1 Dage Krais dali hodobo gų pagede ma hodaluama tama gesi noma bidabo ula elaluyu bidibao. Tama tialigo da, dagego bomo elama, duga homu te dagalude elalubo naiba muao, tede elalubo nai sabo homu yao. Tede Krais aga tuni bidi duabo saide bidibao, te God aga dolo nogo badu. [Tib 110:1] 2 Sesemane sogo dagego te Godigo bidibo digide elalubo naide homu dąų wao. Dagego tǫde naiba duga homu mugio. 3 Magi baso meni. Dage isali ąǫ tiwai yai, tama dagego megi elalubo bidibo ula te Krais dali God pagede geme dulaluyu bidibao. 4 Krais aga dago bidibo ula page bidi dao. Tama nosali aga e tǫba ma asama hania pedalama, tama dage me aga dali pedalaibao, tama dagego agai ula yai wiegi yai bomo meba elaluaibao.

5 Dage Kolosi bulude bidibo we bidi, dage Krais dali hodobo gų pagede ma hodaluali ąǫ tiwai ebaso, dagego te duga tigigo ebo dwai kolesaga tigidali isilao, te tǫde kolesaga ebo tagalao. Te tobage kolesaga e dao: dwai penani ebo kolesaga dali, meda yai kolesaga dali, te homu hodolobo dwai sę yabo kolesaga dali, te habu selali nai sabo homu ebo dali, tama doado bage hauwa sainogo godolo ebo kolesaga dali. Te doado bage hauwa sabo kolesaga da, te tibo god selama tama agabolo lotu po weyu aga dologode bidibo kolesaga tiwai dao. 6 We bidi augwaligo te tobage kolesaga dabe ebaso, te Godigo augwali dali sębę eyu, tama augwalibolo dwai dene mabo sogo mu asaibao. 7 Polobadu dage te bidi dabe dali bilali, tama dagego te tobage dwai kolesaga tigidali duga digi yai, tama te kolesagago dage aiyaba elaluali.

8 Tiali goli megi dagego e tobage kolesaga tigidali sela sąyao: boi bidi homu ebo dali, haliga sębę ebo dali, gasa bidi dene mabo homu ebo dali, te nogi posobo dwai po wabo kolesaga dali, tama meda yai po wabo dali, te tigidali sela sąyao. 9 Dagego duga hasi ama dabe tibo po wabo tagaliąo. Magi baso meni, polobadu dagego tigigo dwai sę yabo kolesaga dologode bidibo dagego tagalalio, tama te tobage dwai kolesaga ebo dagego tagalali. [Ef 4:22] 10 Tama dagego te gesi noma homu kolesaga selama elalubao. God aga digi te gesi noma bidi nigai, tama dagego aga kuna koneyu, tama aga tiwai mu pedalomainogo, agai dage sesemane sogo tau sabo dao. [Gag 1:26; Ef 4:24] 11 Tama Godigo tama tibaso, megi aga gedude te we bidi haniani tedali elalubo menio. Te Juda hani isąwai hani dali Juda bidi hani te si tedali gasagi yai meni. Te tigiwali togolama sa elalubo bage dali, te tigiwali togisiąbo bage dali, agai gedude te tedali gasagi yai me menio. Te bulu tomode mu bidibo bidi dabe dali, te bulu yowi tiwai bidibo bage me, te augwaligo sęde dąų olama masigi sisąbo sę ebo bage me, te olo bugagia bidibo we bidi me, Godigo gedude augwali tedali tedali gasagi gasagi yai meni. Te magigo meni. Krais aga digi naga te genuai dao, tama aga te aga we bidi tigidali deli deli tomode bidibao.

