119
Ritonõpo nyripohpyry
1 Tãkye matose ohxirosaromepyra imehnõ ahtao,
zae ehtoh poko rokẽ awahtao xine,
Ritonõpo Oesẽkõ omiry omipona!
2 Tãkye exĩko mã mokaro Ritonõpo nyripohpyry
omipona exiketomo,
aomiry omipona exiketõme mã toto yronymyryme!
3 Tãkye mã mokaro popyra ehtoh poko pyra
exiketomo,
tosẽkõ Ritonõpo zae ehtoh poenohnõko mã toto!
4 Õmihpyry mekaroase yna a, Ritonõpo,
omipona yna ehtohme tomeseke roropa.
5 Onyripohpyry omipona jexiry se ase ipunaka,
anamonohpyra jehtohme!
6 Tomeseke jahtao onymeropohpyry omipona jehtoh
poko ehxiropyra exĩko ase.
7 Yna amorepatoh tonõ kurã enetuputyryhtao ya
oeahmãko ase ukurohtao tukurikase jexiryke.
8 Onetapohpyry ya omipona exĩko ase,
ajohpame sã jũme jurumekara exiko.
Ritonõpo omiry ukurohtao
9 Otãto nuasemãkõ zae rokẽ ehtoh poko exĩko nae?
Õmihpyry omipona exikehpyra ahtao rokẽ
atapuropyra exĩko mã toto!
10 Azamaro jexiry se ase yjamitunuru ke porehme.
Kuakorehmako õmiry omipona
exikehpyra jehtohme, jũme.
11 Õmihpyry tukurãkase ya ukurohtao,
iirypyryme pyra jehtohme oya.
12 Kure mase, Ritonõpo, oeahmãko ase!
Kuamorepako onyripohpyry tõ poko.
13 Jarao imehnõ netaryme onymeropohpyry
sekeremãko ase emero.
14 Õmihpyry omipona jehtoh yzamarohxo mana,
itamurume tytineruke jexiry motye.
15 Anamorepatoh tonõ poko atamorepãko ase,
zae ehtoh poko jamorepary oya enetupuhnõko ase.
16 Onyripohpyry tõ yzamaro mana;
wenikehpyra ase õmiry poko.
Ise oehtoh waro se ase
17 Kure rokẽ kyriko opoetoryme jexiryke,
isene ro jehtohme,
jamorepatoh oya omipona jehtohme roropa!
18 Jenuru etapuruhmakako õmiry zae ehtoh
enetohme ya, josenuruhkatohme.
19 Tuhke hkopyra jeimamyry aropõko ase
taro nono po;
onyripohpyry tõ ononẽpyra exiko ywino.
20 Ukurohtao sam ãko ase torẽtyke,
ise oehtoh waro se exikehpyra jexiryke.
21 Epyrypaketõ zupokãko mase;
õmiry omipona pyra exiketomo a
popyra ehtoh enehpõko mase.
22 Kuewomako jeunohnanõ wino,
ypoihtonanõ wino roropa,
anamorepatyã omipona toehse jexiryke.
23 Kowenu poko erohketõ oximomyryhtao ro
yporemãkatohme, ywy,
opoetory atamorepakehpyra ase õmiry poko.
24 Josenetupuhtoh jamorepatopõpyry poko
oya sehxo ywy;
jakorehmãko mana zae ehtoh menekatohme ya.
Õmihpyry omipona jexiry se ase
25 Typoremãkase ywy, toepukase nono pona;
õmihpyry ae ro kyjamihtanohpoko ropa.
26 Osekaroase oya ynyrihpyry poko emero,
mame kuezukuase; kuamorepako
onyripohpyry tõ poko.
27 Kuakorehmako õmihpyry enetuputyry poko ya,
mame osenetupuhnõko ase,
osenuruhkãko roropa ase anamorepatoh tonõ poko.
28 Jemynyhmaryme tapotũkehse ywy;
kyjamihtanohpoko ropa õmihpyry ae ro.
29 Azahkuru ehtoh esemary apuruko
moro ae ytopyra jehtohme;
kure rokẽ oexiryke kuamorepako onyripohpyry poko.
