1 Dage sę bidi tonalubo bidi, dagego augwali tigidali dali kolesaga deli naga yao, te doloba pai kolesaga naga yao. Koneao, dage me te tonalubo Genuai Bidi elalubao, aga dagalude bidibao. [Ef 6:9]

2 Dage Kolosi we bidi, dagego Godibolo gedu haluasa po bomo elama oduao, tagaligimio, tama subigila wagimio. Tama tiyu, agabolo puba hwi po wao. 3 Dagego gedu haluasa po obadi, Godigo da me tau somainogo te po wao, “Aya, nago po, te Kraisde polobadu geme dualali po, te po augwaligo te we bidibolo pusumainogo tų dayao,” dagego te po hanalu wao. Eno gasa we bidibolo agai po pusubaso, augwaligo ena e kalabusiba muai dao. 4 Tama tibaso, eno agai po page hanilimainogo dagego Godibolo ena tau sao po wao. Agai enabolo te sę mawai dao.

5 Dage te Godigo obo tomoba asisąwai we bidi dali bidibadi, dagego homugo kone palama tama bugagia bilao, subigila meni. Augwalibolo Godigo po pusubo sunumi dabaso da, teda augwalibolo pusao. [Ef 5:16] 6  Tama tiyu dagego wabo po sesemane sogo dwagi yai eyu tama augwaligo odai hagede emainu tama pusu yabo po naga wao. Tama bidi mego dage Godigo po pagede po me hanalu obaso da, dagego agabolo bugagia wei ponobo po kuna homu kone palama wei ponao.

7 Tikikus da, te dago aga dali dwagi yai homu eyu godolo ebo ama dao, tama agai dagebolo te enaba pedalali sę po tigidali pusaibao. Agai te ena dali homugo kęą pai bidi dao, tama agai te ena tau sabo dwagi yai sę bidi mu dao, tama da dali deli sę eyu Genuai Bidigo sę ebo bidi dao. [Tpi 20:4; 2 Ti 4:12] 8 Tikikus agai te da ede bidibo bage te daba pedalali sę po dagebolo omainogo, tama dagego te po odama homu kolesaga bomo emai yainogo eno aga dage bidibo digi tamadi tagala palaibao. [Ef 6:21-22] 9 Tama Onesimus me aga dali hodobo paibao. Onesimus aga dago dwagi yai homu ebo ama mu dao, te homugo kęą pai bidi dao. Aga Kolosi bidi hani me dao. Tama te bidi Tikikus dali Onesimus sigo da ede bidibo bageba pedalali sę po tigidali dagebolo pusaibao. [Fm vs. 10-12]

10 Aristarkus, te ena dali Jisasgo sęde kalabus elama bidibo bidi, agai siade dao te po dagebolo e pasgo ola tolobao. Tama Mak, Barnabas aga hai, dage dali agai siade dao te po ola tolobao. Dage bidibo digi aga sabaloyu da, dagego aga bugagia sao, te eno dagebolo polobadu ola tolali po tiwai agade yao. [Tpi 12:12, 25; 13:13; 15:37-39; 19:29; 27:2; Fm 24] 11 Josua, augwaligo te bidi nogi me Jastas wabo, agai me dagebolo siade dao te po ola tolobao. Aga dali, Aristarkus dali, Mak dali, augwali sela naga te Krais wali pabo Juda bage ede bidiyu tama augwaligo ena dali sę eyu, te Godigo te we bidi tonalubo kolesaga pedalomainogo ebo dao. Te gasa Jisas wali pabo Juda bagego ena te sęde tau sabo meni. Tama te bidi selago ena tau genuai mu sabo dao.

12 Epafras agai dagebolo siade dao po ola tolobao. Aga me dage hani deli dao, tama aga Krais Jisasgo sę ebo bidi dao. Sesemane sogo agai gedu haluasa po weyu homu dąų olama, tama bomo elama weyu dage tau sabo dao. Agai homugo dage Godigo homu tigidali bugagia wali peyu, tama tede homu si munu me isąyu, tama dage bidi mu pedalama tama bomo elama bugagia dolalumainogo eyu agai gedu haluasa po Godibolo weyu, “Augwali te tiwai pedalomainogo, tau sao,” agai te po wabo dao. [Kl 1:7; Fm 23] 13 Awe, ena digi eno aga koneama, eno e po agade obao, te agai dage dali, te Laodisia hanu we bidi dali, te Hierapolis hanu we bidi dali, dage tigidali tau somainogo eyu aga sę dene mu ebo dao.

14 Luk, te dago aga dali dwagi yai homu eyu godolo ebo dokta bidi dao, aga dali Demas augwali sigo dage Kolosi we bidibolo siade dao po ola tolobao. [2 Ti 4:10, 11; Fm 24]

15 Dagego eno siade dao wabo po te Laodisia hanude bidibo ama dabe, te Godigo po odobo bage augwalibolo wao. Tama eno te siade dao wabo po te we Nimfa dali, agai beba sisinibo Godigo po odobo we bidi augwalibolo me wao. 16 Dagego e pas nedelama, tama dagego te Laodisia hanude bidibo Godigo po odobo we bidibolo tolao, augwaligo me e po nedemainogo eyu yao. Tama eno te Laodisia we bidibolo asęna tolali pas po, te dagego me selama nedao. 17 Tama dagego te bidi Arkipus aga dali e po wao, “Te Genuai Bidigo nago nogoba muani sę sula tagaligio. Nage aga sę ebo bidi bidibaso, te mani sę bugagia silao,” te po Arkipusbolo wao.

18 Ena Pol da, tama ena digi eno nogogo dagebolo siade dao po asęna tolobao. Dagego ena kalabus bede bidibo te gegeda pigimio.

Eno homugo Godigo olo tau sabo kolesaga dage dali bidao. Te tama dao.