1 Megi da eno dagego enaba tolali pasde asęani po wei ponainogo homu ebao. Eno homugo te bidigo te we dwasianu me nogogo diąsiąbaso da, te wiegi yai dao. 2 Tiali goli te haniani penani ebo kolesaga te tǫde elalubao. Tama dagego te kolesaga idali weyu, te tigidali bidi deli deligo te augwa we sao, tama tigidali we dabe deli deligo me te augwali sali bidi dali bidao. Te bidigo tigi te aga wego da, tama bidigo me geą siyu tama dąų munu me olamuo. Te tiwai naga, wego tigi te aga bidigo da, tama wego me geą siyu tama dąų munu me olamo dao. 4 Magi baso meni. Te wego aga tigi me tonalugobeo. Menio. Te aga bidigo tonalubao. Tama te tiwai naga, te bidigo aga tigi geą selama dąų weyu munu me tonalugobeo. Menio. Te aga wego tonalubao. 5 Dage we de bidi si taluama bidibo, te me deligo me tudiba muyu tama aga tigi dąų weyu geą siyu me elamuo. Te kolesaga ebo tagalao. Mu tama, duga si homu deliba munama, tama duga si tigi te pęwadage sogo habu selabo homu elama, te duga si Godibolo gedu haluasa po wabo sę yainu osogo habu selabo homu ebaso da, te usu da. Tiali goli nosali te duga si homu deli elama te duga si tigi deliba ma taluao. Tiyu duga digi te duga tigi ma tonaluabo usu isąyu, tama Satango dage usu siyu, te dagego dwai penani sę emainogo sinabuo.

6 Te e we sabode wabo po, te dagego enabolo hanalu obaso tama eno te usu da wai. Tiali goli te eno dagego we sao po weyu te bomai po tiwai me ebeo. 7 Te eno homugo tigidali we bidi te ena digi tiwai bidimainu homu ebo dao. Tiali goli eno koneani, te Godigo tigidali bidi deli delibolo te haniani sę yabo kolesaga mani. Te me deligo te gasa tobage me tiwai tedali siyu, te gasa mego te gasa tiwai tedali sali.

8 Tiali goli te we sisąwai bidi me, te bidigo sisąwai we badi, tama te augwa bidi dabe isai we dabebolo me, te augwalibolo eno te tiwai po obao: te augwali ena tiwai bidibaso da, te wiegi yai dao. Ena da te we sisąyu enaduba bidibo bidi dao. 9 Tiali goli, te augwaligo homu me tigi te augwa digi bugagia tonaluabo homu usu yabo ąǫ isąbaso da, te augwa sao. Te augwali we sobaso da, te wiegi yai da. Tiyu augwaligo homu hogodaluyu tama dwai sę ebo homu yabuo.

10 Te we sali bidi me, te bidigo sali we te augwalibolo eno te bomai po mobao. Te eno digi eno bomai po me wabeo. Menio. Te dago Genuai Bidigo polobadu mani bomai po dao. Te e tiwai elalubao: te wego aga bidi me taga pelamuo wali. 11 Te aga bidi tagalai baso da, te aga olo bidimainao. Te meni baso da, te aga ma begasa pelama, tama aga bidi dali deli homu elama bidigi pao. Tama bidigo me te aga we munu me sela sągio. [Mt 5:32; 19:9; Mk 10:11-12; Lu 16:18]

12 Tama dage tomode gasa bidi dabe augwalibolo te ena digi eno naga te po obao, te dago Genuai Bidigo wali po meni. Eno e tiwai po obao: te ama me deligo we sali tama te wego te Kraisde konealubo po dąų wasiąbaso, tama te we aga dali bidainogo homu ebaso da, te amago te aga me sela sągio. 13 Ma, we me deli selama tama te we aga bidigo te Kraisde konealubo po dąų wasiąbaso, tama te bidi te we dali bidabo homu ebaso da, teda te wego aga te bidi me taga pelamu dao. 14 Magi baso meni. Te konealubo po dąų wasiąwani bidigo te aga we dali mu kęą pelama bidiyu, tama tebogo te aga te Godigo gedude te dwagi yai bidi ilaibao. Te tiwai naga te Kraisde konealubo po dąų wasiąwani wego te aga bidi dali mu kęą pelama bidiyu, tama tebogo te we aga te Godigo gedude te dwagi yai we ilaibao. Te meni yani da, teda dagego wai puluba dabe te augwali dwagi yai me egobeo. Tiali goli megi te augwali Godigo gedude wiegi yai elama mu bidalubao. 15 Tiali goli, te konealubo po dąų wasiąwani bidi agai te aga Kraisde konealubo po dąų wali we tagalabo homu ebaso da, te usu da, agai tagalomainao. Te tiwai kolesaga pedaliyu, te duga ama ma abe aga te kalabus tiwai me elalugobeo. Magi baso meni. Godigo dage i olama, te wiegi yai homu nagame ebo kolesaga wali pomainu ebo dao. 16 We, nago te naga bidi tau selama, te aga Godigo po wali pabo bidi pedelabo, ma meniabo, te nago konebeo. Te nage bidi, te nago naga we tau sobaso tama aga te Godigo po wali pabo we pedelabo, ma te meniabo me, te nago konebe dao.

