1 Abaraqaammafa anaasee moo maranau. Mina auqu Keeturaa nammarifa marinau. 2 Minasaa faiqi moomoo maqanau. Faiqi moo indaaruqaana auqu Simaramafa marinau mina aanaaqianaafa Yookasanafa marinau mina aanaaqianaafa Meedanafa marinau mina aanaaqianaafa Midianaafa marinau. Mina aanaaqianaafa Isabakafa marinau ninaaqianaafa uqanna Suaafa marinau. 3 Indaaruqaana aanaaqianaafa Yookasanafa mifa Seebabana faqa Deedana faqa nikoofa marinau. Deedana aiku asuku Asuraa maqannaasa faqa Reetusimma maqannaasa faqa Reeummimma maqannaasa faqa mariqau. 4 Midiana amaaku indaaruqaa faiqi Eefaafa marinau, mina aanaaqianaafa Eefeerafa marinau, misa ninaaqianaafa Qannookafa marinau misa ninaaqianaafa Abidafa marinau, misa ninaaqianaafa uqanna Eeradaafa marinau. Minamusa Abaraqaammana anaaqa Keeturaa nammarina saaqari kambiqarausa mariqau.

5 Abaraqaammafa narí aiqama ainaina Isakeena kai aminau. 6 Amiseenoo narí kaqi maridanoo moo anaasee faiqi namu faqa amiqira ainaina oosana oosana Abaraqaammafa kaqi nimiseenoo Isakeefa maruqooqari suani oosana qaannai maqa maaqai nianai niiqoofaqa mitinai oonu mariqau.

7-8 Abaraqaammafa asooqaqeenoo kuqinau. 175 aukuana marasee kuqinau. 9 Kuqufufaqa mina amaaku qara Isakeesa Isamaeerasa miqanda nári nikoona iri mara maree Makapeeraa maqa maaqaki Mamaree maqusa suani oosana qaannai ooni aamaraki akundaqau. Mi maqana Eefaroona Sooqarana amaaku Heetana aiku asaukundi feefaurummaqoonaki Abaraqaammana akundaqau. 10 Abaraqaammafa kaqi maridanoo Qeetana aiku asauku feefauru maqoonakina Saraqa nammarina faqa Abaraqaammana faqa nikundaqau. 11 Abaraqaammafa kuqufufanoo mina amaaku Isakeena Anutufa amiqi amiqi imarinau. Isakeefa kaqi marira nammari dikaanda qini qiqafaidanoo fee qimaru nammari dikaandana aaqa marinau.

12 Qakaara nammarifa Saraqa nammarina ainainira maanaaqa Isipa maqannaa maanaaqa marufa mifa Abaraqaammana amaaku Isamaeerana maqoofa marinau.

13-15 Isamaeerana faiqi namu maaqimmiqa mariqau. Indaaruqaafa Neebaiootafa marinau, mina aanaaqianaafa Keedarafa marinau, misa ninaaqianaafa Adabeerafa marinau, misa ninaaqianaafa Mibasamafa marinau, misa ninaaqianaafa Misammafa marinau, misa ninaaqianaafa Dummaafa marinau, misa ninaaqianaafa Masafa marinau, misa ninaaqianaafa Qadadafa marinau, misa ninaaqianaafa Teemafa marinau, misa ninaaqianaafa Yeeturafa marinau, misa ninaaqianaafa Nafisafa marinau, misa ninaaqianaafa uqanna Keedeemaafa marinau. 16 Misa qisaukuqara taikasee qikunnooqu qaara marasee maqannaasa nikausaikiqa mariqau. Miqiqa maridaqa nariqa nuqu nariqa maqusa faqa nariqa uiqaana maqusa faqa qafaafauree mariqau. 17 Isamaeerafa 137 aukuana maraseenoo kuqinau. 18 Isamaeerana aiku asauku Isipa maqusaindari suani oosana qaannai Sura maqa maaqa faqa, Qafiraa maqa maaqa faqa qambaana Asiria maqa maaqai fimaruqoo mariqau. Misa Abaraqaamana aiku asauku akaqausa maruqooqari naaduma mariqau.

