ ‑kɔ 'ö‑ ‑dhɛ 'dhö‑ ‑bha ꞊dhɛ 'a‑ kë‑ 'ka ꞊në‑ 'dhö, ‑a ‑gɛn ‑mü ꞊dhɛ ‑a "kplëng ꞊në Atanna ‑ya bho n ‑bha.

5 ‑Ka ‑tosɛa kë ꞊kpaɔdhɛ ‑bha 'mɛ 'waa 'dhang bho Yesu ‑wɔn "dhiʋ̈‑ ‑nu "piʋ̈ (kö ka "klʋ‑ dhi‑ ‑nu ‑bha), kɛng‑ ‑nu 'ka kë ‑dhɛ do 'gü, ‑ka Klisi ‑wɔn ‑dhiang zë‑ ‑nu ‑dhɛ ‑kpɛawo, ‑a ‑gɛn ‑mü ꞊dhɛ "tʋ̈ng ꞊në ziö sië bha. 6 Ka ‑wʋ ‑yö kë "nɛɛnɛɛ yi ꞊gban "pɛpɛ 'ka kö mɛ "ʋʋ mɛ 'ö ꞊yaa‑ ma, kö‑ din‑ 'to‑ ‑mɛ "tʋʋ, kö 'ka mɛ 'ö "dhʋ̈ ‑a ‑bha dhiang ‑yɔ bɔ ‑kɔ mɔɔ‑ kö 'ka‑ bɔ‑ 'ka‑ ‑mɛ ‑gɔ.

7 Kwa dheebhang dhɔɔbhaa ‑sü Tisikö 'ö bhɔ ö ‑wʋ ‑bha, 'ö kwa Dëmɛ ‑ya ‑ya ö ‑kɔ "dhiʋ̈ 'pö, 'ö yɛng‑ 'yi‑ ‑bha yë kë sië bha ‑yö nu sië ka ‑dhɛ 'gü, yö ꞊në dho 'wɔn 'ö n ‑bha ‑a pö ka ‑dhɛ 'kpakpadhö. 8 ‑A "dhiʋ̈ ꞊në 'a‑ ꞊wlü‑ ‑bha 'yö 'a‑ bɔ. Kë "dhʋ̈ kö 'wɔn 'ö yi ‑bha 'ka‑ dɔ, "kɛɛ kö ‑yö ka faan dɔ 'pö. 9 A waa‑ Onezimö 'ö kë kwa dheebhang dhɔɔbhaasü 'ö bhɔ 'pö ö ‑wʋ ‑bha, 'ö ‑kë Kodhɔsö mi 'ka 'pö ꞊dhɛ ka 'dhö bha ꞊në‑ ‑nu bɔ. Wo ꞊në 'wo dho 'wɔn "pɛpɛ 'ö yi ‑bha ‑a ‑gɛn dɔ ka ‑dhɛ "pɛpɛdhö ‑së 'ka.

10 Adhitakö 'ö ‑kaso 'gü 'pö n "piʋ̈ yö bha ꞊ya ka ꞊tua bho, Makö 'ö ‑kë Banabasö dë dheebhang bha 'në 'ka bha, ꞊ya ka ꞊tua bho 'gbɛ. Makö bha ꞊në 'a‑ nu ‑wɔn to "dhiʋ̈ 'a‑ pö ka ‑dhɛ bha, ꞊ya nu yi 'ö‑ 'ka kö ‑yö ꞊loo mü, ‑kaa ‑dhɛng 'kun ‑së 'ka. 11 Yesu 'wo‑ 'tɔ ‑ya ‑ta ‑dhɛ Zutusö bha, ꞊ya ka ꞊tua bho 'pö. Zuifö ‑nu 'ö ꞊wa 'dhang bho Yesu ‑wɔn "dhiʋ̈ ‑a mɛ ‑yaaga bha ꞊në 'wo n ‑ta 'kun sië Atanna ‑bha yë kë ‑sü ‑bha (kë "dhʋ̈ kö mɛ ‑dee 'bha ‑nu ‑wo ‑da ‑a ‑bha ‑gblüdëdhɛ bha‑ 'gü). Wo ꞊në 'wo n faan dɔ ꞊dedewo Atanna ‑bha yë bha‑ kë ‑sü ‑bha.