17 Tiali goli dago Genuai Bidigo te deli deli bidibolo dobaba pali sę eyu, tama aga te sę eyu bidibadi te Godigo aga i obaso da, teda aga te sęde naga bilao. Eno te tiwai bomai po te tigidali Godigo po wali pabo we bidi hanibolo bomonama ola mabo dao. 18 Te po page e tiwai dao. Te bidi me deli te Juda dabe augwaligo aga tigiwali sa muyu tama togolama tama te tiwai bidibadi Godigo aga i waliwe? Teda, agai te aga tigiwali togwali te ma dodolabo homu egio, te tagala. Te gasa bidi me deli aga tigiwali togosiąwai bidibadi te Godigo aga i waliwe? Teda, agai tigiwali megi togogio. 19 Te tigiwali togobo kolesaga, te Godigo gedude te olo nai tiwai dao. Tama te tigiwali togosiąbo kolesaga me te aga gedude te olo nai tiwai dao. Tiali goli te Godigo bomai po wali pabo kolesaga, te mu nai dao, te sęgę dao, tede magigo meni wagimio. 20 Te bidi te sę me delide bidibadi tama Godigo aga i obaso da, teda aga te sęde me bididuao. 21 Te e tiwai dao. Te nage masigi sisąbo olo sę ebo bidi bidibadi tama Godigo nage i waliwe? Teda, tagala, magigo menio. Tiali goli, nago te masigi sisąbo olo sę ebo tagalabo sunumi elalubaso da, teda nago te sunumi wali pao. 22 Tiali goli te olo mu sę ebo bidi bidibadi tama Godigo aga i wali, megi da te aga dago Genuai Bidigo selama, tama te Genuai Bidigo gedude te aga olo sę ebo bidi me bidigobeo, te aga olo naga bidibao. Te tiwai naga, te olo wiegi yai bidali bidi, te olo sę me isąbadi tama Genuai Bidigo aga i wali, megi da aga te Kraisde masigi sisąbo olo sę ebo bidi tiwai pedalama bidibao. 23 Te Godigo te genuai naigo mu dage ma abelalio. Tama tibaso, dage te bidi dabede te masigi sisąbo olo sę ebo bidi tiwai me pedaligimio, te bidi dabego olo nigibo bomo yai po dologoba bidigi pigimio. 24 Te ama dedeo, te dage deli deli te niwai sę bidi bidibadi tama Godigo aga i obaso, aga te sęde naga te God dali deli homu eyu tama bidimainao.

25 Te bidigo sisąwai we te augwalide po tama, eno te dago Genuai Bidigo bomai po me elalubo meni, tiali goli eno te ena homude po pusubao. Te Godigo olo tau sabo wiegi yai kolesaga enade elama, tama agai ena te homu mu naga ebo bidi ilali, tama dage enaba duga homugo tialubo te usu dao. 26 Eno homugo e tiwai kolesaga ebo te wiegi yai da wai: te megi tama sogo te genuai sęgę dali dene dali si te daba pedalubao, gasa bidi dabego nogogo. Tama tibaso, dage tigidali deli deli te megi bidibo tiwai gilama te tama bidaluao, te eno homu dao. 27 Te nago we sai dawe? Tialima, te nago aga tagalabo sunumi gegebo sę me egio. Te nago we sabe dawe? Teda, nago te we sabo homu ma elamuo. 28 Tiali goli, te nago we siyu da, te dwai sę meni. Tama te gesi wegi te bidigo siyu da, te wegi agai te dwai sę me ebeo. Tiali goli te we sali bidi me te bidigo sali we te augwali sęgę meba te tǫde elaluaibao, tama eno homugo te tobage sę dageba pedalidali homu eyu eno e po obao, te dage megi bidibo tiwai gilama te tama bidaluao.

