1 Doo Abaraqaammafa kaaqa nauraiqi marinau. Karaambaiqa Abaraqaammafa aiqama auqoo ainainna amiqi amiqimma amaqee marinau. 2 Abaraqaammafa nári oosana maraseenoo nári ainainiranasaa kisaaqasaa rakisi maruna aaramaseenoo qimaminoo qinau. Anee aneenna asauku qifundana ameemaanai aususee afeekaika masee qima afeekaikia. 3 Qinee aniara Karaambaiqa innaaruna faqa maqa faqa auqu Anutuna auqusaa qima afeekaikamasee sia qini qimaaku Kannaana maqannaa anaasee mara amiannee qidaqa. 4 Anee qinee kambiqaafanna maqusanai oonuree qini atikinaa maanaaqa mara maree Isakeena muqu amia.

5 Miqi qimasoofanoo mi rakisirafa maaqi qinau. Doo amana, ooru raanaqa mindaraa maanaaqa iraifanoo narí maqa maaqa minnisee mai qumirara ititinaqa amanee qinee ani amaaku aiqaananoo anee qumunna maqa maaqanai ooru fuannoo fee.

6 Miqi qufanoo Abaraqaammafa qinau. Oo sia uqanna anee qini qimaaku aiqainanoo minni oorufuani. 7 Yaaweefa innaarunaindaraa Anutufa qeeqa qikoona maqusaindaraana faqa qeeqa ainaina maqasaaqaraana faqa mara mareenoo maa maqa maaqanasaa quqaqoosa maridaqa. Mifa qima afeekaikammasee qini faqa qini qiku qisauku faqa maa maqa maaqana nimianauree qinau. Mifa narí angiroo aiqainanoo ani afunni finana ooru qini qimaaku anaaqa afiqee qumi naranoo. 8 Mindaraa maanaaqa fannoo sia mai qumiraree qinana miqoo kai qima afeekaika maqaanna ufanakiqari idukuananoo. Qini qimaaku sia minni afiqee ooru fua. 9 Miqi qimasoofanoo mi ainainira fasiqafa narí asauku Abaraqaammana narí uriqararana afundana ameemaanai quqaseenoo qinau, doo qinee anee qianandee ianaura.

10 Miqi qimaseenoo raudama kinoo Abaraqaammana kammeera, qoosa fooqaana, mina qisauku qara maraseenoo narí uriqararana ainaina amiqirana kai maraseenoo kammeerasaa quqaseenoo mareenoo finau. Abaraqaammana akaqa Naqoorafa Mesopotamia maqusai suani dinni ataaqeenni marunnai ooru finau. 11 Aanai faiqanoo fifiiu fanoo eenee marufanoo aanaaseeuqa nammari sakee maruqoo oonu ranau. Oonuree qafoofanoo maqusa adeedi nammari sakee maruqoo oonu reenoo miqoo narí kammeerauqa quqasoofaqa mariqau.

12 Narí kammeerauqa quqaseenoo mi fasiqafa Yaaweenara innaaru qinoo qinau. Oo Anutu qini uriqararana Abaraqaammana Anutufa anee qini faqa maridana maqee qini dadaaqia. Anee qini uriqararana Abaraqaammana faqa qima afeekaika maqoonafa maqee anoonaikiani. 13 Qinee nammari sakee mariana aaqa adeedi marunaqa, aanaaseeuqa nammari ani sakee mariafaqa maridaqa. 14 Moo maanaaqa anirainaqa qinee maaqi qimasee qimamianaura. Amanee aneenna taquki nammari saka qiminaqa naanauree. Mifa qiniara namasainaqa ani kammeerauqa faqa nimianauree qinnanara minara aneenna ainainira faiqi Isakeena utaaqama amaqaqaanafee qianaura. Mi ainainafa kambiqainaqa anee qini uriqararanasaa qima afeekaikunna ufanara irianaura.

15 Mifa miqi qimasee innaaru qimarufanoo moo maanaaqa Reebeeka nammarifa nammari taqu akumaaqa aku maree aniranau. Mifa Abaraqaammana akaqa Naqoorana faqa mina anaaqa Mirikaa nammarina faqa faiqi Betueerana araamuna marinau. 16 Mina oori afiri amiqi amiqi irafa sia auqu marufa aniroofanoo qafoofanoo ooqu nammari saka maree urinau.

