2
Ibolow Ki Makmak Kemin em Weng te.
1 Nakunum kumel kunum waneng yutaka! Nukalem Kamok Fian wiin fian so kunum Yesus Kulais elo fein dangbiliw kawtiw yu kanelom mali kunum waneng ilo diweko, atin kuw mali ilo ibolow mutuk so dukayembomi, mali ilo ibolow keyeminba kemokoliw te!* Kalan Kunum 10:34; Sekow 2:9 2-3 Emso kunum mak ilim ken ati minggisomi, kait kesom, yom wensankabiliw am matem tele tewe, yu elo wangweng kelomi, ibolow keleweko, “Ku abin ken kalak teleko, teina o!”, dangbiliw te. Dangbomeliwi, baluw kunum mak akati sak ilim tulum ninik nam so minggiko, tele tewe, yu elo bokolewomeliw: “Ku sak ka kel mola! Beni, nem yan afak ka kel teina!”, dangakabiliw te. 4 Yom kanekabiliw be kilele kaleyemomele: Yu yukalem mutuk dim kel mali kawtiw ilo ibolow mutuk fian duyemsomi, mali ilo ibolow mutuk fian duyeminba kesomi, yukalem fukunin wa geleweko, mali kawtiw biilo sak diwyemkabiliw te.
5 Nakunum kumel kunum waneng yu nem weng kale kilele kililina! Sunbin-Got e kawin dim kaleem sak em banim kebiliw kawtiw ilo galmoko, fein ibolow fian keyemkabe te. Feinka! Mali “Ibolow mutuk fian dunemkabiliw kunum waneng yu nem gawman dim em kasel kelokoliw te!”, yangse baluw kawtiw bite kuw akalem gawman dim elo fein uneko, diwkuw ka kel bokoliw te.* 1 Kolin 1:26-28 6 Kate, yu mali wiin banim kawtiw biilo sak inkal duyemkabiliw te. Kame yu kilele ibolow fukunemoliwka! Kante yulo de mit da koyemkabe a? Kante yulo diwyemin kunum im kiin dim kel mo koyemsomi, geyemkabe a? Kanekabiliw kukuw be on kisol so kunum ite kuw kanekabiliw te. 7 Kate yu kilele kililina! Kanekabiliw kawtiw bite Sunbin-Min Yesus Kulais em wiin atite yulo amkoko, galmose wiin be de mit da kolewkabiliw te.
8 Nakunum kumel kunum waneng yutaka! Yu Kamok Fian Sunbin-Got em fut tem kel nulo duyemse weng ayem kitil nam bokolomele:
“Yukalem ibolow mutuk fian e yukalem dim biyembe beemdiw yom mewso biliw kawtiw mali ilo akati ibolow mutuk fian kukuyem kemoliwka!”,
angeko, gelewiw tewe, yu ken kukuw kuw gelewbiliw bakate.* Kunum Ayem 19:18; Matyu 19:19; Galesia 5:14 9 Kate, yu atin kuw mali ilo ibolow mutuk so dukayembomi, mali ilo ibolow keyeminba kemiw tewe, yu sen so keko, sili sili nam kawtiw kebomi, kukuyemin sawa weng beelo sakalaw keko, weng bo bo kelewsomi, elo de mit dakamin kawtiw kebiliw te.* Sawa Weng 1:17 10 Yu kilele ibolow fukunina! Nimin kawtiw ite mak alik kukuyemin sawa weng be gelewbomi, gel makmak bakilewiw tewe, fong gel beem sen e fian kukuyemin sawa weng alik alik dawkatikoko, de mit dakabiliw te.* Matyu 5:19 11 Nimtew angom? Sunbin-Got e bokolomele:
“Yu kanelom osow kemokoliw te!”
“Yu kanelom mali ilo yeniwi, kuan kemokoliw te!”,
angse kasike, mali yu kiliko, em weng geleweko, osow kelinba kebiliw kate, yu mali ilo yeniwi, kuaniw tewe, yukati kukuyemin sawa weng beelo sakalaw keko, weng bo bo kelewbiliw kawtiw yute te.* Aneng Kolew 20:13-14; Ulom 13:9
12 Kaneko kasike, Yesus Kulais e yom sili sili nam em yulo net keyemse sok silel koyemeko, yulo akalem kukuyemin sawa weng kikis em afak da koyemse te. Kasike kame, yu kukuyemin sawa weng kikis beem afak kuw kakabiliw kunum waneng kebomi, weng atite kuw bakabom, kukuw ken ati kuw gelewemoliwka!* Sion 13:34; Galesia 6:2; Sekow 1:25; 1 Fita 2:16 13 Kaneko kasike, yu ibolow fukunemoliwka! Deiw mak ding dim bakate, Sunbin-Got e kawtiw alik alik diwyemoke te. E mali kinkin kukuw kemaliw kawtiw so, mali kinkin keyeminba kemaliw kawtiw iso, alik alik makuw bongguko, im kanemaliw kukuw bakate diwyemeko, geleweko, bikalem kinkin kukuyemkabiliw kukuw gelewko, im kanekabiliw beem yan be fein duyemoke te.* Matyu 5:7; 18:32-35
Dem so Banim Fein Ibolow e Soson Nam te.