19 Moo ufa Abaraqaammana amaaku Isakeena ufa maridanoo.

20 Isakeefa qaara fasiqa niku nisauku taikasee 40 aukuana maraseenoo Beetueerana araamuna Reebeeka nammarina maranau. Rabannana asookina maranau. Beetueerafa Arameeannaindaraafa Meesoopootamia maqa maaqaki ani marinau.

21 Reebeeka nammarifa sia faiqi maqanau aafanaasee marinau. Isakeefa minara iriseenoo Yaaweenara innaaru qimarinau. Yaaweefa mina ufa iriseenoo dadaaqufanoo Reebeeka nammarifa amuaqu qaikinau. 22 Amuaqu qaikufanoo faiqi qaara qanda mina aranandaki maridaqa raki mariqau. Raki marufanoo Reebeeka nammarifa qinau, maa ainainafa nanaree qiniki kambiqaidanoo fee qimaseenoo karaambaiqunnai oonuree anoonufa qimamianifeera innaaru qinau. 23 Innaaru qufanoo Yaaweefa qimaminoo qinau.

24 Reebeeka nammarina faiqi maqarafa aniroofanoo qaara qanda maqanau. 25 Indaaruqaana afaaqa kaaqa taatuqee arinoo marinau, mina afaaqasasa asausi aanaaqi marinau. Mina auqu Eesau nee qiqau. (Mina auqu oosana asausi fee qiqau). 26 Inaaqianaafa indaaruqaana aiku ataa rakisisimma uqirafa quminau. Minara mina auqu Yakooboo nee qiqau. (Mina auqu oosana aiku ataa fee qiqau.) Isakeefa qaaramoo fasiqa niku nisauku taikaseenoo 60 aukuana maraseenoo miqanda maqanau.

27 Miqanda innooqafufaqa Eesaufa uaqarana akoofasa maridanoo sia ooqu marufa kaqi niranara aidimarufa marinau. Miqi marufanoo Yakooboofa sia miqi marinau. Fifirafa maridanoo maqusasaa marufa marinau. 28 Isakeefa Eesaunara aidi marinau. Mifa aandau arusoofanoo nee marunara minara aidi marinau. Reebeeka nammarifa Yakooboonara rimarinau. 29 Moo kari Yakooboofa narana suqasee auqee marufanoo mina afasaafa nandaki niniiufa aararoofanoo anireenoo qinau.

30 Anee taatuqee narana auqee mariannana doo mina mara qiminaqa naa daarandee marifaqee qinau. Miqi qimasoofaqa misa minara iriseeqa Eesaunara Eedoomee qimariqau. Mi auquna oosana taatuqee fee qimariqau.

31 Yakooboofa iriseenoo qinau, aninidiri qikoofa anee indaaruqaa faiqi mariananoo ani afaaqooqa qima amaqee marina qiminaqa narana ani amianauranoo.

32 Eesaufa qinau. Saa qinee daararai faqa kuqua qaammidaqa qini mi ainainausa sia qini dadaaqifaranoo.

33 Yakooboofa iriseenoo qinau, aneenna ufa qima afeekaika mandee qiminaqa qinee narana ani amianaura. Qimasoofanoo Eesaufa Yakooboonara qima afeekaika mandee indaaru mina akoofa qutaaqama amaqoo ainainna amiraree qinau.

34 Miqi qima afeekaika masoofanoo Yakooboofa quanda fufanoo feemu faqa nara ainaina faqa nammari faqa Eesauna amufanoo namasee doo finau. Miqi maseenoo Eesaufa narí indaaruqaa faiqi marunara akooqoofanoo narí akaqa amisee quqasee finau.