30 Zae ehtoh esemary tymenekase ya,
tomeseke sã õmiry ymoiase omipona jehtohme.
31 Ritonõpo Jesemy, jamorepatopõpyry oya
omipona toehse ywy;
yporemãkapopyra exiko ehxiropyra jehtohme.
32 Axĩ onyripohpyry ya omipona exĩko ase,
ynara exiryke:
otato jahtao itamurumehxo oenetupuhnõko ase.
Kuamorepako onyripohpyry tõ poko
33 Ritonõpo Jesemy, kuamorepako
onyripohpyry tõ poko tuaro jehtohme,
jũme omipona exĩko ase.
34 Tuaro kyriko õmihpyry omipona jehtohme,
yronymyryme omipona jehtohme.
35 Kuaroko onyripohpyry tõ esemary ae,
moro ae tãkye jehtoh eporỹko ase.
36 Yna amorepatopõpyry oya omipona se jehtoh
tyriko, mõkomo apoiry se jehtoh myakãme.
37 Josenetupuh anakorekehkanopyra exiko popyra
ehtoh poko; kure rokẽ kyriko õmihpyry ae ro.
38 Opoetoryme ase; kyriko emero õmihpyry ae ro,
onetapohpyry ae ro õmipona exiketomo a.
39 Kypynanohko ypoihtonanõ omiry winoino, mokaro
zuno jexiryke; kure kuhse ahno apiakary oya!
40 Onyripohpyry tõ omipona jexiry se ase.
Isene kyriko ropa zae oexiryke.
Tãkye ase õmiry poko
41 Ritonõpo Jesemy, ypynohxo oehtoh enepoko ya,
kypynanohko jepetõkara winoino õmihpyry ae ro!
42 Mame mokaro ezukuru waro exĩko ase
jyhxiroryhtao eya xine, zae õmiry enetuputyryke ya.
43 Kuakorehmako ajohpe pyra rokẽ jehtohme,
kure ehtoh eraximãko ase zae
onyripohpyry tõ enetuputyryke ya.
44 Kokoro rokẽ onyripohpyry omipona exĩko ase;
jũme omipona exĩko ase rahkene.
45 Torẽtyke pyra ytoytõko ase
yna amorepatopõpyry tõ oya omipona se jexiryke.
46 Onyripohpyry tõ poko oturũko ase tuisa tomo a, ehxiropyra exĩko ase roropa.
47 Onyripohpyry tõ yzamaro mana,
ipyno xine jexiryke.
48 Otato ase onyripohpyry tõ etaryke ya
ipyno xine jexiryke,
atamorepãko ase onymeropohpyry tõ poko.
Õmihpyry pokoino kure ehtoh eraximãko ase
49 Wenikehpyra exiko onetapohpyry poko ya,
opoetoryme jexiryke,
moro pokoino kure ehtoh eraximãko ase.
50 Jetuarimaryhtao tomuhkehkase exiase,
õmiry poe isene toehse jexiryke.
51 Jeunohkehpyra epyrypaketõ mã toto ypoko,
yrome õmiry onurumekara ase.
52 Wenikehpyra ase pake anapiakatopõpyry tõ poko,
Ritonõpo, jemuhkehkapõko mana.
53 Tohne exĩko ase popyra exiketõ eneryhtao ya
onyripohpyry omipona pyra aehtohkõ poko.
54 Isene ro jahtao sero nono po eremiatoh tonõ rĩko
ase onyripohpyry tõ poko.
55 Koko ahtao wenikehpyra ase opoko,
osenetupuhnõko roropa ase õmiry poko.
56 Õmihpyry omipona jehtoh yzamaro mana:
moro pokoino tãkye ase.
Õmihpyry omipona exĩko ase
57 Ritonõpo Jesemy, ose rokẽ ase;
ajohpe pyra ase onyripohpyry omipona exĩko ase.
58 Yronymyryme ekaropõko ase oya:
juãnohpyra exiko, õmihpyry ae ro.
59 Tõsenetupuhse ywy ynyriry poko,
ajohpe pyra onyripohpyry tõ omipona exĩko ase.