14 Nakunum kumel kunum waneng yutaka! Mali mak yu bokolomeliw: “Nu Kulais elo ‘Fein!’, dangeko, gelewkabuluw kunum waneng nute kai!”, angbiliw kate, yu ken kukuw gelewinba keliw tewe, yom fein ibolow akal sak dem banim kuw keko, yulo dokoyeminba kekabe te. 15 Keko beli, mali fein ibolow so kunum waneng kate, imikel sak kal fitew kebomeliwi, wanin banim kebiliw tewe,* 1 Sion 3:17 16 mesesem emso yusik sak weng kuw bokoyemomeliw: “Nakunum kumel yu ken biliw yako! Kal kasilina! Wanin wanbina! Ken abin kulina!”, yangbiliw kate, yu ilo kinkin keyemeko, kal dim em ki ke dakayembin eisneng be yemeninba keliw tewe, yom fein ibolow be sak dem banim kuw keko, mali yukalem ilo dokoyeminba kekabe te. 17 Keko kasike, fein ibolow akati emikel kuw keko, dem banim kele tewe, e kuankabe te.
18 Kate, mali kawtiw mak dasuw weng beem kokmen atew keko, bokolomeliw: “Mali kunum waneng numdiw fein ibolow so kebiliw kai! Kate, mali kawtiw mak i ken kukuw kuw kekabiliw te!”, angakabiliw kate, ne yulo weng mak bokoyemomeli: “Yom fein ibolow dem banim so be nelo kalenemiw tewe, nesik yulo nem ken kukuw kaleyemii, yu nem kaneyembi beem mongom e nakalem fein ibolow bakati kilele atemokoliw te.”, yangakabi te.* Galesia 5:6 19 Feinka! Yu ken keko, bokolomeliw: “Sunbin-Got e makmak ete kuw te!”, angbiliw kate, sawkal aneng matil ikati yom angakabiliw emdiw angeko, bomi, walwal yebom, biliw te. 20 Ibolow benemin kawtiw yutaka! Nesik yom ibolow dolon keyemii, yu kiliko, kilele kal keliwete: Fein ibolow emikel kuw keko, dem banim kele tewe, atin kuw soson eisneng kekabe te. 21 Yu kililina! Sua sua kel ding dim bakate, num awalik Abalakam e akalem min Aisak elo aik ayem dim anko, Sunbin-Got elo dulewomin kese ding dim kabalak e, Sunbin-Got e em kanese kukuw be atemeko, “Ku kiol kuw kunum kute te!”, dangse kale.* Talfut Kese 22:9-12 22 Kame yu em kanese kukuw be kilele atemsomeliwi, kal kemoliwka! Em fein ibolow so, em kanese kukuw beso, amkoko, bonggu makmak keko, dokolewse kale. Kasike, akalem kanese kukuw be em fein ibolow beelo ki keleweko, fulkilas kelewese kale.* Kibulu 11:17-18 23 Kanese beem mongom ete Sunbin-Got em fut ayem tem em weng bose weng be ki kelewese te. E bokolomele:
“Abalakam e Sunbin-Got elo ‘Fein!’, dangse kasike, beem mongom ete esik bokolomele: ‘E kiol kunum te!’, angse te.”,
angei, mali kawtiw i Abalakam em dulum elote bokolomeliw: “Abalakam e Sunbin-Got em ibolow so awkunum ete te!”, dangsiliw kale.* Talfut Kese 15:6; 2 Kamok im Sang 20:7; Aisaya 41:8 24 Kane dangse kasike, yu kilele atemiwete: Sunbin-Got e nukalem fein ibolow ete kuw ateminbakabe kate, nukalem fein ibolow so, bakalem dim gilakabe dem ken beso, alew makuw bongguko, beem dulum elote “Yu kiol kuw kunum waneng yute te!”, yangakabe te. 25 Iti beemdiw sua sua kel, Yosua em bise ding kabalak e, deiwkim waneng Elakaw u kiinkiin kunum alew mak ilo kukuw ken kuw kukuyemsomelui, u aso ilo okiwda koyemeko, nanew deiw yemdasu kale. Sunbin-Got e um kanelu kukuw bete atemeko, um dulum elote “Kiol kuw waneng ute te!”, angse kale.* Sosua 2:1-21; Kibulu 11:31 26 Kasike yu kiskiw weng kale kilele ibolow fukunemoliwka! Mak kunum mak em finik e kal dim be kolewe tewe, e fom keko, kuanaka. Beemdiw, ken kukuw e fein ibolow kolewe tewe, fein ibolow akal fom keko, kuanin tew kekabe te.
*2:1: Kalan Kunum 10:34; Sekow 2:9
*2:8: Kunum Ayem 19:18; Matyu 19:19; Galesia 5:14
*2:9: Sawa Weng 1:17
*2:11: Aneng Kolew 20:13-14; Ulom 13:9
*2:12: Sion 13:34; Galesia 6:2; Sekow 1:25; 1 Fita 2:16
*2:23: Talfut Kese 15:6; 2 Kamok im Sang 20:7; Aisaya 41:8
*2:25: Sosua 2:1-21; Kibulu 11:31