12 Epaflasö 'ö ‑kë 'pö ka 'gü 'në 'ka bha, ꞊ya ka ꞊tua bho 'gbɛ. Yesu Klisi ‑bha gwëëmi ꞊dede ‑mü. ‑A 'gü 'yaa ga ‑bhɛa ka ‑wɔn 'gü ‑sü 'ka, ‑yö ‑bhɛa Atanna ‑dhɛ ö faan ꞊gban "pɛpɛ 'ka ka ‑wɔn 'gü, kë "dhʋ̈ kö ka yun ‑yö "sɛ 'kun ‑a ‑bha zian ‑ta, kö 'ka ‑kian ‑a ‑wɔn 'gü ‑kɔ ꞊gban ‑kɔ ꞊gban suu 'gü, kö 'ka‑ dhɔɔbhaawɔn ꞊në‑ kë. 13 A ‑mɔɔ ‑bha 'a‑ pö ka ‑dhɛ ꞊sii ꞊dede ‑ta ꞊dhɛ: Epaflasö bha ‑yö sëë bho sië 'mɛ 'ka bha oo, 'mɛ 'wo Dhaodise oo, 'mɛ 'wo Edhapodhi ka ‑wɔn 'gü ꞊dedewo, ‑a ‑gɛn ‑mü ꞊dhɛ ma ‑zë n "yan ‑ya ‑dhɛ 'gü. 14 Kwaa‑ ‑dhɔtrɔɔgɔn dhɔɔbhaasü Dhukö waa‑ Demasö ꞊wa ka ꞊tua bho 'gbɛ.

15 ‑Ka yii‑ ꞊tuabhonaɔ dɔ 'pö kwa dheebhang ‑nu 'wo Dhaodise ‑pö 'gü ‑a ‑nu ‑gɔ. Kö 'ka Nifasö 'ö mü bha‑ ꞊tua bho n ‑dhɛ, kö 'ka‑ pö Atanna ‑bha 'kɔdhigümɛ ‑nu 'wo ꞊loo sië wo 'ko ‑ta ‑a ‑gɔ 'kɔɔdhö bha‑ ‑nu ‑dhɛ 'ma‑ ‑nu ꞊gban "pɛpɛ ꞊tua bho 'gbɛ. 16 ꞊Ya kë ꞊dhɛ 'sëëdhɛ ya 'ka‑ ꞊slɔɔ, 'ka ka bo‑ ‑wʋ pö ‑sü 'ka, ‑kaa bɔ Atanna ‑bha 'kɔdhigümɛ ‑nu 'wo Dhaodise ‑nu ‑dhɛ 'pö kö ‑wa ‑wʋ pö, kö‑ 'dhɛ 'a‑ bɔ‑ ‑nu ‑dhɛ 'pö 'ö dho 'go mü 'ö nu ka ‑dhɛ bha 'ka‑ ‑wʋ pö 'pö.

17 ꞊Ya 'go mü ‑kaa pö 'pö Asipö ‑dhɛ ꞊dhɛ ‑yö yë 'ö kwa Dëmɛ ‑ya nu‑ ‑dhɛ bha‑ 'kun "gbɩɩ‑ ‑kɔ ꞊gban ‑kɔ ꞊gban 'gü kö ‑ya kë ö kë ‑kɔ ‑ta.

18 ꞊Tuabhonaɔ ya mang ꞊dede ꞊në 'a yö ‑zë ‑bɛn zë. Ka ‑zʋ 'ya 'dho bhɔ n ‑kë ‑kaso 'gü ‑wɔn 'ka. Atanna ‑yö ‑gasitɛ kë ka ‑dhɛ ‑kpɛawo.