8
Emba tosianoŋ Jiisas naŋgoŋ keŋgi.
1 Kawaa gematanoŋ Jiisasnoŋ liligoŋ taoŋa taoŋa ano gomaŋa gomaŋa kanoŋ kema Anutuwaa bentotombaa kania jeŋ asariŋ Oligaa Buŋa qaanoŋ ejemba uugia kuuŋ laligoro. Gowokouruta 12 yoŋonoŋ iwo motooŋ keŋgi. 2 * Mat 27.55-56; Maak 15.40-41; Luuk 23.49Kaaŋagadeeŋ emba tosianoŋ iwo keŋgi. Emba ii wala ji iŋiro omenoŋ kokojinjiŋ meŋ oŋono laligogi Jiisasnoŋ meŋ qeaŋgoŋ oŋono. Emba ii kokaeŋ: Magdalaga emba moŋ qata Maria qagi. Jiisasnoŋ iwaa uutanoŋga ome 7 oŋotaaro kouma keŋgi. 3 Emba moŋ qata Joana. Iwaa loya qata Kuza iinoŋ kiŋ Herodwaa jiŋkaroŋ miri kanoŋ gawmambaa moneŋ galeŋaga laligoro. Emba moŋ qata Susana. Yoŋonoŋ ano emba tosaaŋa mamaga yoŋonoŋ iyaŋgiaa moneŋ esuhinagianoŋ Jiisas ano gowokouruta kananoŋ galeŋ koma naŋgoŋ oŋoŋgi. Kiaŋ.
Qosomakororoo ejawaa sareqaa
Mat 13.1-9; Maak 4.1-9
4 Ejembanoŋ taoŋ so kanoŋa horoŋ Jiisaswaanoŋ kaŋ tuuŋlelembenoŋ ajoroogi Jiisasnoŋ sareqaa moŋ kokaeŋ jero:
5 “Eja moŋnoŋ nene kota qosoma kororoomambaajoŋ keno. Kema qosono kota tosianoŋ kana goraayanoŋ kemeŋ koŋgi. Kemeŋ koŋgi ejembanoŋ riiŋ rikotaagi kanakeewaŋaa (waraweŋ) kooŋa kooŋa kouma ii nedaborogi. 6 Kota tosianoŋ jamo kowonjinoŋ kemeŋ koŋgi. Kemeŋ koma kanoŋ namo apuyawo mende mokolooŋ kuragagia kouma sooliŋ gororoŋgogi.
7 “Kota tosianoŋ komuntiri waayawonoŋ kemeŋ koŋgi. Kemeŋ koŋgi iikanoŋ ororoŋ kouma uŋuuguŋ qeŋ turuŋ bibiloko meŋ oŋoŋgi. 8 Kota tosianoŋ namo awaanoŋ kemeŋ koŋgi. Kemeŋ koma juma waama hoŋgia awaa kolooŋ handewaa so kolooŋ seigi.”
Qaa ii jedaboroŋ qa somata kokaeŋ qaro, “Moŋnoŋ uugejiawo laligoji eeŋ, iinoŋ mono sareqaa koi geja ama moma kotowa.” Kiaŋ.
Jiisasnoŋ nomaembaajoŋ sareqaawaa kania jero.
Mat 13.10-17; Maak 4.10-12
9 Kaeŋ jero gowokourutanoŋ sareqaa kokawaa kaniaajoŋ Jiisas qisiŋ mugi. 10 * Ais 6.9-10Qisiŋ mugi jero, “Anutuwaa bentotoŋanoŋ keuma laligowoŋatiwaa qaa aasaŋgoya ii oŋo asuganoŋ iŋijowe moma kotojuto, tosaaŋa yoŋoojoŋ ii sareqaanoŋ jewe momakeju. Kaeŋ moma iyaŋgiaa jaagianoŋ iwoi iimago kania kileŋ mende iima kotowuya. Iyaŋgiaa gejagianoŋ qaa tororo momago kania kileŋ mende moma asariwuya.”