17 Ururoofanoo Abaraqaammana ainainasaa rakisira fasiqa fannoo mi funnai sandee oonureenoo maaqi qimasee qimaminau. Amanee aneenna taqukinaa nammari kaqikaana qini qiminaqee naanauree.

18 Miqi qufanoo mi manaaqafa qinau, eeoo faiqí firaafa, doo naa qimaseenoo nammari taqu afiqu quqasoofanoo doo nanau.

19 Namasoofanoo mi manaaqafa narí kai qinau. Qinee nammari moo faqa sakasee ani kammeerauqa nimii saanaqa nama saifanoo nimuaqu iannoo. 20 Miqi qimaseenoo narí nammari taqu kai kaqi difaaniki adiaseenoo sandeenoo ooqu moo faqa saka mareenoo muru adia soofaqa kammeerauqa naqau. 21 Kammeerauqa nammari nimi marufanoo Abaraqaammana ainainira fasiqa fannoo ireeda kai kasooinoo maridanoo qafaidanoo maaqi qimirinau. Doo fee Yaaweefa qinee kisaaqasaa anunnanara anoonai kidanoo fee.

22 Kammeerauqa nammari neeneesee nimuaqummasee marufanoo Abaraqaammana ainainira fasiqa fannoo koorannai auqira qimmusa mi manaaqana aikiki qusamaqaseenoo kafa koorannai auqira isaaqama qaaraqanda asaukuki usamaqaseenoo iramirinoo qinau. 23 Anee yana araamunee maridanee amanee qini qimaqimia. Amanee maasa namu aneenna akoona maaqa kina nifiqee finaqee faiqaanauree.

24 Reebeeka nammarifa mina iriseenoo narí qimaminoo qinau. Qini qikoofa Beetueerafa Naqoorana faqa Mirikaa nammarina faqa faiqi maridanoo. 25 Maasa maaqa narana amana maridanoo ani faqa aniasa faqa ani kammeerauqa faqa narana maaqa faqa nimifaranoo.

26 Miqi qimasoofanoo Abaraqaammana ainainira fasiqa iriseenoo maqasaa oorindari mapamu finoo Karaambaiqa narí uriqararana Abaraqaammana Anutuna amooqidanoo maaqi qinau. 27 Oo Anutu Abaraqaammana Anutufa, anee amiqi amiqi uqanna miananoo. Anee Abaraqaammana amiqi amiqi imariannanara sia taikeenoo kaqi fidanoo. Karaambaiqa fannoo qini uriqararana atiuqa iannai andeeqasee qifiqee aninoo.

28 Miqi qimasee innaaru qimasoofanoo Reebeeka nammarifa sandeenoo narí anoona maaqai oonureenoo aiqama mi ufausa qimaminau. 29-30 Reebeeka nammarina afasaafa Rabanafa Reebeeka nammarina ufa iriseenoo koorannai auqira qimmusa qusamaqoona faqa koorannai auqira isaaqama qusamaqoona faqa qafamaseenoo raudamaku fanoo ooqureenoo nammari sakee maru madikana afainni qafoofanoo Abaraqaammana ainainira fasiqa miqoo nammari afainni narí kammeerauqa naaqa kikiqinoo marinau. 31 Marufanoo qafamaseenoo qimaminoo qinau. Qini faqa aninaqa maaqai fua. Karaambaiqa fannoo ani amiqi amiqimma amaqee marifa mariananoo. Nanaree anee maaqoo maridanee. Qinee ani faiqara maaqa doo deedaqammasee ani kammeerauqa marirana faqa deedaqiqa.

32 Abaraqaammana ainainira fasiqa fannoo mina iriseenoo narí faqa marusa faqa narí kammeerauqa faqa nifiqeenoo doo maaqai finau. Maaqai oonu roofanoo Rabanafa kammeera saaqaraa qumaara mara maqasaa quqaseenoo narana nammari nimiseenoo Abaraqaammana faiqi namu nammari nimufaqa niku nammari uqiqau. 33 Niku nammari uqu soofanoo Rabanafa narana niminau. Nimufanoo Abaraqaammana ainainira fasiqa fannoo qaoo qimasee qinau. Sia qinee kaqi naanaura. Qinee qiraree qunna ufana qima nimiseeqa miqoo naanaura. Rabanafa minara iriseenoo qinau. Doo qinaqa maasa iria.

