147
Kure mase, Ritonõpo, Jamihmehxo Exikety
1 “Kure mase, Ritonõpo,” sykatone!
Kueremiarykõ Ritonõpo eahmaryme kure mana;
jamaro mana, zae roropa eahmary kyya xine mana.
2 Pata Jerusarẽ kurãkãko ropa Kuesẽkõ mana;
Izyraeu tõ enehnõko ropa mana imehnõ nonory poe,
arotyã imehnõ poetoryme.
3 Emynyhmaketõ kurãkãko ropa mana,
iiryhmatopõpyrykõ epinohnõko mana.
4 Xirikuato tõ tuhke ehtoh tyripose eya,
toine esety ae toto kohmãko mana.
5 Imehxo Kuesẽkõ mana, jamihme kuhse mana;
tuarohxo ynororo, emero zuaro mana.
6 Imehnõ motye osekaropyra exiketõ
anỹnõko Kuesẽkõ mana,
yrome popyra exiketõ akuhmõko mana nono pona.
7 Eremiatoko Kuesẽkõ eahmaryme;
rira tõ etotoko, “Kure mase, Ritonõpo,” karyme.
8 Akurũ ke kapu apurũko mana,
konopo enehpõko mana nono pona,
onahpoty ahtanohpõko roropa mana ypy tõ po.
9 Onokyro tomo a tonahsẽ ekarõko mana,
atõko poenõ nahpãko roropa mana
ikohmaryhtao eya xine.
10 Oty Ritonõpo zamaro nae?
Kawaru tõ jamihmãkomo? Arypyra.
Soutatu tõ orẽpyra exiketomo? Arypyra roropa.
11 Ritonõpo zamaro mokaro,
aomiry omipona exiketomo, penekehpyra exiketõ
Ritonõpo eraximary poko typynanohtohkõme.
12 Ritonõpo eahmatoko, Jerusarẽ põkomo!
“Kure mase,” kahtoko Oesẽkomo a, Xião põkomo!
13 Jamihme apatary omõtoh rĩko mana.
Kure rokẽ apatary põkõ rĩko roropa mana.
14 Ononory ehpiry ewomãko mana,
ozehno xine pyra imehnõ ehtohme,
tonahsẽ kurã ekarõko oya xine mana
tãkye oehtohkõme.
15 Tõmiry ke tyripõko mana,
axĩ inyripohpyry exĩko mana.
16 Kuenimã enehpõko mana sero nono pona
topuxixime, kaneru hpoty samo;
kuenimã topuru pahnõko mana putoh katoh samo.
17 Konopoimo enehpõko mana
topuxikiri samo, jeru kuenimano.
Kõxikene sytatose exĩko kuenimã enehporyhtao eya.
18 Mame aomiry omi poe jeru kuenimã tuname
exĩko ropa mana.
Tyryrykane enehpõko mana,
mame tuna serere ãko mana.
19 Tõmihpyry ekarõko Ritonõpo mana
Jako pakomotyamo a,
tynyripohpyry tõ Izyraeu tomo a.
20 Morara onyripyra imepỹ nonory põkomo a;
imehnõ ahno aomiry waro pyra mã toto.
“Kure mase, Ritonõpo,” sykatone!