1 Te dage tomode bidi me deligo po te gasa bidi me dali elalubaso da, te agai te Godigo we bidi bolama tama te Godigo po odisąwani jas bidi dabe gesabidide te po tų egi pogowe? Ya! Agai te tebo kolesagade te aga hale meni yaibawe? 2 Da Godigo we bidi te dago te tigidali tǫde bidigo kolesaga nosali dagalainu yaibao, te dagego konesiąmawe? Mu tama, te dagego te tigidali tǫde bidigo kolesaga dagalaibao. Tama magi egowe? Te dagego duga hasi te tobage dwasianu po naga dagalobo te usu meniwe? 3 Te dago te mobo bidi ensel dabego kolesaga me nosali dagalaibao, te me dagego konebewe? Mu tama, te dago augwaligo kolesaga te dagalaibao. Tama tibaso, dago te tǫde dwasianu nai dabe po dagalobaso te usu mu yaibao. 4 Tama tialigo da, teda dagego e tǫde naide po elalubaso da, magi baso dagego te po dagalobo sę te Godigo po odisąma te dago gedude nogi meni yani bidiba mobawe? 5 Eno te po wabode dage bugagia bidimainu obao, te dagego te tiwai ebo kolesagade te dage hale yao! Magi baso meni. Te dage tomode te ama name si tomode pedalobo po dagalabo te kolesaga koneai bidi me deli naga meni ebawe? 6 Tiali goli dagego te tiwai ebo meni. Te po pagede naga te ama me deligo te gasa ama me te po tų ela mayu, tama te Kraisde konealubo po dąų wasiąwani bidi dabe gedude te po tų ilibo da. Te dwali.

7 Awe, dagego duga hasi te ama dabe po tų ilibo, tama te kolesagade digi te dage tulalualio. Magi baso augwaligo te dwai sę dagebolo emainu gogolobewe? Magi baso te augwaligo dagego doado bage anoma elama somainogo gogolobewe? Dagego te tiwai egi sogo da, teda tebogo dagego te Godigo po odisąwani bidigo gedude po tų ebo kolesaga aiyaba elalugi da. 8 Tiali goli menio. Duga digi te meba bidi dabe dali dwai sę elama, tama augwaligo doado bage anoma elama sali! Awe, dagego te tiwai dwai kolesaga te duga ama dabe mu dali ebo dao. 9 Te dwai kolesaga ebo bidi dabe, augwali te augwali Godigo te we bidi tonalubo bomo tomoba me pogobeo. Te dagego konebewe? Tiyu dagego te duga homuba digi tibo po ola maiabuo. Te penani sę kolesaga ebo bidi dabe me, tama te tibo god wali pabo bidi dabe me, te we sabo kolesaga dolobo bidi dabe badi, tama te we dali ebo kolesaga tiwai eyu godolo ebo bidi dabe me, tama te hale ebo kolesaga te gasa bidi dabe dali ebo bidi dabe me, 10 tama te nai wi sabo bidi dabe tama te gasa bidi dabego doado bagede pesa homu ebo bidi dabe me, tama te bomai wę tubo bidi me, tama te gasa bidi dali posobo po wabo bidi dabe me, tama te gasa bidi dabego doado bage anoma elama sabo bidi dabe me, te tobage kolesaga ebo bidi dabe tigidali te augwali Godigo we bidi bugagia tonalubo bomo tomoba pabo usu me egobeo. 11 Tama polobadu dage meba te tiwai sę ebo we bidi dabe bidaluali. Tiali goli dagego te dwai sę ebo tagalama, tama baptais salio. Godigo dage aga da olama sa muai. Dagego te doloba pai nogi salio. Te Genuai Bidi Jisas Krais me te Godigo Tedali Mobo augwali sigo sę eyu, tama dage Godigo gedude doloba pai we bidi hani tama pedalai dao.

12 Dage tomode te bidi me deligo e tiwai homu ebo dao, ‘Te tigidali sę eno ebo da te usu egi da.’ Awe, mu tama. Tiali goli te tigidali sę ebogo ena tau me sogobe. Tigidali kolesaga eno yabo usu da yaibao. Tiali goli eno te kolesaga me deli ebogo te ena tonalumainu me gogologobeo. 13 Gasa bidigo eno po aiyaba elalumainu eyu e tiwai po waibao, “Tubo nai te tabigo sabo nai da, tama tabigo te nai sabo dao.” Agai homu te tiwai me aga tigigo te dwai penani sę ebo te me usu dao, te aga tigigo yabo sę dao. Awe, agai te tubo nai dali te tabi dali side wali po te mu dao. Tiali goli Godigo te si dali nosali silaibao. Tiali goli dago tigigo te penani kolesaga yabo nai meni. Menio. Dago tigi da te dago Genuai Bidigo nai dao. Tama Genuai Bidi te tigi tau sabo nai dabolo mabo dao. 14 Tama tiyu, God aga bomogo digi te dago Genuai Bidi te gų pagede hodolali, tama te tiwai dago tigi tau siyu agai da me hodolaibao.

15 Te dage deli deligo tigi te Kraisgo tigi nogo sągą tiwai elalubo, te dagego me konebewe? Tama eno te Kraisgo tigi pedai me badu dagala selama, tama penani eyu, te genuai tųdu bilibo wego tigiba munama elalumainu homu egowe? Munu me tegobeo. Mu menio! 16 Te penani sę ebo we dali kisa sali bidi, te aga dali te tigi deli aga dali yali, te dagego konebewe? Godigo po bukude te tiwai po olama hania wali, “Te bidi dali aga we dali augwali si tigi deli naga pedalali,” te po asęani. [Gag 2:24] 17 Tiali goli te Genuai Bidi dali kęą sali bidi da, agai homu mobo bidi te aga dali deli elalubo dao.

18 Dage te penani kolesaga idali weyu te boi bidi tiwai wi pao! Te tigidali dwai sę te bidigo ebo, te tigi bulu badu ebo dao. Tiali goli te penani sę kolesaga ebo bidi, agai aga tigi aga digi dolobo dao. 19 Te dagego tigi da, te homude Godigo Tedali Wiegi Yai Mobogo be elalubao, te dagego konebewe? Godigo te Tedali Wiegi Yai Mobo te dagebolo manio, tama te Mobo dage tomode bidibao. Dage te dugade digi me elalubo meni. [1 Ko 3:16; 2 Ko 6:16] 20 Menio. Godigo te genuai naigo mu dage ma abelalio. Tama tibaso, penani sę isąyu, te dagego tigigo te dagego Godigo nogi ugwaba sabo kolesaga naga yao.