Jiisasnoŋ sareqaawaa kania jero.
Mat 13.18-23; Maak 4.13-20
11 “Sareqaa iikawaa kania ii kokaeŋ: Kota qosoma kororooji, ii Anutuwaanoŋ Buŋa qaa. 12 Nene kota kana goraayanoŋ kemeŋ koŋgiti, ii kokaeŋ: Ejemba tosianoŋ Buŋa qaa mojuto, ii mogi Kileŋaa Toyanoŋ kaŋ uugia meleema Siwewaa buŋa koloowubotiwaajoŋ qaa kota ii uugianoŋga qetegoŋ uŋuamakeja. 13 Nene kota qosono jamo kowonjinoŋ kemeŋ koŋgiti, ii ejemba sareya moŋ. Yoŋonoŋ Buŋa qaa moma ii uuqeeaŋgo qaganoŋ moma aŋgoŋ komakejuto, uugianoŋ kemeŋ tiigia mende megitiwaajoŋ kambaŋ torodaamo-ŋadeeŋ moma laariŋ laligogi aŋgobatowaa kambaŋanoŋ mono tama uŋuwaa.
14 “Nene kota qosono kumuntiri waayawonoŋ kemeŋ koŋgiti, ii kokaeŋ: Yoŋonoŋ Buŋa qaa mogi uugianoŋ kemeŋkejato, balonoŋ laaligowaa majakakaya ano moneŋ hina memewaa uugereya kolooŋ bimooŋ oŋomakeja. Qabuŋagiawo koloowombaajoŋ koposoŋgogi siiŋ kombombaŋa bologa tosianoŋ kaaŋagadeeŋ uugianoŋ duŋguŋ Buŋa qaa bibiloko meŋ muŋkeju. Kaeŋ kolooro hoŋgia qaa auta (gipeya) koloowuya. 15 Kaento, nene kota namo awaanoŋ kemeŋ koŋgiti, ii ejemba koi kaaŋa: Yoŋonoŋ Buŋa qaa geja ama mogi uugia awaa gbiŋgbaoŋa qaa iikanoŋ kemero soowabotiwaajoŋ mokosiŋgoŋ kaparaŋ koma galeŋ koŋgi hoŋgia awaa awaa mokolooŋkeju.” Kiaŋ.
Iwoi aasaŋgoya kuuya ii asuganoŋ koloowaa.
Maak 4.21-25
16 * Mat 5.15; Luuk 11.33“Moŋnoŋ lambe me kiwa ootiriŋ monjonoŋ mende koma turuwaa me duŋ baatanoŋ mende ambaa. Ii qaagoto, ii iikawaa duŋ qaganoŋ ano rabaa. Rama asariro tosianoŋ miri uutanoŋ ubombaajoŋ mojuti, yoŋonoŋ iikawaa asasaga iima saanoŋ ubuya.
17 * Mat 10.26; Luuk 12.2“Kaaŋiadeeŋ uunananoŋ iwoi moŋ mesaŋgoniŋ aasaŋgoyanoŋ eji, ii mono asuganoŋ koloowaa. Iwoi moŋ koma turuniŋ eji, ii mono luluuŋgi asuganoŋ ewaa.
18 * Mat 25.29; Luuk 19.26“Kawaajoŋ Anutuwaa qaa mojuti, ii mono uu wombogianoŋ ama romoŋgoŋ koma gbiliŋ laligowu. Moŋnoŋ momakootoyawo laligoji, Anutunoŋ mono ii toroqeŋ muro somariiwaato, moŋnoŋ momakootoya qaa laligojato, ‘Kawo laligojeŋ,’ jeji, Anutunoŋ mono momoya melaa ii kaaŋagadeeŋ qetegoŋ wambaa.” Kiaŋ.
Jiisaswaa nemuŋkouruta.
