1  * Eze 40.3; Zek 2.1-2Kaeŋ nijoro moma nambe Siwe gajoba iikanoŋ keda aambaa gere goroŋa bowo kaaŋa ii noma kokaeŋ jeŋ kotoŋ nono, “Gii mono waama kema Anutuwaa jiwowoŋ jigo ano iikawaa siimoloŋ alataya ii keda aambaa gere goroŋa (rula mesa) kanoŋ soya ama weeŋgowa. Kaaŋagadeeŋ iikanoŋ uma Anutu mepeseeŋ qamakooligia amakejuti, mono ii gosiŋ jaŋgogia weeŋgowa. 2  * Luuk 21.24Jiwowoŋ jigo soya ama kanoŋ sombeŋ seleeŋgeŋa ii mono uuguŋ mesaowa. Ii waba kantri yoŋoojoŋ ama oŋoŋgi ero yoŋonoŋ siti toroya ii koiŋ 42 kawaa so riiŋ kema kaŋkebu. Kawaajoŋ sombeŋ seleeŋgeŋaa soya ii mende weeŋgowa. 3 Niinoŋ jotamemewoina wasiŋ oroma qaana naŋgoŋ jewaotiwaa ku-usuŋa ama orombe asugiwao. Asugiŋ wosobiriwaa maleku sokosaare kaaŋa meŋ aoŋ liligoŋ (gbakoŋ osoga ariŋ) weeŋ boria 1,260 kawaa so gejatootoo qaa gawoŋ meŋ laligowao.”

4  * Zek 4.3, 11-14Oil gere woi ano lambe duŋ raraya woi namowaa Pombaa batanoŋ nanjaoti, ii mono meleema kamaaŋ asugiŋ daŋgunu kaaŋa nama noo kaniana naŋgoŋ jeŋ laligowao. 5 Moŋnoŋ me moŋnoŋ uruŋ mizimizi ama oromambaajoŋ moji eeŋ, gere bolaŋanoŋ mono buugaranoŋga kamaaŋ kereurugara oŋooro tiwilaaŋkebuya. Moŋnoŋ me moŋnoŋ urumambaajoŋ moji eeŋ, ii mono kana kaaŋiadeeŋ iikanoŋ qeri komuwaa.

6  * 1 Kiŋ 17.1; Eks 7.17-19; 1 Sml 4.8Sombimbaa koosuya somoŋgowaotiwaa ku-usuŋa ii yoroonoŋ ero gejatootoo qaa jeŋ seiwaoti, kambaŋ iikawaa so koŋ mende kiwaa. Ku-usuŋgaranoŋ apu jaaya kuuya kaaŋiadeeŋ sokono iikanoŋ saanoŋ apu kuuya meleeŋgi sa koloowuya. Kaaŋiadeeŋ ku-usuŋgaranoŋ uuta ejiwaajoŋ ama siiŋgaranoŋ jewaatiwaa so saanoŋ jegi lombo kanjaŋawo kania kania kolooŋ namo meŋ boliŋ ejemba uŋuŋkebuya.

7  * Dan 7.7, 21; Ais 13.5-7; 17.8Anutuwaa qaaya naŋgoŋ jeŋ tegori omejiilaŋ yoŋoo roŋ dusiita qaa iikanoŋa jeŋnemba moŋnoŋ waama manja qeŋ oroma haamo ama ururo komuwao. 8  * Ais 1.9-10Komuri qamogara siti qabuŋayawowaa kana somatanoŋ oromesaogi laŋ ewao. Siti iikawaa qata aasaŋgoya ii Sodom ano Iijipt qamakeju. Poŋgara Jiisas ii kaaŋagadeeŋ iikanoŋ maripoonoŋ qegi komuro. 9 Qamogaranoŋ laŋ eri ejemba kuuya ii iriimakebuya. Balonoŋ roŋ koma orombombaajoŋ jegi aŋgoŋ kombuya. Kaeŋ eeŋ laŋ eri ejemba kantria kantria, tuuŋa tuuŋa, beŋsakoŋ isia isia qaa tanigia aŋa aŋa jeŋkejuti, iyoŋonoŋ qamogara ii weeŋ karooŋ ano bakaya moŋ kawaa so uuŋ irigigiigi.