34 Miqi qimasoofanoo Abaraqaammana ainainira fasiqa qima niminoo qinau. Qinee Abaraqaammana ainainira fasiqa maridaqa. 35 Karaambaiqa firaaqoo qini uriqararana amiqi amiqimma amaqaseenoo ainaina faqaafaikamma amaqeenoo. Karaambaiqa sipsipauqa faqa burimakauqa faqa siruaa faqa koora faqa ainainira fasiqauqa faqa maanaaqauqa faqa kammeerauqa faqa doonkiuqa faqa moomoo aminoo. 36 Qini uriqararana anaaqa Saraqa nammarifa asooqasaa faiqi akoonaiqi maqasoofanoo qini uriqararafa narí aiqama ainaina mina kai aminoo. 37 Qini uriqararafa qifaqa qinee afeeka ufannai qima afeekaikammaseeqa mina aamuaqira ufa qaindusuanauree qiafananoo qinau. Anee maqoo qaraasa Kannaana maqannaa kinaa anaasee sia uqanna mareeqee qini qimaaku amia. 38 Anee ooru qini qikoona maqannaasaki qini atikinaa maanaaqa mara maree muqusee qini faiqi amia.

39 Qinee mi ufana iriseeqa narí maaqi qimaseeqa qimamiqa. Mi manaaqafa sia qini faqa quminaqa naqaa fee ianauree.

40 Qunanoo mifa qinoo, qinee Karaambaiqa ufa aiqama kari afaqee marunausa maridaqa, mifa narí angiroo aiqainanoo ani faqa fidanoo dadaaqinanoo anoona kambiqaannoo. Anee qini faiqi anaaqa qini maqannaasakinaana qini qikoona atikinaana mareennaranoo. 41 Moodaa aana kai anee idukinna aanafa maridanoo. Ooru rainaqa misa maanaaqa moo sia qimifanoo ani qima afeekaikirafa taikainana idukira fasiqaikinnaranoo.

42 Qinee Abaraqaammana mi ufana iriseeqa nammari dikaanda mariqoo ururee maaqi qimasee innaaru qiqa. Oo Karaambaiqa qini uriqararana Abaraqaammana Anutufa mariananoo, qinee auqaunna ainainna anoona kambiqaani. 43 Qinee nammari dikaanda mariqoo marianaura. Mariananoo maanaaqa moo fannoo nammari sakarara anirainaqa qinee nammariara innaaru qianaura. 44 Mifa eedoo qimaseenoo qini faqa qini kammeerauqa faqa nammari niminanoo mifa anee qini uriqararana amaaku utaaqama amaqaqaanafa mariannoo. 45 Qinee qireeda kai innaaru qimarunanoo Reebeeka nammarifa maqusaindari nammari taqu akumaaqa akumareenoo aiqareenoo nammari sakararee qimasee fifaqa qinee maaqi qimasee qimamiqa. Amanee anee nammari qimina naanauree. 46 Miqi qunanoo mifa kai kaqi narí nammari taqu akumaaqa qaraana afaimma quqaseenoo qinoo. Namasainaqa ani kammeerauqa faqa nimianaura. Miqi qifaqa qinee namasaunanoo mifa kammeerauqa faqa nimifaqa neea. 47 Namaseeqa qinee maaqi qimasee iramiriqa ani akoofa yafee, qunanoo mifa qimaqiminoo qinoo. Qini qikoofa Beetueerafa Naqoorasa Mirikaa nammarisa faiqi maridanoo. Qinee mi ufana iriseeqa koorannai auqira qimmusa usuamaqaseeqa kafa koora isaaqama asaukuki usuamaqeeqa. 48 Usuamaqaseeqa doorindari maqasaa kummarama fifaqa qeeqa uriqarana Abaraqaammana karaambaiqa Anutuna amooqiqa. Mifa qini qifiqamareenoo andeeqasee qini uriqararana atiuqa iannai murusaifaqa qinee misa niraamuna qeeqa uriqararana amaaku anaaqa marianinnana paquriqa. 49 Doo maqee uqanna Rabanna anee qima qiminaqa iria. Anee qini uriqararana andeeqa amaqararee qinana qima qimia. Anee sia andeeqa amaqararee qinana minara faqa qima qiminaqa qinee qeeqa ianna ainainara oonu mafi irianaura. 50 Rabanafa faqa mina akoofa Beetueerafa faqa narí qimamiqa qiqau. Maa ufafa Karaambaiqinaindari ani marifaqa maasa naqifee masee minara ufa qinauree. 51 Maa Reebeeka nammarifa marinoo. Afiqamaree fua. Munusainanoo mifa ani uriqararana amaaku aanaaqaikinoo, Karaambaiqa narí qindee iani.