Mat 12.46-50; Maak 3.31-35
19 Jiisasnoŋ kaeŋ jeŋ laligoro nemuŋ kourutanoŋ ii iibombaajoŋ kagito, ejemba tuuŋ somatanoŋ ologoŋ eligogitiwaajoŋ kosianoŋ kembombaajoŋ amamaagi. 20 Amamaaŋ naŋgi moŋnoŋ kokaeŋ ijoro, “Goo nemuŋkoaŋga mono seleeŋgeŋ nama gii giibombaajoŋ moju.”
21 Ijoroto, Jiisasnoŋ kokaeŋ meleema iŋijoro, “Ejemba koi Anutuwaa Buŋa qaa moma teŋ koma koma gbiliŋkejuti, iyoŋonoŋ mono noo nemuna ano kouruna kolooju.” Kiaŋ.
Jiisasnoŋ jero raidimboŋ goroŋ qero.
Mat 8.23-27; Maak 4.35-41
22 Weeŋ moŋnoŋ Jiisasnoŋ gowokouruta kokaeŋ iŋijoro, “Mono mesaoŋ apu aŋgoŋ kotoŋ leegeŋ keuboŋa.” Kaeŋ jero waŋgonoŋ motooŋ uma apu aŋgoŋ qaganoŋ keŋgi. 23 Kema opo sel mororoŋgogi haamonoŋ naŋgoro keŋgi Jiisasnoŋ gaoŋ ero. Ero haamo raidimboŋ apu aŋgonoŋ giliŋ siri qindiiro waŋgo uutanoŋ kemero. Kemeŋ saa qemambaajoŋ ano tiwilaawombaajoŋ aŋgi.
24 Tiwilaawombaajoŋ ama gowokourutanoŋ kema mindiiŋ ijogi, “Poŋ Somatanana, mono nono aŋgonoŋ tiwilaawombaajoŋ anjoŋ.” Kaeŋ ijogi uuta tooro musu ano apu aŋgombaa siria kokaeŋ jeŋ kotoŋ orono esuŋgaranoŋ kamaaro goroŋ qeŋ ero.
25 Kaeŋ kolooro iŋijoro, “Oŋoo momalaarigia ii dakanoŋ?” Kaeŋ iŋijoroto, yoŋonoŋ awawaliŋ qarasombugia moma jegi, “Yei! Eja koi naa ejaga laligoja? Iinoŋ musu ano kowe siri jeŋ kotoŋ orono jeta teŋ konjao.” Kiaŋ.
Omenoŋ bao uugianoŋ kemegi ejanoŋ qeaŋgoro.
Mat 8.28-34; Maak 5.1-20
26 Jiisasnoŋ gowokouruta yoŋowo toroqeŋ opo sel mororoŋgogi haamonoŋ naŋgoro kema apu aŋgoŋ kotoŋ Galili prowins leegeŋ Gerasa gomanoŋ keugi. 27 Iikanoŋ keuma sakasinoŋ uro eja omeyawo moŋ taonoŋga kaŋ Jiisas mokolooro. Eja ii qasirinoŋ laligoŋ qamowaa jamo kobaa osoŋ uroroogi egiti, iikanoŋ eŋ laligoro. Kambaŋ koriga opo maleku mende mouma miri mombaa uutanoŋ mende eŋ laligoro.
28-29 Omenoŋ kambaŋ koriga horoŋ ureeŋ muro eja mamaganoŋ boria bota qeŋ kania gbadonoŋ (tapenoŋ) somoŋgoŋ galeŋ koma laligogito, tapeya ii hororo riiqiiro omenoŋ kuuro baloŋ qararaŋkoŋkoŋanoŋ kema laŋ laligoro. Kawaajoŋ Jiisasnoŋ omeya ii kokaeŋ jeŋ kotoŋ mumambaajoŋ ano, “Ome bologa, gii mono kouma eja koi mesaoŋ kemba.” Kaeŋ jemambaajoŋ ano Jiisas iima silama namonoŋ kosianoŋ kemeŋ qa gigilaaŋ kokaeŋ qaro, “Ae Jiisas, gii Anutu uutaa meria koloojaŋ. Gii mono nomaeŋ ama nomambaajoŋ koi kajaŋ? Niinoŋ welema gonjeŋ: Gii siimbobolo geriawo mende ama nomba.”