10 Gejatootoo eja woi yoronoŋ ejemba namo qaganoŋ laligojuti, ii uu kuuŋ oŋoni iikawaajoŋ siimbobolo honoŋa mende mokolooŋ laligogi. Kawaajoŋ komuri qamogara iriimakebuti, kambaŋ iikanoŋ mono otokoriaŋ maama renduŋ oroŋ neŋ korisoro ama iyaŋgia kaleŋ kania kania aŋguŋ aogi kema kawaa. 11  * Eze 37.10Weeŋ karooŋ ano bakaya moŋ ii tegoro Anutunoŋ buu aasoŋ sewaŋgaranoŋ uuro kemero gbiliŋ waama koŋa nani. Waama nani ejembanoŋ iriima riimburatiŋ jeneŋgia ororo sombugia mogi. 12  * 2 Kiŋ 2.11Koŋa nani Siwenoŋga qa kotakota moŋ kokaeŋ qama irijoro, “Oro mono kokaeŋ waabao!” Kaeŋ irijoro moma koosu uutanoŋ waama Siwenoŋ uri kereurugaranoŋ eeŋ iriima newogia tegoro naŋgi.

13  * Isa 6.12; 16.18Kanagaranoŋ namo mesaoŋ uri kambaŋ iikanondeeŋ naŋ tania soosooya meŋ siti bakaya 10% (bakaya tenoŋga motooŋgo) kawaa so kuma qenjanjaŋgoro kamaaro. Kamaaŋ ejemba 7,000 kawaa so uŋuro komugi. Ejemba mende komugiti, iyoŋonoŋ ii iima riimburatiŋ sombugia moma Siwewaa beŋa Anutu ii ku-usuŋaa mepeseeŋ mugi qabuŋayawo kolooro.

14 ‘Yei!’ qama wanjinjiŋa woiya kanjaŋawo ii kaeŋ tegoroto, mobu, qama wanjinjiŋ yei qa karooŋaa hoŋanoŋ mono uulaŋawo kolooŋ qagianoŋ ubaa. Kiaŋ.

15  * Eks 15.18; Dan 2.44; 7.14, 27Siwe gajoba 7:ŋa iinoŋ romoŋa qaita moŋ (biugel) uuro. Ii uuro Siwenoŋ qaa kotakotagadeeŋ amiŋ mogi qagia mobe kokaeŋ jegi, “Ayo, ananaa Poŋnana ano iwaa Hamoqeqe Toya Kraist yoronoŋ mono namo kuuya galeŋ koma oŋombaotiwaa ku-usuŋa ii kuuya buŋa qeŋ aojao. Iinoŋ mono kambaŋa kambaŋa galeŋ koma oŋoma laligowaa, ee-aa-ee. Galeŋkoŋkoŋanoŋ mono kambaŋ moŋnoŋ mende tegowaa, ee-aa-ee.” 16 Kaeŋ jegi mobe Anutuwaa jotamemeya 24 Anutuwaa jaasewaŋanoŋ jiŋkaroŋ duŋgianoŋ rajuti, iyoŋonoŋ mono kamaaŋ usugoŋ Anutu waeya meŋ mepeseeŋ mugi. 17 Mepeseeŋ muŋ kokaeŋ jegi,

19  * Isa 8.5; 16.18, 21Kawaa gematanoŋ Siwenoŋ aantano Anutuwaa mepemepesee jigowaa (tempel) naguyanoŋ tano iibe jigo uutanoŋ Anutuwaanoŋ soomoŋgo areŋ bokis akadamuyawo iikanoŋ ii-iita ero.* Anutuwaanoŋ jojopaŋ qaa 10 ano jeŋkooto tosaaŋa ii jamo ilaŋanoŋ ooŋ bokis iikawaa uutanoŋ aŋgi raro galeŋ komakeju. Siwenoŋ aantano kambaŋ iikanondeeŋ oobili ano guŋparandaŋ gbiŋgururuŋ qaro mobe. Otoŋa otoŋa ii mobe naŋ meŋ koŋ rombuŋ giliro kombo (ais) kota somasomata kamaagi. Kiaŋ.