52 Abaraqaammana ainainira fasiqa mi ufana iriseenoo oorindari maqasaa aqufinoo Karaambaiqa amooqimamaqanau. 53 Amooqimaseenoo findifinoo qamunna faqa siruaa faqa koora faqa firaa feefauru aqimaru oonisa Reebeeka nammarina aminau. Mifa firaa munnimma aqimaru ainainausa mina afasaana faqa mina anoona faqa niminau. 54 Nimi seenoo narí faqa anusa saimbaqa narana faqa nammari faqa neenee seeqa faiqaqau. Faiqee iaqoofanoo kananaana Abaraqaammana ainainira fasiqa Reebeeka nammarina afasaana faqa anoona faqa qima niminau. Amanee qinee maqee qeeqa firaa finnai fuanauree. 55 Miqi qufaqa miqanda qiqau, saina Reebeeka nammarifa maasa faqa moodaa amaanaki fee, qisauku qara taikaseenoo afuru fee faiqeenoo fuani.

56 Miqi qufanoo Abaraqaammana ainainira fasiqa fannoo qinau. Doo sia maasa rafaaqa fua. Doo qinee maqee fidaqa. Karaambaiqa fannoo qinee kisaaqasaa anunna saikana anoona doo kambiqasaifaqa qafamaseeqa sainaqa qeeqa uriqarara finnai fua. 57 Miqanda minara iriseeqa qimamiqa qiqau. Saina Reebeeka nammarina aaramasee qifanoo naqaa fee qiannoofee. 58 Miqi qimaseeqa Reebeeka nammarina aaramaseeqa iramiriqa qiqau. Anee maa fasiqana faqa maqee fee finnaree. Miqi qufanoo doo maqee fuanauree qinau.

59 Misa mi ufana iriseeqa Reebeeka nammarifa faqa minasaa rakisi maru anaaseefa faqa Abaraqaammana ainainira fasiqa faqa mina faqa anusa faqa doo niqiqoofaqa fiqau. 60 Reebeeka nammarifa firarufaqa maa ufanannoo mina afaaqooqa qiqau. Oo maasa qisooki anikiqari aruakinausa moomoo uqanna firaaqoo uqanna kambiqeefara ani aiku asauku marinausa namuqaa nárí nifaqaaqa mandaida misa maqa maaqa namu faqa misa ainaina faqa maree marifaranoo.

61 Miqi qimasee afaaqooqa qimasoofanoo Reebeeka nammarifa faqa ainainira maanaaqauqa faqa kammeerasaa akaree fufaqa Abaraqaammana ainainira fasiqa namu faqa fiqau.

62 Isakeefa Neekeefa maqa maaqakiqari aadana maqa maaqai nammari dikaanda maruqoo ooqu marinau. Mi nammari dikaandana auqu kaqi marirafa qini qiqafaidanoo fee qimariqau. Mifa Kannaana maqa maaqa qaannai suani afu dinni ataaqeenni marinau. 63 Miqoo maridanoo Isakeefa moo eenoonnai aatata nidanoo uqeera fufanoo mirinni qafoofanoo kammeerauqa qumiqau. 64 Reebeeka nammarifa kammeera saaqari uqeera finoo Isakeena qafanau. Reebeeka nammarifa qafamaseenoo narí kammeera saaqari maqasaa aqufinau. 65 Aqufufanoo Abaraqaammana ainainira faiqi iramirinau. Ya fasiqa fee maasa unannai anidanoo fee. Miqi qufanoo Abaraqaammana ainainira fasiqa qinau. Qini uriqararafa anidanoommi qufanoo Reebeeka nammarifa nári oosana mareenoo qamunna mafi oorisaa ititanau.

66 Isakeefa uru paqurimmasoofanoo Abaraqaammana ainainira fasiqa fannoo aiqama ainaina auqoonara Isakeena qimaminau. 67 Qimamisoofanoo Isakeefa Reebeeka nammarina mareeqeenoo narí maaqaki Saraqa nammarifa mariunaki quqasoofanoo mina aanaaqai kinoo marufanoo Isakeefa Rebeeka nammarinara aidi marufanoo mi aidirafa Isakeefa narí anoofa kuqunara amuqusiufa doo asooanau.