29 Ama dedeo, eno te megi wali po te page e dao: te tǫ dali dagalu si silabo bodolu megi da pęwadage ebao. Tama tibaso, te bodolu sogo elalubadi, te tǫde elalubo naide naga dago homugo kone pelamuo. Te we elalubo bidi dabe te augwali te we meni yai bidi dabe bidibo tiwai bidao. 30 Tama te homu dene eyu gela wabo bidi dabe, augwali te gela wasiąbo bidi dabe tiwai bidaluao. Te wiegi yai homu pemene ebo bidi dabe, te augwali wiegi yai homu pemene isąbo bidi dabe tiwai bidao. Tama te doado bage abelebo bidi dabe, augwali te doado bage mu sisąbo bidi bidibo tiwai bidao. 31 Tama te tǫde doado bage sabo bisnis sę ebo bidi dabe, augwali te e tǫde doado bage dąų olalusiąbo bidi dabe tiwai bidao. Dago te tǫde elalubo nai dali kolesaga dali si tede naga dago homugo kone pelamuo. Dago koneani, te e megi elalubo tǫ silama tama hasegelama, tama te gasagi yai mu pedalaibao.

32 Tama tibaso, eno homugo te haniani naide te dagego moni homu isąyu tama dage bugagia bidao. Te we sisąwai bidigo, agai te dago Genuai Bidigo kolesagade te aga homugo kone palobo dao, te kolesaga aga bugagia wali pomainogo aga tama tebo dao. Agai te Genuai Bidigo homugo godolo yabo kolesaga yabo homu ebo dao. 33 Tiali goli te we sali bidi, agai te tǫde doado bagede homugo kone palobo dao. Agai te aga wego godolo ebo kolesaga yabo homu ebo dao. 34 Tama tiyu, agai homu kolesaga pebeda paibao. Tama bidigo sisąwai we me, te gesi wegi me, agai te dago Genuai Bidigo kolesagade te agai homugo kone palobo dao. Aga homugo te aga tigi me te homu mobo bidi dali me te Godigo gedude bugagia wiegi yai mu bidimainu homu ebo dao. Tiali goli te bidigo sali we, agai te tǫde doado bagede homugo kone palobo dao. Agai te aga bidigo godolo ebo kolesaga yabo homu ebo dao.

35 Eno te megi asęani po te dage tau selama dage bugagia bidimainogo wali. Te dage palibo po me wabeo. Menio. Eno homugo te dage dolasa bidiyu, tama agade dagego homugo kęą peyu tama sesemane sogo te dago Genuai Bidigo sę emainogo, te nai me deligo te dage homu kegabi sidali weyu te po wali.

36 Te bidi me deli aga homugo agai te dolo meniabo kolesaga te aga noma sali gesi wegi te dali te tiwai kolesaga ebaso, tama agai homu te wede hodoloyu bomo mu eyu, tama agai suali te gasa sunumi me elalusiąbaso da, teda te bidigo te wegi kęmainao. Te sęgę sabo sę ebeo. Te augwa si bidimainao. 37 Tiali goli, te bidi me deligo aga homude bomo eyu, tama te nai me deligo te aga selibo sę me isiąbadi, tama aga homugo digi ebo tonaluyu, tama aga homude te po olama, te agai homugo te gesi wegi te augwaligo aga noma sali te aga olo mu bidimainogo ebaso da, te wiegi yai dao. 38 Tama tibaso, bidigo te gesi wegi sabo, te agai wiegi yai kolesaga ebao. Tama te we sisąwai bidi, agai kolesaga te wiegi yai mu ebao.

39 Te we me deligo bidi te aga bidi bidibadi, te we te aga bidi dali naga kęą pelama bidao. Tiali goli, te we aga bidi isibo si da, te we te bidi dali me kęąlubeo. Te aga gasa bidi dali pabo homu ebaso da, teda aga te bidi dali pomainao. Tiali goli aga te Godigo po wali pabo bidi dali naga pao. 40 Tiali goli ena digi eno homugo te tiwai homu yai: te bidi isai we aga olo bidainogo ebaso da, te aga wiegi yai homu pemene mu yaibao. Tama eno homugo te Godigo Tedali Mobo Bidi te enade me bidiyu, tama agai ena te kolesagade agai homu ola mani.