30 Kaeŋ qaro kokaeŋ qisiro, “Gii qaga moro?” Omejiilaŋ mamaga uutanoŋ kemeŋ laligogitiwaajoŋ “Qanana Liijon jejoŋ,” jegi. Ii ananaa qaanoŋ Kere tuuŋ somata. 31 Kaeŋ jeŋ Jiisas kokaeŋ welema mugi, “Gii nonotaaŋ ome roŋ dusiita qaa iikanoŋ kemebombaajoŋ mende jeŋ kotoŋ nonomba.”
32 Kosogianoŋ maroŋa kanoŋ bao tuuŋ somata moŋ gbojoja uutanoŋ kuluuma laligogi. Kawaajoŋ ome yoŋonoŋ kokaeŋ jeŋ welema mugi, “Gii saanoŋ jena nono bao yoŋoo uugianoŋ kemeboŋa.” Welema mugi “Mono kema kemebu,” jeŋ kotoŋ oŋono. 33 Jeŋ kotoŋ oŋono eja uutanoŋga kouma kema bao uugianoŋ kemegi. Kemegi bao tuuŋ yoŋonoŋ luguŋ newonewonoŋ kema jororoŋgoŋ apu aŋgonoŋ kemeŋ nemotoŋ komugi.
34 Iikaeŋ kolooro bao galeŋ yoŋonoŋ ii iima taoŋ ano gomaŋ boleboole kanoŋ kok koma unjurama kema buju qaa ii jegi. 35 Jegi moma ejemba jaasooŋgo yoŋonoŋ iwoi kolooroti, ii iibombaajoŋ kagi. Kaŋ Jiisaswaanoŋ kouma eja uutanoŋga omenoŋ kougiti, iinoŋ Jiisaswaa kanianoŋ raro mokoloogi. Opo selekopaaya tororo somoŋgoŋ uuta tooro roromoŋgoya kuuya asugiro iima awawaligi. 36 Eja omeyawo iinoŋ nomaeŋ qeaŋgoroti, ii iigitinoŋ iŋijogi.
37 Iŋijogi moma mamaganoŋ awawaliŋ qarasombugia mogi. Kawaajoŋ Gerasa gomambaa ejemba tuuŋ kuuya yoŋonoŋ Jiisasnoŋ oŋomesaowaatiwaajoŋ welema mugi. Welema mugi eleema kemambaajoŋ waŋgonoŋ umambaa ano. 38 Umambaa ano eja uutanoŋga ome kougiti, iinoŋ kaŋ Jiisaswo motooŋ kema laligomambaajoŋ qisiro. Kaeŋ qisiroto, Jiisasnoŋ qotogoŋ wasiŋ muŋ kokaeŋ ijoro,
39 “Gii mono eleema miriganoŋ kema Anutunoŋ aŋgoleto somasomata meŋ gonoti, iikawaa sunduya jena mobu.” Kaeŋ ijoro kema Jiisasnoŋ aŋgoleto somasomata meŋ muroti, iikawaa qaaya ii taoŋ uutanoŋ liligoŋ gomaŋ so jeŋ seiro. Kiaŋ.
Jairusnoŋ borataajoŋ Jiisas qama kooliro.
Mat 9.18-26; Maak 5.21-43
40 Ejemba kuuya Jiisaswaajoŋ mamboŋgi eleema karo tuuŋa tuuŋa koma aisooŋ horoŋ mugi. 41 Qamakooli miriwaa qaa galeŋ moŋ qata Jairus iinoŋ kaŋ Jiisaswaa batanoŋ kemeŋ simiŋ kuma mirianoŋ kawaatiwaajoŋ qama kooliŋ muro. 42 Merauruta qaato, borata guaŋ motooŋgo gbania 12:waa so laligoŋ komumambaajoŋ ano. Jiisas koma horoŋ mugi keno ejembanoŋ leelee ologoŋ utama mugi. Kiaŋ.
