1 Mi fasannai Anutufa Yakooboona qimaminoo qinau. Anee doo findi finana Beeteera maqa maaqaki oonu maria. Anee aneenna afasaana Eesaunara rufiasee sandoonaqa ani afusaa kooroo iafanna Anutusa tatufirana suqaqimira qainda miqoo oonuree auqua.

2 Yakooboofa iriseenoo narí aiku asauku faqa narí faqa marusa faqa qimanniminoo qinau. Moo maqannaasa unnaqira anutusa uaqeeianauqa mara aquaqa. Mara aquseeqa inneeqa nifaaqa anukamasee amiqira qamunna afisuaqa. 3 Maasa maaqooqari quqasee Beeteera maqa maaqai oonureeqa qini ummaara aukuana dadaaqi mari Anutuna qinee aiqama atinai nunanoo qini faqa mari Anutuna tatufirana suqara qainda auquanauranoo. 4 Miqi qimasoofaqa misa aiqamausa iriseeqa nariqa moosaaqaraa unnaqira anutusa maraqa nuna faqa naaqooki quqee maru fidinaanuna faqa Yakooboona amufanoo umareenoo Seekeemma maqusaki arookasa aaqa maqa indufusee minaki akundanau. 5 Akundamaseenoo Yakooboofa faqa narí faiqi namu faqa doo quqasee fufanoo firaa rufiarafa mi saqanna maru maqusausaki maru fasiqausa rafaaqafufaqa sia nifaqasee nariqau.

6 Yakooboofa aiqama narí faiqi namu faqa fifiufanoo Rusa maqusa ki Kannaana maqa maaqaki oonuranau. Maqee mi maqusana auqu Beeteera fee qidaqa. 7 Mifa miqoo oonureenoo tatufirana suqara ooni qainda auquseenoo mi maqusanaki Anutufa uainaina afaafau reenoo Beeteera fee qinau. Yakooboofa ooqai narí afasaanara rufiasee sandeenoo miqoo aniroofanoo Anutufa miqoo mina afusaa kooroouqoo marunara auqureenoo Beeteera fee qinau.

8 Miqi qimasee miqoo marufanoo Reebeeka nammarina ainainira maanaaqa Deebooraa nammarifa kuqufufaqa arookasa ameemaanai suani afu ataaqee qaannai Beeteera maqusa dinni atinai akundaqau. Akundamasee mi maqusana auqureenoo ikiraqara saqari fee qiqau.

9 Yakooboofa Meesoopootamia maqa maaqaindari oonu randee ani marufanoo Anutufa kaifaa mina afunni kooroommafufanoo amiqira afaaqooqa qimamaqanau. 10 Miqimmaseenoo Anutufa qimaminau. Ani auqu Yakooboofa maridanoo, maqee maaqooqari oosana arasee Isaraeerafa marinnaranoo. Miqi qimaseenoo Anutufa mina auqureenoo Isaraeeranee qinau.

11 Miqi qimaseenoo Anutufa kafaa Yakooboona maaqi qimasee qimaminau. Qinee aiqama afeeka faqaa Anutusa maridaqa qimamidaqa. Anee moomoo faiqi faqaafa maria. Akaqa maqannaasa ani aiku asaukukiqari marifaranoo. Anee karaambaiqauqa ninaakufa marinnaranoo. 12 Qinee Abaraqaammana faqa Isakeena faqa nimiafanna maqa maaqana ani faqa ani aiku asauku kasooqaqee kambiqainausa faqa nimianaura. 13 Anutufa miqi qimaseenoo Yakooboona qimamiseenoo doo quqaseenoo finau.

14 Yakooboofa mi maqusana Anutufa qimamuqoo miqoo ooni marasee daaqoo auqaanifee qimaseenoo rakiqaseenoo uainna nammari qumareenoo mi oonina adia amaqaseenoo oorifa fadameena faqa adianau. 15 Miqimasee mi maqusana auqu Beeteera fee qinau.

16 Yakooboofa narí faiqi namu faqa Beeteera maqusa quqasee Eefarataa maqusai fuanee qimasee aanai fimarufanoo Raseera nammarina faiqi maqarafa arinau. Arufanoo firaaqoo uqanna aupuranau. 17 Raseera nammarina aidafirafa kaaqa mandaika uqanna ufanoo mina dadaaqi maru aanaaseefa qinau. Raseera sia rufiaa, moo akoonaiqi maqaananoo. 18 Maqaseenoo Raseera nammarifa doo kuqiraridanoo aanna taikee marufanoo mi faiqina auqureenoo Beenooni fee qinau. Mina akoofa auqu reenoo Beensaminna fee qinau.

19 Raseera nammarifa kuqufufaqa Eefarataa maqusai fimaru aannana afainni akundaqau. Maqee miqoo Eefarataa maqusara Beeteereeqeemma maqusa fee qidaqa. 20 Yakooboofa aaqoo auqaanifeera ooni miqoo rakiqanau. Maqee kaqi mi oonifa Raseera nammarina madika mariuqoo maridanoo mi madikanara koorooidanoo.

21 Miqooqari Isaraeerafa findifinoo moo maqa maaqai Eedeera kisaaqa ooni maaqa usakaqoona dinni atinni narí uiqaana maaqa usakanau.

22 Isaraeerafa mi maqa maaqanaki marufanoo Reeubeennafa narí akoona anaaqa Biriqaa nammarina narí ainainira maanaaqa maraqoona sakasee faiqanau. Isaraeerafa mi ufana irufanoo arana qanau.

Isaraeerana faiqi namu qisauku qara taikasee qikunni ooqu qaara marasee 12 mariqau. 23 Reeaa nammarina faiqi namu maaqimmiqa mariqau. Reeubeennafa indaaruqaafa Yakooboona ooqa faiqi marinau. Mina aanaaqianaafa Simeeoonafa faqa Reefifa faqa Yudafa faqa Isakaarafa faqa Seeburunafa faqa mariqau. 24 Raseera nammarina faiqi namu Yooseefaasa Beensaminnasa mariqau. 25 Raseera nammarina ainainira maanaaqa Biriqaa nammarina faiqi namu Dannaafa faqa Napatarifa faqa mariqau. 26 Reeaa nammarina ainainira maanaaqa Siripaa nammarina faiqí namu Kadafa faqa Aseerafa faqa mariqau. Mi faiqi namusa aiqama Meesoopotamia maqa maaqai kambiqaqau.

27 Yakooboofa narí akoofa Isakeefa unnai finau, Mamareena maqusaki Qeebooroona maqusa aaqa Abaraqaammafa faqa Isakeefa faqa mariuqoo finau. 28 Isakeefa 180 aukuana maranau. 29 Maraseenoo kuqufufaqa mina faiqi qara Eesausa Yakooboosa akundaqau.