60 Axiny, atarypokety sã õmiry omipona exĩko ase.
61 Ahno apoitoh tyrise jepetõkara a, japoitohme repe,
yrome wenikehpyra ase õmihpyry poko.
62 Onoa owõnõko ase oeahmatohme yna
amorepatopõpyry kurã poko oya.
63 Osepeme ase opoetory tõ maro, porehme,
õmihpyry omipona exiketõ maro.
64 Ritonõpo, sero nono pehme mana,
yna pyno oehtoh ke;
kuamorepako onyripohpyry tõ poko.
Õmihpyry zae ehtoh enetupuhnõko ase
65 Ritonõpo Jesemy, õmihpyry poko ya
anamonohpyra mexiase,
kure rokẽ kyriase, opoetoryme.
66 Tuaro kyriko zae ehtoh poko zuaro jehtohme,
õmihpyry zae ehtoh enetuputyryke ya.
67 Juãnohpyra ro awahtao azahkuru ehtoh poko
exiase, yrome seromaroro õmiry omipona ase.
68 Ritonõpo, kure mase; kure ehtoh rĩko mase;
kuamorepako onyripohpyry tõ poko.
69 Epyrypaketõ ajohpe ehtoh ke jyhxirõko mã toto,
yrome ywy, yronymyryme õmihpyry omipona ase.
70 Mokaro orutua kõ tãtamoreparykõ se pyra mã toto
õmiry poko, yrome yzamaro mana.
71 Juãnohtopõpyry kure nexiase ya, ynara exiryke:
moro pokoino onyripohpyry warohxo toehse ywy.
72 Mõkomo kurã motye õmiry kure mana ya,
tineruje motye roropa.
Josenetuputyry õmiry poko yzamaro mana
73 Ritonõpo, oemary ke kyriase, kuaputyase;
tuaro kyriko õmihpyry enetupuhtohme ya.
74 Oenetupuhnanõ atãkyemãko mã toto jeneryhtao
tyya xine zae õmihpyry tonetupuhse ya exiryke.
75 Ritonõpo, zuaro ase yna apiakary oya zae rokẽ mã
ipunaka, tuãnohse roropa exiase oya,
ypyno exikehpyra oexiryke.
76 Ajohpãme sã wemuhkehkapoko,
ypyno oehtoh anamonohpyra oexiryke
õmihpyry ae ro ya, opoetoryme!
77 Juãnohpyra exiko isene ro jehtohme,
õmiry poko josenetuputyry se jexiryke.
78 Ah mokaro epyrypaketõ ehxiroketõme nexĩ toto,
ajohpe tyhxirose jexiryke eya xine!
Yrome ywy osenetupuhnõko ase
anamorepatopõpyry tõ poko.
79 Ah mokaro õmiry omipona exiketõ noehno toh ya,
õmihpyry waro exiketomo!
80 Ah onymeropohpyry omipona ehxi yronymyryme,
ehxiropyra jehtohme jyporemãkapory poko.
Kypynanohko, Ritonõpo
81 Tapotũkehse ase, ypynanopyry eraximary poko oya;
õmihpyry zae ehtoh enetupuhnõko ase.
82 Jenuru etaehnõko mã kehko josenuhmaryhtao,
onetapohpyry ya eraximary poko.
Ekaropoxi: “Otara ahtao oehnõko mah
jemuhkehkapose?”
83 Uwa eukuru ẽtypyry sã toehse ase
iposohkahpyry samo,
yrome onymeropohpyry tõ poko wenikehpyra ase.
84 Otara ahtao ywy opoetory oeraximakehnõko hano?
Otara ahtao mokaro wãnohnõko mah,
jyryhmananomo?
85 Eutary tõ tahkase epyrypaketomo a japoitohme;
õmihpyry omipona pyra mokaro mã toto.
86 Onyripohpyry tõ zae mã kehko emero.
Kuakorehmako, tyyryhmase jexiryke
ajohpe exiketomo a.
87 Jetapaĩse toh nexiase,
yrome anamorepatopõpyry tõ onurumekara ase.
88 Ypyno oexiryke kypynanohko isene ro orẽpyra
jehtohme õmihpyry omipona.
