148
Kuesẽkõ seahmatone emero porehme!
1 “Kure mase, Ritonõpo,” sykatone!
Kuesẽkõ eahmatoko, kapuaõkomo emero,
eahmatoko moroto kae kapu ao!
2 Ritonõpo eahmatoko, emero inenyohtyamo,
ipoetory tõ etonaketõ emero kapu ao!
3 Eahmatoko, xixi te, nuno maro;
Eahmatoko xirikuato tomo, zemimãkomo!
4 Eahmatoko, kapu tomo kaehxo exiketomo, tuna tõ roropa kapu epoehme aexityamo!
5 Ah Kuesẽkõ eahmã toto, eya tyripose toto,
mame tyrise toh rahkene!
6 Eya tyripose toto, jũme tosao xine toto ehtohme;
aomihpyry omipona jũme exikehpyra toto ehtohme.
7 Kuesẽkõ eahmatoko, sero nono põkomo emero:
onokyroimo tomo tuna konõto kuaõkomo,
zue tõ emero tuna konõto kuaõkomo.
8 Kuesẽkõ eahmatoko, nenenehkane konopoimo topuxikiri sã exikety te, kuenimã topuru akurũ kehko, tyryrykane jamihmã tomo aomipona exiketomo.
9 Eahmatoko, ypy tomo somohmãkõ roropa,
wewe eperytaketomo itu tõkehko roropa!
10 Eahmatoko, onokyro tõkehko okyno tõ roropa!
Eahmatoko, torõ tõkehko nono poro ytoketõ roropa!
11 Kuesẽkõ eahmatoko, tuisa tomo ahno tõ maro
emero, kowenatu tomo kowenu poko erohketõ maro!
12 Kuesẽkõ eahmatoko, nuasemãkomo oryximãkõ roropa, tamuhpomãkomo poetohti mãkõ roropa!
13 Ah Ritonõpo Kuesẽkõ eahmã toto emero porehme,
imehnõ ritõ tõ motye imehxo aexiryke!
Tynyrityã motye imehxo mana sero nono po
kapu ao roropa, morohne motye saeremehxo mana.
14 Typoetory Izyraeu tõ tyripose eya kokoro rokẽ jamihmehxo toto ehtohme.
Naeroro eahmatoko, ipoetory tõ anamonohpyra exiketomo, Izyraeu tomo, ipyno aehtyamo.
“Kure mase, Ritonõpo,” kahtoko!