Emba jiawonoŋ Jiisaswaa malekuya oosiriro.
43 Utama muŋ keŋgi kanoŋ batugianoŋ emba moŋ laligoro. Iinoŋ koiŋsa gbani 12 kawaa so iima ji kiro laligoro. Iinoŋ selegaleŋ yoŋoo tawagia moneŋ hinaya kuuya giliŋ laligoro selegaleŋ kuuyanoŋ meŋ qeaŋgowombaajoŋ amamaagi. 44 Emba kanoŋ Jiisaswaa gematanoŋ kema malekuyaa kiti susuya oosiriro iikanondeeŋ saya juguro.
45 Jiisasnoŋ qisiŋ jero, “Moronoŋ noosirija?” Kaeŋ jeroto, ejemba kuuyanoŋ ii qakooŋgi Piitonoŋ ijoro, “Somatana, ejemba tuuŋnoŋ ologoŋ utama aoŋ kaŋ goosiriju.”
46 Ijoro Jiisasnoŋ jero, “Qaago, moŋnoŋ noosiriro esuŋna moŋ keno mojeŋ.” 47 Kaeŋ jero embanoŋ “Kaniana mokolooja,” jeŋ jeneŋa ororo kaŋ Jiisaswaa batanoŋ simiŋ kuma jiaa kania ano oosiriŋ iikanondeeŋ qeaŋgoroti, iikawaa kania asuganoŋ jero ejemba tuuŋ kuuyanoŋ mogi. 48 Mogi Jiisasnoŋ kokaeŋ ijoro, “Borana, momalaariganoŋ mono meŋ qeaŋgoŋ gonja. Saanoŋ uubonjonoŋ kemba.” Kiaŋ.
Jiisasnoŋ Jairuswaa borata meŋ gbiliro.
49 Qaa kaeŋ ijoŋ nano qamakooli miriwaa qaa galeŋaa mirinoŋga moŋnoŋ weleŋ kaŋ Jairus ijoro, “Boraganoŋ komuja! Kawaajoŋ mono boiwaa qaganoŋ lombo toroqeŋ mende amba.”
50 Ijoroto, Jiisasnoŋ qaa ii moma qamakooli miriwaa qaa galeŋ kokaeŋ ijoro, “Toroko mende moba. Mono uumotooŋ ama nii moma laariŋ nona boraganoŋ qeaŋgowaa.”
51 Kaeŋ ijoŋ iwaa mirinoŋ kema ejemba tosaaŋa oŋomesaoŋ Piito, Jon, Jeims ano borawaa nemuŋmaŋa iigadeeŋ uŋuano iyaŋgiodeeŋ miri uutanoŋ ugi. 52 Ugi ejemba kuuyanoŋ jiŋgeŋ qama saama amburereŋ megito, Jiisasnoŋ jero, “Iinoŋ mende komujato, gaoŋga eja. Kawaajoŋ mono saa mesaowu.”
53 Kaeŋ jero jonoŋsisi kaaŋa kolooro “Mono komuja!” qaa ii moma jomoma mugi. 54 Jomoma mugito, bora ii borianoŋ meŋ qama ijoro, “Borana, mono waaba.” 55 Kaeŋ ijoro kokoosuyanoŋ eleeno iikanondeeŋ waama nano. Nano nene mugi newaatiwaajoŋ jero. 56 Nemuŋmaŋanoŋ ii iima waliŋgorito, Jiisasnoŋ iwoi kolooroti, iikawaa bujuya moŋ jegi mobubotiwaajoŋ soŋgo ama oŋono. Kiaŋ.