Ritonõpo omiry jũme enahpyra mana
89 Ritonõpo Jesemy, õmihpyry jũme exikehpyra mana;
enahpỹme mã kapu ao.
90 Anamonohpyra mase jũme,
emero zumakahpõkomo a exikehpyra mase;
sero nono tyrise oya esaka,
moro poe esyryhmara mana.
91 Onyripohpyry ae ro senohne emero exikehpyra
mana seroae ro, õmiry omipona emero exiryke.
92 Õmihpyry yzamaro pyra ahtao,
pake toorihse jexiry jetuarimary ke.
93 Jũme wenikehpyra ase anamorepatopõpyry tõ
poko, moro ke isene ro kyriase.
94 Kypynanohko jepetõkara winoino
opoetoryme jexiryke, onyripohpyry tõ omipona se
toehse roropa jexiryke.
95 Popyra exiketõ jeraximãko mã toto jetapatohme,
yrome osenetupuhnõko ase onekarohpyry poko.
96 Ynara zuaro toehse ywy sero nono po
kurãkõ emero enahnõko mana;
yrome õmihpyry jũme yna akorehmãko mana
zae ehtoh poko yna ehtohme.
Õmihpyry sehxo ase, Ritonõpo
97 Õmihpyry sehxo hano!
Osenetupuhse kohmãnõko ase ipoko.
98 Onymeropohpyry ymaro exikehpyra mana,
ipokoino tuarohxo ase, jepetõkara motye.
99 Jamorepananõ emero motye enetupuhnõko ase,
jamorepatopõpyry poko oya josenetuputyryke.
100 Tamuximãkõ motye enetupuhnõko ase,
onyripohpyry tõ omipona jexiryke.
101 Popyra ehtoh poko exiketõ esemary ae ytopyra
exiase, õmihpyry omipona se jexiryke.
102 Onyripohpyry tõ omipona exikehpyra ase,
omoro ro jamorepaneme oexiryke.
103 Anusasamã sã ya õmiry mana!
Ano zeni motye anusasame mã ya.
104 Õmihpyry enetuputyryke ya tuaro exĩko ase,
morara exiryke zae pyra ehtoh emero
se pyra ase ipunaka.
Õmihpyry saerehkaneme mana
105 Õmiry jezurume mana zae osema ae jytotohme,
saerehkaneme mana saereme jesemary ehtohme.
106 Jomihpyry etapoase, moro rĩko ase, zae oya
jamorepatopõpyry omipona exĩko ase rahkene.
107 Ritonõpo Jesemy, etuarimãko ase itamurume;
kypynanohko isene ro, õmihpyry ae ro.
108 Ritonõpo, jomiry etako, “Kure mase,” karyhtao
oya, kuamorepako onyripohpyry tõ poko!
109 Tahxime orihsasaka ywy ahtao ro
wenikehpyra ase õmihpyry poko.
110 Ahno apoitoh tyrise popyra exiketomo a
japoitohme repe,
yrome anamonohpyra exiase onyripohpyry tõ omipona.
111 Jamorepatopõpyry oya ymõkomory kurã sã mã
kehko jũme rahkene;
tãkye jyrĩko mã toto ukurohtao.
112 Ynara tymenekase ywy, õmihpyry omipona
exikehpyra ase isene jehtoh etyhpyry pona
jorikyry ponãmero.
Anamorepatopõpyry tõ se ase
113 Ajohpe exiketõ se pyra ase ipunaka,
yrome õmihpyry sehxo ase.
114 Otonẽtohme mase ya, josewomatohme roropa
mase; kure ehtoh eraximãko ase õmihpyry ae ro.
115 Ytotoko ywinoino popyra ehtoh poko exiketomo,
Ritonõpo Jesẽ nyripohpyry omipona exĩko ase!
116 Jamihme kyriko ropa, õmihpyry ae ro, isene ro
jehtohme; penekehpyra kamexipoko
kure ehtoh eraximary poko.
117 Kuakorehmako, towomase jehtohme oya,
jũme õmihpyry omipona exikehpyra exĩko ase.