12 Dage da, te Godigo we bidi hani dao. Agai dage dali dwagi yai homu eyu, tama dage godolo ebaso tama dage aga we bidi hani pedalomainogo, agai dage te tigidali we bidi tomodu dią sali. Tama dią sobaso, bidigo aga gesi ugwa dabe gudubo tiwai gilama dagego e dwagi yai kolesaga selama tama yao: dagego we bidi hobede yao, augwalibolo dwagi yai sę naga yao, hagoma homu eyu duga nogi ugwaba sigio. Sesena pai homu egimio, we bidi dali dua dao. Bidigo dage dali dwai sę ebaso da, te dagego sula tagalama sębę polo egimio. 13 Duga hasi bidi me deligo “Eno ama dwai sę ena dali yali,” te po weyu, tama agai te dwai sę ebaso da, te agai nagame homu eyu aga amago yali dwai sę sęgę sela sąyao. Dago Genuai Bidi Krais agai dagego sęgę sela sąwai dao. Te tiwai gilama duga hasi dagego me abagigo sęgę sela sąyao. [Ef 4:2, 32] 14 Tama te duga hasi dwagi yai homu eyu godolo ebo kolesaga me te eno megi nogi yali haniani dwagi yai kolesagaba te polalubo kolesaga dąų walao. Te duga hasi dwagi yai homu eyu godolo ebo kolesagago te gasa haniani wiegi yai kolesaga deliba sisinama, tama wiegi yai mu pedalama tama usu niba kadu mu waibao. 15  Krais agai da dwagi yai homu nagame ilibo kolesaga ebo dao. Tama te kolesagago dagego homu tonalumainao. Magi baso meni. Dage dwagi yai homu nagame eyu bidimainogo God agai dage deli deli i olama tama deliba sisinama, tama dage tigi deli naga tiwai pedalai dao. Tama sesemane sogo dagego Godibolo puba hwi po weyu bidao. 16 Krais agai ola mani po te wiegi yai po mu naga dao. Tama te po dagego homude bugagia elalumainao. Duga hasi dagego wiegi yai homu kolesagago Kraisgo po ola mayu tama dua dao, e pode geda mugio, te tobage po weyu duga hasi ola mao. Tama tiyu, tama dagego haniani balia po wao, tama te lotu balia wabo buku nogi Tęąbi Po Buku, te bukude elalubo Godigo nogi ugwaba sabo po me, te Kraisgo nogi ugwaba sabo tęąbi po me, te Godigo Mobo Bidigo mabo haniani tęąbi pogo me duga hasi ola mao. Dagego duga homude Godibolo usu da po weyu tama te balia po wao. 17 Tama tigidali sogo dagego po obadi ma dagego nogogo sę ebadi, te tigidali ebo kolesaga dagego dago Genuai Bidi Jisasgo nogide yao, tama agai dage dali yali sęde dagego dago Aya Godibolo puba hwi po weyu bidao. [Ef 5:19-20]

18 Dage bidigo sai we dabe sibi, dage deli deli duga bidi dologode bidiyu agai po odao. Dage dago Genuai Bidi Krais wali pabo we bidibaso tama tiao. [Ef 5:22; 1 Pi 3:1]

19 We sai bidi dabe, dage deli deligo duga we dali abagi homu eyu aga bugagia tonaluao. Tama sesena pai bidigo kolesaga tiwai naga we dali egio. [Ef 5:25; 1 Pi 3:7]

20 Wai dabe, dagego duga aya ida sigo wabo nai po tigidali odoyu wali pao. Te dwagi yai kolesaga ebogo te dago Genuai Bidi dwagi yai homu ilibo dao. [Ef 6:1]

21 Aya dabe, dagego duga wai dabe dali wado po tigidali sogo olamuo, te augwali dwai homu ilibo kolesaga egimio. Dagego augwali dali te tobage kolesaga eyu da, teda augwaligo te sębę sabo homu eyu, tama dwagi yai kolesaga ebo tagalaibao. [Ef 6:4]

22 Dage sęde dąų olama masigi sisąbo sę ebo bidi dabe, duga tonalubo bidigo po tigidali wali pao. Augwaligo dage dali dwagi yai homu emainu tama augwaligo dage tonalubadi naga dagego duga sę bugagia egimio. Te meni. Tigidali sogo dagego dago Genuai Bidi Krais dali wi eyu aga dologode bidibaso, tama homu mu eyu dagego duga sę bugagia yao. 23 Tigidali sę dagego ebo, te sę dagego bomo elama yao. Tama dagego duga sę ebadi e homu yao, “Eno e sę ebo, te bidi naga tau siyu ebo menio, te eno e sę ebogo te Genuai Bidi Krais tau sabo dao,” te homu yao. 24 Tama tiyu dagego koneao, Genuai Bidi agai dage wei ponoyu tama dage aga nai nosali sabo we bidi dabe ilaibao. Te Krais aga da te dagego Genuai Bidi bidi dao, tama dagego sę ebogo aga tau sabo dao. 25 Tama niwai bidi agai dwai sę ebaso da, teda Godigo aga te yali dwai sęde wei ponaibao. Te nogi elalubo bage da, ma nogi meni yai we bidi da, te magigo meni, Godigo usu ni deligo naga da tigidali usu saibao. [Bom 10:17; Ef 6:5-9]