118 Mokaro rumekãko mase emero õmihpyry
omipona pyra exiketomo;
toiparo rokẽ osenetupuhnõko mã toto
imehnõ enekunohtohme.
119 Popyra exiketõ emero pahnõko mase
typahsẽ samo,
morara exiryke anamorepatopõpyry tõ sehxo ase.
120 Tykytyky ãko ase oẽpataka,
enaromỹke ase yna apiakaryke oya.
Anamorepatopõpyry tõ omipona ase
121 Zae ehtoh tyrise ya, kure ehtoh roropa;
jekaropyra exiko jepetõkara a.
122 Õmiry etapoko ya jakorehmary poko oya,
ywy ase opoetoryme.
Jutuarimapopyra exiko epyrypaketomo a.
123 Jenuru tõ totaehse nase josenuhmary poko,
oupĩko ase ypynanohtohme oya õmihpyry ae ro.
124 Juãnohpyra exiko opoetoryme jexiryke,
yna pyno exikehpyra oexiryke,
kuamorepako onyripohpyry tõ poko.
125 Opoetoryme ase; morara exiryke tuaro kyriko
anamorepatoh tonõ waro jehtohme.
126 Ritonõpo yna Esemy, epo tyritoh oya toehse mana,
onyripohpyry omipona pyra rokẽ mã toto.
127 Õmihpyry sehxo hano uuru se jehtoh motye,
uuru kurã motye.
128 Morara exiryke anamorepatoh tonõ omipona ase;
zae pyra exiketõ nyriry se pyra ase ipunaka.
Ritonõpo omihpyry omipona se hano
129 Onyripohpyry tõ kure kuhse mã kehko,
morara exiryke toto omipona ase yronymyryme.
130 Õmihpyry poko atamorepatopo
saerehkatoh sã mana,
tuaro pyra exiketõ tuarõtanohnõko mana.
131 Ẽtakãko ase joserematohme, õmihpyry poko
ypenetaryke, omipona se jexiryke.
132 Kueneko ropa, ypyno exiko roropa opyno exiketõ
pyno exikehpyra oehtoh samo.
133 Kuakorehmako epukara jehtohme õmihpyry ae ro;
yporemãkapopyra exiko roropa iirypyryme ehtoh ke.
134 Kypynanohko yrohmanohponanõ winoino,
onyripohpyry tõ omipona jehtohme.
135 Nupunato kueneko, opoetoryme jexiryke,
kuamorepako õmihpyry poko.
136 Iporiry sã yxity serere ãko, ikurenaka jenuru tõ
poe, õmihpyry omipona pyra ahno tõ exiryke.
Õmihpyry etyorõmara mana!
137 Zae rokẽ mase, Ritonõpo Jesemy;
onyripohpyry tõ zae roropa mana.
138 Anamorepatopõpyry tõ kure rokẽ mana,
zae roropa mã kehko ipunaka.
139 Apoto sã ase ukurohtao tohne jehtoh ke
õmiry htomaryke jepetõkara a.
140 Õmihpyry ya etyorõmara mana!
Moro sehxo ase, opoetoryme exiketyme ase!
141 Epyrypara exiketyme ase kure jehtoh poko,
ime pyra exiketyme jekarõko roropa imehnõ mana,
yrome wenikehpyra ase anamorepatopõpyry tõ poko.
142 Zae oehtoh jũme exikehpyra mana,
õmihpyry jũme zae roropa mana.
143 Jetuarimatopo te, torẽtyke jehtoh roropa mã
jerekohmãko repe,
yrome onyripohpyry tõ jãkyemãko mana.
144 Anamorepahpyry tõ zae rokẽ mana jũme,
tuaro kyriko isene exikehpyra jehtohme.
Õmihpyry zae ehtoh enetupuhnõko ase
145 Yronymyryme okohmãko ase, Ritonõpo;
kuezuhko, mame onyripohpyry tõ omipona exĩko ase!
146 Okohmãko ase, jakorehmatohme;
kypynanohko jepetõkara winoino te,
õmiry omipona exĩko ase.
147 Ẽmehpyra ro ahtao, okohmãko ase
jakorehmatohme, zae õmihpyry enetuputyryke ya
kure ehtoh eraximãko ase.
148 Nyhpyra ẽmehnõko ase josenetupuhtohme
õmiry poko.
149 Ritonõpo Jesemy, yna pyno exikehpyra oexiryke
jomiry etako!
Kypynanohko isene ro jahtao,
zae ehtoh riry se oexiryke.
150 Jyyryhmananõ popyra exiketõ ameke hkopyra
oehnõko mã toto;
jũme õmihpyry omipona pyra mã toto.
151 Yrome omoro, Ritonõpo, ameke pyra mase ya;
onyripohpyry tõ emero zae mã kehko.
152 Moino ro anamorepatopõpyry tõ waro toehse ywy;
jũme aehtohme morohne tyrise oya.
Õmihpyry zae mana ipunaka
153 Ritonõpo, jetuarimary eneko,
kypynanohko õmihpyry poko wenikehpyra jexiryke.
154 Kuewomako, sero ãpuruhpyry tae kutũtanohpoko;
kypynanohko isene ro, õmihpyry ae ro.
155 Popyra exiketõ osepynanohpyra exĩko mã toto
õmihpyry omipona pyra toexirykõke.
156 Yna pyno oehtoh kure kuhse mana, Ritonõpo!
Kypynanohko isene ro jahtao, zae õmihpyry ae ro.
157 Jepetõkara tuhke mã toto, jyyryhmary se
exiketõ roropa,
yrome onyripohpyry tõ omipona exikehpyra ase.
158 Mokaro ewokananõ eneryhtao ya:
“Popyra mã toto,” ãko ase, toto se pyra ase
õmihpyry omipona pyra toto exiryke.
159 Anamorepatyã sehxo jehtoh eneko, Ritonõpo!
Yna pyno oehtoh jũme etyorõmara mana,
naeroro isene ro kypynanohko!
160 Õmihpyry emero zae mana;
onyripohpyry tõ kurã jũme exikehpyra mã kehko.
Ritonõpo nyripohpyry tõ omipona se ase
161 Ahno jamihmãkõ osetapãko mã toto
ymaro onyryhpopãkara jahtao,
yrome õmiry poko otato ase ukurohtao.
162 Tãkye kuhse ase õmihpyry poko,
imepỹ tãkye ehtoh samo mõkomo kurã apoiryhtao eya!
163 Ajohpe ehtoh se pyra ase ipunaka,
zae pyra ehtoh roropa, yrome õmihpyry sehxo ase.
164 Oeahmazomõko ase 7me, toiro ẽmepyry ae,
anapiakatoh tonõ zae rokẽ exiryke.
165 Õmihpyry sehxo exiketõ torẽtyke pyra, towomase
mã toto, mokaro onemapopyra imehnõ mana.
166 Ritonõpo Jesemy, ypynanopyry oya eraximãko ase
jepetõkara winoino, onyripohpyry tõ omipona ase.
167 Anamorepatopõpyry tõ omipona ase;
toto sehxo ase yronymyryme.
168 Õmihpyry omipona ase, onyripohpyry tõ roropa,
ynyriry enẽko mase emero porehme.
Õmihpyry poko tãkye ase
169 Ritonõpo Jesemy, okohmary ya etako,
tuaro kyriko õmihpyry ae ro.
170 Jotururu oya etako, kypynanohko õmihpyry ae ro!
171 Oeahmakehpyra ase,
jamoreparyke oya onymeropohpyry tõ poko.
172 Õmihpyry poko eremiãko ase,
zae onyripohpyry tõ exiryke.
173 Ritonõpo, tahxime kuakorehmako,
onymeropohpyry omipona jexiryke.
174 Ritonõpo Jesemy, ypynanopyry poko penetãko ase,
õmihpyry poko jahtao atãkyemãko ase.
175 Kuewomako isene ro jahtao, oeahmatohme ya.
Ah anamorepahpyry tõ jakorehmãko mã toto!
176 Kaneru itatyhpyry sã toytose ywy xiaxiake rokene.
Ritonõpo Jesemy, osehko jenese ropa,
wenikehpyra jexiryke onyripohpyry tõ poko!